KOLOSE 2:15 - KITTA' MATANGKASA'

¹⁵ Anjoremmi ri kayu salli'Na Almasi Napatundu' ngaseng sikontu roh-roh ammarentaya siagang niaka koasana. Lanipareki paccini'-cinikang ke'nanga ri dallekanna tau jaia ri wattunna nire'resang a'jari tu nitahang ke'nanga ri Almasi lalang ri barisang passua'-suarrang pammetanNa.

KOLOSE 2:15 ပူးပေါင်းရင်းမြစ်များ

PA'JARIANG 3:15

Lasikabirisiko siagang anne bainea. Sossorannu siagang sossoranna latuli simusui. Laniancuruki ulunnu ri sossoranna, nalanukokko' kacunu'na ke'nanga.”

PAMMUJI 68:18

Appulo sa'bu kareta kassa' Napake ammumba Allata'ala siagang sanna' mala'biri'Na ri alla'na ke'nanga.

YESAYA 53:12

Rellai ampassareangi katallassanna nantama' ri bilanna tau ja'dalaka. Natanggongi dosana tau jaia nappala' doang sollanna nipammopporang ke'nanga. Jari Kusaremi tau jai a'jari hadia, siagang para anggappami bageang siagang sikamma tau annabaya.”

MATIUS 12:29

Antekamma lakkulle antama' taua ri se'reang balla', angngalle passai barang-baranna punna tau gassing patanna balla'? Mattantu nasikkoki rolong anjo tau gassinga, patannaya balla'. Punna le'ba'mo nasikkokang anjo patannaya balla', nampami akkulle naalle passa barang-baranna.

LUKAS 10:18

Appialimi Isa Nakana, “Kucini'mi Billisika tu'guru' battu rate ri langika sangkamma kila'.

LUKAS 11:22

Mingka punna nia' tau kassakkangang battu angngewai siagang ambetai, lanialleang ngasemmi anjo sanjata napattoanga, nampa nialle passa ngaseng todong nampa nipa'bage-bageang pa'barang-baranganna.

YOHANES 16:11

kammayatompa appakkaramulami Allata'ala angngadeli, nasaba' Nahukkummi tau anna'galaka koasa ri anne linoa.

YOHANES 19:30

Nalepa'mi Isa anjo anggoroka nampa Nakana, “Le'ba'mi!” Nampa a'dundu Isa, natappu'mo nyawaNa.

1 KORINTUS 15:24

Le'baki anjo battumi kiamaka. Anjo wattua Napasomba ngasemmi Almasi sikontu pamarentahanga, sikontu kakoasanga, kammayatompa sikontu apa-apa magassinga; nampa Napassareang kakoasanNa salaku Karaeng, mae ri Allata'ala, Manggeta.

2 KORINTUS 2:14

Mingka appala' sukkurukki' mae ri Allata'ala! Lanri Iami tuli ampimpingi ikambe amminawang lalang ri barrisi' passua'-suarrang pammetanNa Almasi lanri asse'rena ikambe mae ri Ia. Nipakemi ikambe ri Allata'ala ampa'la'bangi biritta ri passala'na Almasi, sanrapang bau' a'la'banga rasanna ri kere-keremae.

2 KORINTUS 4:4

Barhala ja'dala' niaka ri lino antongkoki pikkiranna tau tenaya natappa' ri anjo Kabara' Bajika. Iaminjo barhalaya anrompa-rompai ke'nanga sollanna tanacinika singara' battua ri anjo Kabara' Bajika, ri sese kalompoanNa Almasi, a'jaria pammatei rupanNa Allata'ala.

EFESUS 3:10

PattujunNa Allata'ala iamintu sollanna tete ri jama'aka kamma-kamma anne, akkullemi naasseng sikontu tau anna'galaka koasa ri lino, antekamma pangngassenganNa Allata'ala ilalang sikontu apa Nagaukanga.

EFESUS 4:8

Nia' tattulisi' lalang ri Kittaka angkanaya, “Ri wattunNa nai' ri tampa' kaminang tinggia, jai Naerang tu nitahang; nampa jai passare Napassareang mae ri rupataua.”

EFESUS 6:12

Nasaba' teai rupataua bawang laniewa, passangalinna kagassinganna pole setang-setang makoasaya ri anne jammang ja'dalaka. Ia laniewaya iamintu kagassinganna pole roh-roh ja'dalaka, makoasaya todong ilalang ri anne linoa.

KOLOSE 1:16

Nasaba' tete ri Iami Napa'jari Allata'ala sikontu apa-apa niaka ri suruga siagang irate ri linoa, sikontu apa-apa kacinikanga siagang tenaya nakacinikang; kammayatompa pole sikontu roh niaka koasana siagang ammarentaya. Sikontu anne linoa nipa'jari tete ri Almasi, siagang untu' Almasi.

KOLOSE 2:10

Na lanri asse'renamo katallassannu siagang Almasi, nisare tommako katallassang sukkuka. Nasaba' Almasi a'jari kapala mae ri sikontu roh-roh makoasaya siagang ammarentaya.

IBRANI 2:14

Nasaba' anjo sikamma tau Nakanaya ana', iamintu tau akkullea mate, napa'jarimi KalenNa Isa sangkamma kalenna ke'nanga, siagang attallasa'mi sangkamma rupataua. Kammami anjo Nagaukanga, sollanna lanri kamateanNa nakkullemo Nabeta sa'genna posso' Billisika, iamintu makoasaya ri kamateanga.

PAPPICINI' 12:9

Nipela'mi anjo naga lompoa assulukang! Iami anjo ulara' toaya niarenga Billisi' yareka Roh Ja'dalaka, antipuai sikontu linoa. Nipela'mi naung ri linoa siagang sikontu malaeka'na.

PAPPICINI' 20:10

Nampa nipasambila anjo Billisi' antipuai ke'nanga antama' ri tamparang pepeka siagang bara a'rinraya. Anjoremmi rolong nipela' anjo olo'-oloka siagang na'bi takontutojenga. Tammari-mariai ke'nanga lanisessa allo bangngi sa'genna satunggu-tungguna.