MATIUS 27:30 - KITTA' MATANGKASA'

³⁰ Napi'ruimi rupanNa Isa, nampa naalle anjo takkanga, na napalu-palui ulunNa.

MATIUS 27:30 ပူးပေါင်းရင်းမြစ်များ

YESAYA 49:7

Nakana Allata'ala matangkasa', Mappasalama'na Israel, mae ri tu nihina dudua, siagang nikabirisia ri bansa-bansaya kammayatompa a'jari ataya ri sikamma tukoasaya, “Sikamma karaenga lanaciniki panggaukangKu; lambangungi ke'nanga ampakalompoA'. Sikamma tukoasaya lanacini' tongi, nampa su'ju' anynyomba.” Kajariangi anjo kammaya lanri le'ba'mi Napile Batara atanNa; Allata'ala matangkasa'na Israel majarreki ri janjinNa.

YESAYA 50:6

Kutannangngangi dongkokku tau eroka amba'jia'; na pilisikku mae ri tau eroka ambi'buki janggokku. Tena nakugilingi rupangku ri wattungku nihina siagang nipi'rui.

YESAYA 52:14

Riolo jai tau ta'bangka anciniki, nipanraki rupanna sa'genna tenamo nattanja' tau.

YESAYA 53:3

Nihinai siagang nililiangi, tau tuli sessaya siagang biasaya antanggongi pa'risika. Tena manna sitau ero' anciniki, siagang ikatte tena todong nijampangi.

YESAYA 53:7

Ia nigau' nikapallakki, mingka sa'baraki ampisa'ringi. Tamakkana-kanayai rapang ana' gimbala' nieranga mange ri pammolongang yareka anrong gimbala' nicukkuruka bulunna.

MIKHA 5:1

Nakana Batara, “He Betlehem Efrata, ikau kalase'renna kota kaminang ca'dia ri Yehuda! Mingka battu ri kaumi laKupammumba sitau makoasaya untu' Israel, naia assala'na battu riolo duduji.”

MATIUS 26:67

Massing battumi ke'nanga ampi'rui rupanNa Isa, nampa nasessa naba'ji. Nia' tommo antempaka'rangi,

MARKUS 10:34

Lanipare' kare'-karenangi ri ke'nanga, nipi'rui, nisessai, nampa nisalli' ri ke'nanga. Mingka ri makatalluna alloa, lattallasa' poleangi.”

MARKUS 14:65

Appakkaramulami siapa areang ri ke'nanga ampi'rui rupanNa Isa. Siagang natongko'mi matanNa nampa naba'ji. Nampa nakana ke'nanga, “Coba sai tappu, inai amba'jiKo?” Amminawang ngaseng tommi pangawalaka antempaka'rangi Isa.

MARKUS 15:19

Napalu-paluimi takkang ke'nanga ulunNa Isa, nampa napi'rui rupanNa siagang su'ju' anynyomba ri dallekanNa.