MATIUS 22:9 - KITTA' MATANGKASA'

⁹ Kamma-kamma anne a'lampamako mange ri agang-agang lompoa nanukio' ngaseng tau jaia battu mae assua'-suara'.’

MATIUS 22:9 ပူးပေါင်းရင်းမြစ်များ

YEHEZKIEL 21:21

Karaeng Babel ammenteng ri ampi'na anjo papang pammateia. Untu' naassengi angkanaya oloang kereanga lanalaloi, lappalaki pangngunju' battu ri barhala-barhalana, nagoccangi panaya nampa naparessa atenna olo'-olo' beru le'baka nakoro'bangkang.

OBAJA 1:14

Tena numusti ammenteng ri panyingkulu'na aganga, untu' angngadangi tau laria ampilari musua, yareka ampassareangi ke'nanga mae ri balia ri allo natujuna ke'nanga kasusaang.”

MATIUS 20:7

Appialimi ke'nanga angkana, ‘Katena tau ampajamaki'.’ Nakanamo anjo patanna koko, ‘Punna kamma padeng, mange ngaseng mako anjama ri koko anggorokku.’

MATIUS 22:10

A'lampa ngasemmi anjo palayanga. A'lampami ke'nanga ri agang-agang lompoa nanapa'rappungang ngaseng tau nabuntuluka ke'nanga, baji'na tau bajika kammayatompa tau ja'dalaka. Rassimi anjo balla' passua'-suarrang pa'buntinganga napakamma jaina toana.

MATIUS 22:8

Le'baki anjo nakio'mi pala'-palayanna maraenganga. Nakana ri ke'nanga, ‘Sadiami passua'-suarranga, mingka tena ngaseng nasiratang anjo tau le'baka niburittai.

LUKAS 24:47

Kammayatompa, lalang arenNa anjo Karaeng Mappasalamaka, musti nibirittakangi mae ri sikontu bansaya angkanaya musti tobaki sikontu rupataua, kammayatompa Napammopporangi Allata'ala dosa-dosaya. Na anjo birittaya, musti nipabattui appakkaramula battu ri Yerusalem.

LAMPA-LAMPANA 13:47

Nasaba' iaminne parentaNa Batara mae ri kambe; Nakana Batara, ‘Kupa'jari mako singara' mae ri bansa-bansa maraenga, teaiya tu Yahudi, sollanna nupabattu kasalamakkang mae ri sikontu linoa.’ ”

EFESUS 3:8

Ri sikontu umma'Na Allata'ala, inakkemi anne kaminang tuna. Mingka Nasarema' Allata'ala anne pangngamaseanga: Iamintu jama-jamang untu' ambirittakangi mae ri bansa-bansa maraenga Kabara' Bajika, iamintu kakalumanynyanganNa Almasi tenaya la'busu'na;

PAPPICINI' 22:17

Nakanamo RohNa Allata'ala siagang Bunting Bainea, “Mae mako!” Sikamma allangngerekai musti angkana tongi, “Mae mako!” Inai-nai turere, battu mako mae! Siagang inai-nai ero' mae mako angngalle cuma-cuma je'ne' katallassang!