MATIUS 4:24 - KITTA' MATANGKASA'

²⁴ Tassiara'mi kabara'Na Isa mange ri pa'rasangang Siria, sa'genna pila' jaimi tau ambattui. Massing angngerammi ke'nanga tau garring. A'rupa-rupami tau garring siagang tau susa nierang mae ri Ia. Tau nisosoka ri setang, tau mate-mate jangang, tau peso', na maraengannaya, Naballei ngasemmi Isa sa'genna baji' memang silalonna.

MATIUS 4:24 ပူးပေါင်းရင်းမြစ်များ

2 SAMUEL 8:6

Nampa ambangung Daud pakkemaang-pakkemaang tantara lalang ri daerana ke'nanga, siagang tundu'mi ke'nanga kammayatompa a'bayara' passare mae ri ia. Nisarei Daud ri Batara pammetang manna pole kemae napa'bunduki.

1 KARAENG-KARAENG 10:1

Nalangngereki karaeng bainena pa'rasangang Syeba ri passala' kacara'dekanna Salomo. Jari battumi mange ri Yerusalem untu' anso'ri Salomo siagang pakkuta'nang sukkara'-sukkaraka.

1 KARAENG-KARAENG 4:31

Ia tojeng-tojemmi kaminang cara'de' battu ri sikontu taua. La'biangngangi na Etan anjo tu Ezrahi, Heman, Kalkol siagang Darda ana'-ana'na Mahol. Alla'bangi niasseng ri kere-keremae ri sikontu pa'rasangang niaka ri tammulilina kakaraenganna.

1 PATTOTTORANG 14:17

Jari masahoro'mi arenna Daud ri kere-keremae, siagang nipa'jari malla' ngasemmi anjo sikontu bansaya ri Batara mae ri Daud.

1 PATTOTTORANG 29:2

Bahang-bahanna anjo ballaka siagang sikamma pakkakasa'na le'ba'mi kupasadia situru' pakkulleku. Le'ba'ma' appasadia bulaeng, pera', parunggu, bassi, kayu, batu-batu ka'jalaka ballinna, batu-batu paramata, batu-batu sangka' rupaya warnana untu' pa'belo-belo, siagang sanna' jaina batu accilaka.

KALAPPASSANG 15:26

Nakana Batara, “Mannuruki tojeng-tojeng mako mae ri Nakke, siagang gaukangi apa Kukanaya baji'; turuki sikamma parentaKu. Punna nugaukang anjo kammaya, tena nulaKuhukkung sangkamma garring le'baka Kupabattu mae ri tu Mesirka. INakkemi Batara ampamolleako.”

MATIUS 12:22

Le'baki anjo, nia'mo se're tau buta siagang pepe nisosoka ri setang nierang mae ri Isa. Naballeimi Isa anjo taua sa'genna akkullemo accini' siagang a'bicara.

MATIUS 14:1

Anjo wattua, Herodes a'jari karaeng ri pa'rasangang Galilea. Nalangngere'mi Herodes kabara'Na Isa.

MATIUS 15:22

Nia'mo sitau baine tu Kanaan niaka anjoreng ri daeraya battu mae ri Isa akkiok-kio' angkana, “O Ana'na Daud, Kikamaseanga'! Napantamakki setang ana' baineku. Sanna' dudumi sessana!”

MATIUS 17:15

Angkanami anjo taua, “O Bapa', Kikamaseang laloi anakku. Natabai garring mate-mate jangang. Nateai sipato' sanna'na garrinna. Pammate sanna'na garrinna sa'genna biasai tu'guru' antama' ri pepeka yareka antama' ri je'neka.

MATIUS 17:18

Nampa Nabongka Isa anjo roh ja'dalaka battu lalang ri kalenna anjo anaka. Assulu'mi anjo roh ja'dalaka, na'jari baji'mo anjo anaka silalonna.

MATIUS 4:23

Wattunna ri Galilea, a'lampai Isa angnginroi sikontuna anjo pa'rasanganga. Angngajaraki ri sikamma balla' sambayanga siagang Nabirittakammi Kabara' Bajika angkanaya lammarentami Allata'ala. Naballei tommi sikamma tau garringa siagang tau sala-salanga sa'genna baji' ngaseng.

MATIUS 8:28

Battui Isa ri ba'leanna tamparanga, ri daera Gadara. Anjoreng nia'mo rua tau nasoso' setang battu mae ri Ia. Tenamo tau barani a'reppese' mae ri anjo tau ruaya, lanri sekke'na.

MATIUS 8:33

Lari ngasemmi pakalawakinna anjo bawia, mange ri kotaya; nanacarita ke'nanga anjo apa kajarianga, siagang passala'na anjo tau ruaya nasosoka setang.

MATIUS 8:6

Nakanamo anjo perwiraya, “O, Bapa', garringi pajamaku ri balla'. Sanna'mi sessana, attinro mami rate ri katinroanga lanri peso'mi.”

MATIUS 9:26

Alla'bammi anjo kabaraka ri sikontu anjo daeraya.

MATIUS 9:35

Kammaminjo pa'lampanna Isa akkuliling battu ri se'reang kota mange ri kota maraenga; battu ri se'reang kampong mange ri kampong maraenga. Angngajara'mi lalang ri sikamma balla' sambayanga, siagang Napabattumi Kabara' Kasalamakkanga, ri passala' antekamma bateNa ammarenta Allata'ala salaku Karaeng. Naballei ngasemmi tau garringa na'jari baji' ngasemmo. Na anjo tau garringa a'rupa-rupai garrinna siagang kasessanna. Kammayatompa tu sala-salanga nabajiki ngaseng tommi.

MARKUS 1:28

Linta'mi tassiara' mange-mange kabara'na Isa ri sikontu daera Galilea.

MARKUS 1:32

Karuenna, ri labunamo alloa, naerang ngasemmi taua sikamma tau garringa mae ri Isa siagang sikamma tau nasosoka setang.

MARKUS 2:3

Lalang a'bicaraNa Isa, nia'mo tau appa' battu a'bule' tau peso', ero' naerang mae ri Isa.

MARKUS 2:4

Mingka lanri jaina tau, takkulleami ke'nanga battu mae ri Isa. Jari angngambi'mi ke'nanga nai' ri pattongko'na ballaka. Nampa nasungke ke'nanga pattongko' niaka irateanganna Isa. Le'baki anjo naoloro'mi ke'nanga naung anjo tau pesoka siagang tappere'na.

MARKUS 2:9

Maka kereanga gampangangang: angkanaya, ‘Nipammopporammi dosanu’ yareka angkanaya, ‘Ambangungko nai', angkaki tappere'nu, nu'jappa’?

LUKAS 2:2

Sitabang tongi Kirenius a'jari guburnur Roma ri pa'rasangang Siria, nabungasa' nibilang tuma'buttaya.

LUKAS 4:14

Le'baki anjo ammotere'mi Isa mange ri Galilea. Na nikoasai ri RohNa Allata'ala. Tassiara'mi kabara'Na ri sikontu anjo daeraya.

LUKAS 4:38

Nabokoimi Isa anjo balla' sambayanga, nampa a'lampa mange ri balla'na Petrus. Anjo wattua sitabangi rammusu' matoang bainena Petrus. Nipauammi Isa ri taua anjo passala' garrinna.

LUKAS 5:15

Mingka pila' tassiara'mi kabara'Na Isa ri kere-keremae. Jaimi tau battu ero' ampilangngeri apa Napabattua, siagang ero' assuro ballei garrinna ke'nanga.

LUKAS 5:24

Mingka kamma-kamma anne Kupa'butti ri kau ngaseng, angkanaya koasai Ana' Ma'rupataua ampammopporangi dosaya ri anne linoa.” Nampa Nakana Isa ri anjo tau pesoka, “Ambangungko nai', angkaki katinroannu, siagang ammotere' mako!”

LUKAS 7:17

Tassiara'mi anne kabara'Na Isa ri sikontu Yudea siagang daera-daera niaka ri tammulilina.

YOHANES 10:21

Mingka nia' todong angkana, “Tena nakamma anjo batena a'bicara tau nasosoka setang! Maka akkullei setanga amballei tau butaya sa'genna accini'?”

LAMPA-LAMPANA 10:38

Nuassemmi angkanaya le'ba'mi Napile Allata'ala anjo Isa tu Nazaretka, naNapassareang RohNa Allata'ala siagang koasaNa mae ri Ia. Nuasseng tommi angkanaya le'ba'mi a'lampa mange-mange Isa anggaukangi kabajikanga; Naballeimi sa'genna a'jari baji' sikamma tau nasosoka setang, lanri niaki Allata'ala anrurungangi.

LAMPA-LAMPANA 15:23

Nisaremi anne ke'nanga angngerang se're sura', kammaya anne bonena, “Natarimai sikontu sari'battang bansa-bansa maraenga, niaka ammantang ri Antiokhia, Siria, siagang Kilikia. Salama' battu ri kambe ngaseng tunisuroNa Allata'ala siagang pamimping-pamimpinga, iamintu sari'battannu ngaseng.

LAMPA-LAMPANA 15:41

A'lampami ke'nanga angkulilingi Siria siagang Kilikia; napakajarre'mi ke'nanga sikamma jamaah niaka anjoreng.

LAMPA-LAMPANA 28:9

Lanri nia'na anjo kajarianga, nierang ngasemmi sikamma tau garringa ri anjo puloa mae ri Paulus. Naniballei ngasemmo ke'nanga sa'genna a'jari baji'.

LAMPA-LAMPANA 8:7

Nasaba' assulu'mi roh ja'dalaka ammarrang kodi battu ri tau jai nasosoka setang, lanri nabongkai Filipus assulu'. Jai tommi tau peso' siagang tau tempang niballei na'jari baji'.

YOSUA 6:27

Nirurungangi Yosua ri Batara, siagang a'jari masahoroki arenna Yosua ri sikontu anjo pa'rasanganga.