LUKAS 9:5 - KITTA' MATANGKASA'

⁵ Siagang kere-kerekomae tanitarimaya, pabe'bese'mi limbu'bu' niaka ri pala' bangkennu punna nubokoi anjo kotaya, a'jari pappakainga' mae ri ke'nanga.”

LUKAS 9:5 ပူးပေါင်းရင်းမြစ်များ

NEHEMIA 5:13

Nampa kusungke kaeng passikko' ayakku nampa kupabe'bese' siagang kukana, “Kammaminne caraNa Allata'ala lampabe'besekko ikau tau tenaya nurupai janjinnu. Anjo taua lasurokaui tallasa'na, balla'na kammayatompa sikontu pa'barang-baranganna lanaallei Allata'ala!” Appialimi sikamma tau hadereka ri anjo passirapakkanga angkana, “Aming!” Nampa ammuji ke'nanga ri Batara. Jari narupaimi janjinna sikamma anjo pamimpinga.

MATIUS 10:18

Lanierangko mange andallekang ri pamarentaya siagang karaenga, passabakkang amminawannu ri Nakke. Mingka iaminjo wattua la'jari kasampatang ri kau untu' la'jari sa'bingKu ri dallekanna ke'nanga siagang tu tenayapa naassengi Allata'ala.

MARKUS 6:11

Mingka punna battuko ri se'reang tampa', na taeroka taua anjoreng antarimako siagang ampilangngeriko, bokoimi anjo tampaka. Siagang be'besangi limbu'bu niaka ri pala' bangkennu, a'jari pappakainga' mae ri ke'nanga!”

MARKUS 9:37

“Inai-nai antarimai ana'-ana' kammaya anne nasaba' iNakke, akkulle nikana iNakkemi natarima. Na inai-nai antarimA', teai Nakke bawang natarima, mingka akkulle nikana natarima tommi ManggeKu, assuroA'.”

LUKAS 10:16

Nampa Nakana Isa mae ri ana'-ana' gurunNa, “Inai-nai ampilangngeri kanannu, iNakke mintu napilangngeri. Inai-nai ansorongbokoko, iNakke mintu nasorongboko. Na inai-nai ansorongbokoA', nasorongboko tommi Allata'ala assuroA'.”

LUKAS 5:14

Napisangkaimi Isa anjo taua ancaritai anjo passalaka, manna pole ri nai. Nakanamo ri anjo taua, “A'lampamako mae ri imanga nampa nusuro amparessai kalennu. Nampa a'lampako mange assare koro'bang situru' napassuroanga Musa. Iaminjo a'jari butti ri taua angkanaya ma'nassa baji' mako ri garrinnu.”

LUKAS 9:4

Kere-kerekomae nitarima, ammantang mako anjoreng sa'genna nubokoi anjo kotaya.

LUKAS 9:48

Nampa Nakana ri ana'-ana' gurunNa, “Inai-nai antarimai anne anaka passabakkang iNakke, battuanna iNakkemi natarima. Na inai-nai antarimA', battuanna natarima tommi Allata'ala assuroA' battu. Nasaba' inai-nai kaminang tuna ri kau, iami kaminang la'biri'!”

LAMPA-LAMPANA 13:51

Napatu'du'mi nanapasulu' limbu'bu' niaka ri pa'lapa' bangkenna Paulus siagang Barnabas ri dallekanna ngaseng ke'nanga. Iaminjo a'jari pappakainga' mae ri ke'nanga. Le'baki anjo a'lampami Paulus siagang Barnabas mange ri Ikonium.

LAMPA-LAMPANA 18:6

Mingka lanri tuli nigeakkinna siagang tuli nicallana Paulus ri taua, napatu'du'mi bangkenna siagang napaba'basa'mi pakeanna sollanna a'lesang limbu'bu'na; iaminjo a'jari pammatei siagang pappakainga' ri kasalanna ngaseng ke'nanga. Nakanamo Paulus, “Punna cilakako, passala' kasalannu ngaseng tonji! Pantarang limangkuko! Pakkaramula ri kamma-kammaya anne la'lampa mangema' ri bansa-bansa maraenga.”