MARKUS 10:2 - KITTA' MATANGKASA'

² Nia'mo siapa are tu Farisi battu todong ero' ampa'boyangi kasalang Isa. Akkuta'nammi ke'nanga angkana, “Manuru' atoranga ri agamata, maka akkulleji taua antallaki bainenna?”

MARKUS 10:2 ပူးပေါင်းရင်းမြစ်များ

MALEAKHI 2:16

Nakana Karaeng Allata'alana Israel, “Kukabirisi nikanaya passitallakkang. Birisikka' punna nia' tau ri kau a'gau' palla' kamma anjo mae ri bainenna. Jari katutui kalennu siagang tea sikaliko amminrai pa'mai'nu mae ri bainennu.”

MATIUS 15:12

Battumi ana'-ana' gurunNa angkana, “Maka Kiassenji angkanaya kasi'rikangi anjo tu Farisia nalangngeretTa akkana kamma?”

MATIUS 16:1

Nia' siapa are tu Farisi siagang tu Saduki battu mae ri Isa ero' ampa'boyangi kodi. Napala'mi ke'nanga sollanna appa'nia' gau' malompo na Napa'butti Isa angkanaya ma'nassa battu tojengi ri Allata'ala.

MATIUS 19:3

Battumi tu Farisia ero' ampa'boyangi kasalang. Akkuta'nammi ke'nanga angkana, “Manuru' ri atorang agamata, maka akkulleji taua antallaki bainenna manna napassala' apa mamo?”

MATIUS 22:35

Nia'mo kalase'renna ke'nanga iamintu sitau guru agama, ero' ancoba-coba ampa'boyangi sala Isa. Nakuta'nammi Isa nakana,

MATIUS 23:13

Nakanamo pole Isa, “Cilaka ngaseng mako ikau guru-guru agamaya siagang tu Farisia, lanri nungaina assara-saraia. Ikau ngasemmi anrompai taua la'jari umma'Na Allata'ala. Ikau ngasenji tea a'jari umma'Na Allata'ala, nanurompai todong tau maraenga, eroka a'jari umma'Na Allata'ala. [

MATIUS 9:34

Mingka nakanamo tu Farisia, “Kakapalanaji anjo setanga assarei koasa nakkulle Nabongka assulu' anjo setanga.”

MARKUS 10:1

Nampa Nabokoi Isa anjo tampaka, Na'lampa mange ri daera Yudea, siagang ri daera ba'leanna Binanga Yordan. Battumi pole tau jaia a'lipung ri tammulilina Isa. Na kamma biasa, Naajara'mi Isa ke'nanga.

MARKUS 10:3

Appialimi Isa Nakana, “Apa naparentakangko Musa?”

MARKUS 8:11

Nia' siapa are tu Farisi battu mae ri Isa, nappakkaramulamo naagang a'gea' Isa, ero' ampa'boyangi kasalang. Nasuromi ke'nanga Isa appa'nia' gau' appakalannasa', a'jari pammatei ma'nassa battu tojengi ri Allata'ala.

MARKUS 8:15

Nakana Isa ri ke'nanga, “Tutuko ri pa'gambanna tu Farisia siagang pa'gambanna Herodes.”

LUKAS 11:39

Lanri kammana, Nakanamo Isa ri anjo tu Farisia, “Memang ikau tu Farisia, biasana nutangkasi bageang pantaranganna mangkoka siagang piringa; mingka bageang lalanganna sanna' ra'masa'na lanri tena nutangkasi. Kamma tomminjo sanrapanna bageang lalanganna kalennu, teai sipato' ra'masa'na napakamma sekke' siagang kaja'dallang.

LUKAS 16:14

Nalangngere' ngasengi tu Farisia sikamma Napaua Isa. Nikakkalimi Isa ri ke'nanga, lanri nangaina ke'nanga doeka.

LUKAS 5:30

Nia'mo siapa are tu Farisi siagang guru-guru agama tena nasannang nyawana anciniki ke'nanga. Nakanamo ke'nanga ri ana'-ana' gurunNa Isa, “Angngapa nusipangnganreang siagang sipangnginungang ngaseng siagang pasingara' simaya kammayatompa tau kodi sipaka?”

LUKAS 6:7

Nia' siapa are guru-guru agama siagang tu Farisi ero' amboyangi kasalang Isa, sollanna akkulle nituntu' Isa. Jari nacinikimi ke'nanga, maka laNaballei Isa anjo taua ri allo Pammari-marianga.

LUKAS 7:30

Mingka taerokai tu Farisia siagang guru-guru agamaya antarimai rancanaNa Allata'ala eroka ampasalamaki ke'nanga. Taerokai ke'nanga nije'ne' ri Yohanes.

YOHANES 11:47

Jari a'rappungammi tu Farisia, imang-imang kapalaya, kammayatompa haking-hakinga ri Pangadelang Agamaya. Nakanamo ke'nanga, “Apa musti nigaukang? Anjo taua jai sikali gau'-gau' appakalannasa' Nagaukang!

YOHANES 11:57

Nakkana kamma anjo ke'nanga, lanri le'ba'mi appasulu' parenta imang-imang kapalaya siagang tu Farisia, angkanaya, inai-nai anciniki pammantanganNa Isa musti napaui sollanna akkulle nijakkala' Isa.

YOHANES 7:32

Nalangngere'mi tu Farisia antekamma batena a'bici'-bici' anjo tau jaia ri passala'na Isa. Lanri kammana assama turu'mi ke'nanga siagang imang-imang kapalaya. Assama turu'mi ke'nanga assuroi pangawala'na Balla'Na Batara anjakkalaki Isa.

YOHANES 7:48

Niakka pamarentata yareka tu Farisi tappa' ri Ia?

YOHANES 8:6

Nakkuta'nang kamma ke'nanga, lanri eroki ke'nanga ampa'boyangi kasalang Isa sollanna akkulle ke'nanga assalakangi Isa. Mingka a'dunduji Isa, annulisi' siagang karemenNa naung ri buttaya.

1 KORINTUS 10:9

Takkulleaki' anso'ri Batara sangkamma nagaukanga ke'nanga riolo, sa'genna mate nitotto' ke'nanga ri ulara'.