MATIUS 25:31 - KITTA' MATANGKASA'

³¹ “Punna battu sallang Ana' Ma'rupataua a'jari Karaeng siagang nirurungang ri sikontu malaeka'Na, lammempomi irate ri empoang kala'biranNa.

MATIUS 25:31 ပူးပေါင်းရင်းမြစ်များ

PAMMUJI 9:7

Cappu'mi Kipa'la'busu' musunna ikambe, Kiancuruki kota-kotana ke'nanga; tenamo tau langngu'rangi poleangi.

ZAKHARIA 14:5

Lalariko allalo ri anjo lappara' ka'bung ambage ruayai anjo buluka. Lalariko sangkamma boe-boenu ri wattunna ta'ge'goso' buttaya ri wattu ammarentana Uzia, iamintu karaenna Yehuda. Nampa battu Karaeng Allata'alaku, nirurungang ri sikontu malaekaka.

MATIUS 16:27

Tasalloami Nabattu Ana' Ma'rupataua siagang kakoasanNa ManggeNa, nirurungang ri malaeka'-malaeka'Na. Iaminjo wattua naNabalasa' massing panggaukanna rupataua.

MATIUS 19:28

Nakanamo Isa ri ke'nanga, “Tappa' mako angkanaya: Ri Lino Berua, lammempoi Ana' Ma'rupataua irate ri empoang kala'biranNa. Anjo wattua sallang, ikau ngasemmi ana'-ana' gurungKu lammempo irate ri sampuloa anrua empoang kala'birang. Na ikaumi langngadeli sampuloa anrua suku ri bansa Israelka!

MATIUS 25:6

Ri lantannamo bangngia, nampami nia' sa'ra akkio' angkana, ‘Nia' minjo mae bunting bura'nea! Umba niruppai!’

MATIUS 26:64

Appialimi Isa Nakana, “Annaba mintu kanannu. Mingka patappa'mi angkanaya: Anne kamma appakkaramulami lanucini' Ana' Ma'rupataua ammempo ri sa'ri kananNa Allata'ala Kaminang Koasaya. Siagang lanucini' tommi sallang battu poleang irate ri langika ri tompo'na rammanga!”

MARKUS 14:62

Appialimi Isa Nakana, “INakke minne, na lanuciniki sallang Ana' Ma'rupataua ammempo ri sa'ri kananNa Allata'ala Kaminang Makoasaya, siagang lanaung battu ri langika ri tompo'na rammanga!”

MARKUS 8:38

Punna nia' tau siri'-siri' angngakuiA' siagang pangngajarangKu ri anne jammang sannaka dorakana siagang ja'dala'na, tena todong Naero' Ana' Ma'rupataua angngakui sallang punna battui siagang koasaNa ManggeNa, nirurungang ri malaeka'-malaeka' matangkasa'Na.”

LUKAS 22:69

Mingka appakkaramula ri kamma-kammaya anne lammempomi Ana' Ma'rupataua ri sa'ri kananNa Allata'ala Kaminang Koasaya.”

LUKAS 9:26

Inai-nai siri'-siri' angngakuiA' siagang antarimai pangngajarangKu, lasiri'-siri' tongi Ana' Ma'rupataua angngakui sallang punna battu siagang koasaNa, kammayatompa koasaNa ManggeNa siagang koasana malaeka'-malaeka' matangkasaka!

YOHANES 1:51

Nakanamo pole Isa, “Tappa' mako, angkanaya sitojeng-tojenna lanuciniki tassungke langika, siagang lanai'-naungi malaeka'-malaekaka ri Ana' Ma'rupataua.”

LAMPA-LAMPANA 1:11

Nakanamo anjo tau ruaya, “E, ikau ngaseng tu battua ri Galilea, angngapa nummantang bawang antureng acconga nai' ri langika? Anjo Isa, nucinika ta'angka' nai' ri suruga, labattu poleangi sallang lalang kala'biranNa, sangkamma la'biri'Na ri wattunna nucini' nai' ri suruga sumpadeng.”

1 TESALONIKA 3:13

Lanri kammana, akkullemi Napakajarre' Batara pa'mai'nu, sa'gennu matangkasa' siagang tena callannu ri dallekanNa Allata'ala Manggeta, punna battu poleang sallang Batara Isa a'rurung siagang sikontu taunNa ngaseng.

1 TESALONIKA 4:16

Punna sallang naung KalenNa Isa battu ri suruga, lakkio' lompoi malaeka' lompoa siagang lanipasa'rai tarompe'Na Allata'ala untu' a'jari pammatei. Nampa nipabangung la'bi riolo tu Karistenga.

IBRANI 1:8

Mingka mae ri anjo Anaka, Nakana Allata'ala, “Empoang kala'biranNu, o Allata'ala, lasa'genna satunggu-tungguna! PamarentahanNu, iamintu pamarentahang adele'.

IBRANI 9:28

Kammatommi anjo Almasi. Sikaliji bawang nipassareang a'jari koro'bang, najai tau Natangkasi dosana. Labattu poleangi makapinruanna. Mingka teaimi untu' antanggongi dosaya; passangalinna untu' ampasalamaki sikamma tau antayangai kabattuanNa.

YUDAS 1:14

Henokh, iamintu sossorang makatujua lapisi'na battu ri Adam, le'baki napau la'bi riolo pirangalloang ri passala'na ngaseng anne tau kammaya. Angkanai Henokh, “Ciniki sallang, labattui Batara siagang assa'bu-sa'bu malaeka' matangkasa'Na,

PAPPICINI' 1:7

Ciniki, niakI battu lalang ri rammanga! Sikontu rupataua lanacini' ngasengI, kammayatompa tau le'baka antobokI poke. Lanri Iami nalappiraung ngaseng sikontu bansa-bansaya ri lino. Mattantu kammana! Aming!

PAPPICINI' 20:11

Le'baki anjo nia'mo kucini' se're empoang kala'birang; lompoi siagang keboki tanja'na anjo empoang kala'biranga siagang nia' tommi rate patanNa empoang ammempo. Lanynya'mi langika siagang buttaya battu ri dallekanNa, sa'genna tenamo nakacinikang.

PAPPICINI' 3:21

Ia ammetaya, laKupa'biangi ammempo ri empoang kala'birangKu siagang sipammempoangA' sangkamma Kalengku le'bakamo ammeta siagang kamma-kamma anne siagang ManggeKu ri empoang kala'biranNa.

1 SAMUEL 2:10

Musu-musunNa Batara ancu'-ancuruki, mallaki ke'nanga; a'gunturuki battu ri langika. Batara angngadeli sikontu anne linoa, na Nasare koasa mala'biri' ri karaeng Nipilea.”