LUKAS 6:18 - KITTA' MATANGKASA'

¹⁸ Battumi ke'nanga ero' ampilangngeri kana-kananNa Isa, siagang ero' assuro ballei kalenna. Kammayatompa tau nasosoka setang nia' tommi battu, naniballei tommo, sa'genna baji' poleang.

LUKAS 6:18 ပူးပေါင်းရင်းမြစ်များ

MATIUS 15:22

Nia'mo sitau baine tu Kanaan niaka anjoreng ri daeraya battu mae ri Isa akkiok-kio' angkana, “O Ana'na Daud, Kikamaseanga'! Napantamakki setang ana' baineku. Sanna' dudumi sessana!”

MATIUS 17:15

Angkanami anjo taua, “O Bapa', Kikamaseang laloi anakku. Natabai garring mate-mate jangang. Nateai sipato' sanna'na garrinna. Pammate sanna'na garrinna sa'genna biasai tu'guru' antama' ri pepeka yareka antama' ri je'neka.

LUKAS 6:17

Le'baki anjo naummi Isa siagang tunisuroNa battu ri anjo bontoa, nampa ammantang ri se'reang parang lapparaka. Jai anjoreng ana'-ana' gurunNa maraenga, kammayatompa jai tommi tau battu a'rappungang, battu ri kere-keremae: tu battu ri sikontu pa'rasangang Yudea, Yerusalem, kota-kota Tirus, siagang Sidon kota anjorenga ri biring tamparanga.

LUKAS 6:19

Ero' ngasemmi taua anseroi Isa, nasaba' nia'na koasa assulu' battu ri KalenNa, akkullea amballei garrinna ke'nanga.

LAMPA-LAMPANA 5:16

Teaimi sipato' jaina tau a'lipung-lipung battu, iamintu tu battua ri kota-kota niaka a'reppese' ri Yerusalem. Massing naerammi tau garrinna ke'nanga, yareka tau nasosoka setang. Naniballei ngasemmo anjo taua, sa'genna a'jari baji' silalonna.