MATIUS 19:27 - KITTA' MATANGKASA'

²⁷ Nakanamo Petrus, “Kicini' minne, ikambe nibokoi ngasemmi sikamma apa niaka ri kambe lanri erotta amminawang ri Katte. Na apa sallang lanagappa ikambe?”

MATIUS 19:27 ပူးပေါင်းရင်းမြစ်များ

MATIUS 19:26

Nicinikimi ke'nanga ri Isa; nampa Nakana Isa ri ke'nanga, “Anjo tena memang nantama' ri akkala'na rupataua. Mingka tena tamakkulle punna Nakaerokang Allata'ala.”

MATIUS 19:28

Nakanamo Isa ri ke'nanga, “Tappa' mako angkanaya: Ri Lino Berua, lammempoi Ana' Ma'rupataua irate ri empoang kala'biranNa. Anjo wattua sallang, ikau ngasemmi ana'-ana' gurungKu lammempo irate ri sampuloa anrua empoang kala'birang. Na ikaumi langngadeli sampuloa anrua suku ri bansa Israelka!

MATIUS 9:9

Le'baki anjo a'lampami Isa ambokoi anjo tampaka. Lalang a'jappaNa, nia'mo Nacini' sitau pasingara' sima niarenga Matius, sitabang ammempo lalang ri kantoro'na. Nakanamo Isa ri ia, “Maeko amminawang ri Nakke!” Ammentemmi Matius nampa amminawang ri Isa.

MARKUS 10:28

Nampa nakanamo Petrus, “Cini'mi, ikambe ngaseng le'ba' nibokoimi sikontu apa-apanta lanri untu' amminawang ri Katte Bapa'.”

MARKUS 2:14

Lalang a'jappaNa Isa anjoreng, nia'mo Nacini' pasingara' sima niarenga Lewi, ana'na Alfeus. Sitabangi ammempo lalang ri kantoro' simaya. Nakanamo Isa ri ia, “Amminawangko ri Nakke.” Ammentemmi Lewi nampa amminawang ri Isa.

LUKAS 14:33

Kala'busanna Nakanamo Isa, “Ikau kamma ngaseng tommako anjo. Tenanniakka manna sitau lakkulle a'jari ana' gurungKu, punna taerokako ambokoi ngasengi apa-apa niaka ri kau.”

LUKAS 15:29

Mingka nakanamo anjo anaka, ‘Attaung-taummi salloku akkareso ampanjamangki'. Tena le'bakai takugaukang apa kipassuroanga ri nakke. Na apa le'ba' kipassareang mae ri nakke? Manna sikayu bembe tale'baka' kisare lakupake assua'-suara' siagang agang-agangku!

LUKAS 18:28

Akkanami Petrus nakana, “Kicini'mi anne ikambe! Nibokoimi ballatta, tu bai'-baineta siagang ana'-anatta, nakimminawang ri Katte!”

LUKAS 5:11

Nabeso'mi Simon siagang agang-aganna anjo biseanga mange ri biring tamparanga. Nampa nabokoi ngaseng anjo biseanga, namminawang ke'nanga ri Isa.

1 KORINTUS 1:29

Sollanna punna kamma anjo, tenamo manna sitau akkulle ampattampo-tampoangi kalenna ri dallekanNa Allata'ala.

1 KORINTUS 4:7

Inaika ampa'jariko malompoangang na tau maraenga? Sai yangaseng-ngasenna sangnging apa-apa nutarimaji battu ri Allata'ala. Jari angngapa nanuero' ampattampo-tampoangi kalennu, sangkamma le'ba' angkana anjo apa-apa niaka ri kau teai apa-apa nutarima?

PAOLE 33:9

Tamamminrayai ri Katte la'biangngang namaraengannaya, la'biangngang na tau toa siagang bija pammanakanna. Naturuki ke'nanga parenta-parentaTa, narupai ke'nanga parjanjianTa.

FILIPI 3:8

Teai sikammaya anjo bawang; mingka yangaseng-ngasenna kucini' a'jari karugiang ngaseng mami. Ia niaka ri nakke kamma-kamma anne lompoangangi anggaranna: iamintu kuassemmi Isa Almasi, Bataraku. Nasaba' Almasi, kubokoi ngasemmi anjo yangaseng-ngasenna. Yangasenna anjo kucini' loro mami, sollanna akkulle kugappa Almasi,