MATIUS 21:34 - KITTA' MATANGKASA'

³⁴ Se're wattu, narapi'mi wattunna lanialle rapponna anjo anggoroka ri kokonna. Nasuromi siapa are palayanna anjo patanna koko mange ampalaki tawana ri anjo tau anjamayai kokonna.

MATIUS 21:34 ပူးပေါင်းရင်းမြစ်များ

YESAYA 5:4

Apapi pole musti Kugaukang, mingka tenapa Kugaukangi mae ri anjo koko anggorokKu? Angngapa narappo kacci narappoang, teai rappo baji' sangkamma Kuminasaia?

YEREMIA 35:15

Tena ammariKu assuroi battu mae ri kau sikamma atangKu na'bi-na'bia, siagang napakainga' mako ke'nanga sollanna nupakabaji' panggaukannu na nupamari a'gau' ja'dalaka. Napakaingakko ke'nanga sollanna tena nunynyomba mae ri rewata-rewata maraenga siagang tena nupare' atai kalennu mae ri anjo rewata-rewataya, sollannu akkulle ammantang tuli anrinni ri pa'rasangang Kupassareanga mae ri kau siagang mae ri boe-boenu. Mingka taerokako amparhatikangi siagang taerokako mappilangngeri ri Nakke.

MATIUS 21:35

Mingka battuna mange anjo palayanna patanna koko, nijakkala'mi ke'nanga ri anjo pajama kokoa. Nia'mo naba'ji, nia'mo nasambila batu, siagang nia' tommo nibuno ri ke'nanga.

MATIUS 21:38

Mingka nacini'na ke'nanga anjo ana'na patanna koko nakanamo para ia, ‘Iaminne ana'na, warisi'na patanna koko. Umba nibunoi nampa nialleang warisi'na!’

MATIUS 21:40

Le'baki Nacarita Isa anjo pangngebaranga akkuta'nammi ri ke'nanga angkana, “Jari punna ammotere' anjo patanna koko, apa lanagaukang ri anjo tau anjamayai kokonna?”

MATIUS 21:41

Appialimi ke'nanga angkana, “Mattantu lanabunoi anjo tau ja'dala' kammaya. Nampa napappitesangang ri tau maraeng anjo kokonna, eroka ambagei punna narapi' wattunna nibage wassele'na anjo kokoa.”

MATIUS 22:3

Nasuromi pala'-palayanna anjo Karaenga mange ambuntuli sikamma tau le'baka niburittai mae ri anjo passua'-suarranga. Mingka taerokai battu anjo sikamma tau le'baka niburittai.

MARKUS 12:1

Nampa appakkaramulami Isa a'bicara pangngebarang mae ri anjo imang-imang kapalaya, guru-guru agamaya kammayatompa pamimping-pamimpinna tu Yahudia. Nakana Isa, “Nia' se're tau a'lamung anggoro' ri kokoa, nampa nakalli' ri tammulilina. Le'baki anjo angngekemi kali'bong eroka napake ammacco' je'ne' anggoro'. Nampa appare' balla' pakkammikang. Le'baki anjo napappitesangammi anjo koko anggoroka mae ri siapa are pajama koko, nampa a'lampa ri se'reang pa'rasangang maraeng.

MARKUS 12:7

Mingka massing nakanamo anjo pajamaya para ia angkana, ‘Iaminne warisi'na. Umba nibunoi, sollanna akkulle nialle warisi'na!’

MARKUS 12:9

Le'baki anjo akkuta'nammi Isa Nakana, “Maka apa lanagaukang anjo patanna koko? Mattantu labattui na nabuno ngaseng anjo pajamaya. Nampa napappitesangang anjo kokoa mae ri pajama koko maraenga.

LUKAS 20:9

Nacaritami Isa mae ri taua anne pangngebarang angkanaya, “Nia' sitau allamungi anggoro' kokonna. Napappitesangangi anjo kokonna mae ri siapa are pajama koko. Nampa a'lampa mange ri pa'rasangang maraeng, nammantang sallo anjoreng.