MATIUS 26:53 - KITTA' MATANGKASA'

⁵³ Maka tenapa nuassengi angkanaya punna erokKa', akkullei Kupala' ri ManggeKu sollanna Nasuro battu silalonna memang surudadu malaeka'Na, sampulo anrua sa'bu battu angngalleiA'?

MATIUS 26:53 ပူးပေါင်းရင်းမြစ်များ

2 KARAENG-KARAENG 6:17

Nampa appala' doang Elisa angkana, “O Batara, dasi-dasi natassungke matanna palayangku sollanna akkulle accini'!” Niturukiammi pappala'na Elisa, sa'genna ri wattunna assaile palayanna, nacini'mi anjo monconga rassi siagang jarang na kareta a'rinra angkulilingi Elisa.

DANIEL 7:10

kammayatompa nia' pepe' a'lo'loro' battu ri anjo empoang kakaraenganga. Assa'bui tau allayani, siagang a'juta-jutai tau ammenteng ri dallekanNa. Nampa nipakaramulamo sidang pangadelanga, siagang nisungkemi kitta'-kittaka.

MATIUS 25:31

“Punna battu sallang Ana' Ma'rupataua a'jari Karaeng siagang nirurungang ri sikontu malaeka'Na, lammempomi irate ri empoang kala'biranNa.

MATIUS 4:11

Kala'busanna, a'lampami Billisika ambokoi Isa. Nampa battumi malaeka'-malaekaka allayani Isa.

MARKUS 5:15

Mangemi ke'nanga ri Isa, nampa nacini'mo ke'nanga anjo tau le'baka nasoso' setang, ammempo anjoreng. Ammakemi care-care siagang baji'mi jappana pikkiranna. A'jari malla' ngasemmi ke'nanga.

MARKUS 5:9

Nampa akkuta'nang Isa ri ia Nakana, “Inai arennu?” Appialimi anjo taua nakana, “ ‘Legiun’ arengku – nasaba' jai sikalia' sipa'rurungang!”

LUKAS 8:30

Akkuta'nammi Isa ri anjo taua Nakana, “Inai arennu?” Appialimi anjo taua angkana, “Legiun,” nasaba' jaimi setang antama' ri kalenna anjo taua.

YOHANES 10:18

Mingka tena manna sitau akkulle angngallei nyawaKu battu ri Nakke. Battu ri erokKu tonji naKupassareang. Nia' koasaKu ampassareangi, na nia' todong koasaKu angngallei ammotere'. Iaminjo tugasa' Kutarimaya battu ri ManggeKu.”

YOHANES 18:36

Nakanamo Isa, “INakke kakaraengangKu tena nabattu anrinni ri linoa. Ebara' angkana battu anrinni ri linoa kakaraengangKu, ma'nassa langngewai taungKu sollanna tena nanipassareangA' mae ri sikamma pamarentana tu Yahudia. Mingka tena memang nabattu anrinni ri linoa kakaraengangKu!”

2 TESALONIKA 1:7

Na untu' ikau angkasiakai pa'risika ri kamma-kammaya anne – kammayatompa ri kambe – laNasareki' kasalewangang Allata'ala, punna battu sallang Batara Isa, manaunga battu ri suruga ampa'nyatai KalenNa siagang malaeka'-malaeka' lompoNa

YUDAS 1:14

Henokh, iamintu sossorang makatujua lapisi'na battu ri Adam, le'baki napau la'bi riolo pirangalloang ri passala'na ngaseng anne tau kammaya. Angkanai Henokh, “Ciniki sallang, labattui Batara siagang assa'bu-sa'bu malaeka' matangkasa'Na,