KOLOSE 1:28 - KITTA' MATANGKASA'

²⁸ Iaminjo Almasi nabirittakanga ikambe mae ri sikontu rupataua. Kipakainga'mi siagang kiajara' ngasemmi ke'nanga siagang baji'-baji'. Pattujunna ikambe iamintu sollanna akkulle ngaseng nierang rupataua mae ri Allata'ala, salaku tau baji'mo katallassang rohanina, lanri asse'renamo siagang Almasi.

KOLOSE 1:28 ပူးပေါင်းရင်းမြစ်များ

EZRA 7:25

Sari'battang Ezra, pa'matu-matui kacara'dekang Napassareanga Allata'ala mae ri kau, siagang angngangkakko siapa are pamimping siagang haking-haking untu' ammarenta ri sikontu taua ri propinsi Efrat bageang ilau', ia attallasaka situru' HukkunNa Allata'alanu. Parallui nupangngajarrang anjo hukkunga mae ri sikontu tau tenayapa naassengi.

PANGNGEBARANG 8:5

Ikau tenayapa pangalamannu, appilajarakko ampatangi pikkirang taranga; ikau toloa, appilajarakko a'jari insa'.

KATO'BA 12:9

Anjo lapung Tau Assarea Pangngajarang bajiki akkala'na siagang cara'deki. Lanri kammana anjo napangngajarrangi anjo pangngassenganna mae ri rupataua. Jai pangngebarang napappilajari nampa nauji katojenganna.

YEREMIA 3:15

LaKusareko pamimping-pamimping mannurukia ri Nakke. Lanapimpingko ke'nanga siagang baji' kammayatompa mapahang bajika.

YEREMIA 6:10

Appialia' angkana, “Batara, inai musti kupa'bicarai, siagang inai musti kupappakaingakki? Kapala batui ke'nanga siagang taerokai mappilangngeri. Nakakkali siagang nakabirisi ke'nanga pasanTa kupabattua mae ri ke'nanga.

YEHEZKIEL 7:10

Battumi allo angngeranga bala mae ri Israel. Kajariammi ri kemae-kemae gau' pallaka. Katampoanga narapi'mi pamangeanna.

MATIUS 28:20

Ajaraki ke'nanga anggaukangi sikontu le'baka Kupassuroang ri kau ngaseng. Na u'rangimi angkanaya laniakKa' anrurungangko sa'genna kala'busang jammanga.”

MATIUS 3:7

Jai tommi tu Farisi siagang tu Saduki battu mae ri Yohanes, ero' assuro je'neki kalenna. Mingka nacini'na Yohanes battu todong ke'nanga, nakanamo ri ke'nanga, “Ikau ngaseng tu ja'dalaka! Inai ampauangko angkanaya akkullei nuliliang hukkunganNa Allata'ala, labattua sallang mae ri kau?

MATIUS 5:48

Ia Allata'ala Manggenu ri suruga sukku' Nakamaseangi sikontu rupataua. Jari parallui nukamaseang todong parannu tau.”

MARKUS 6:34

Wattunna naung Isa battu ri biseanga, Nacini'mi anjo tau jaia. Tu'guru'mi pangngamaseanNa anciniki ke'nanga, lanri sanrapangi ke'nanga gimbala' tenaya pakalawakinna. Jari appakkaramulami Naajara' ke'nanga a'rupa-rupa pangngajarang.

LUKAS 21:15

INakke lassareko kacara'dekang siagang kana-kana lanupaua. Sa'genna manna sitau ri musu-musunnu takkulle ambeta kanako yareka ampassalai apa-apa nupaua.

LAMPA-LAMPANA 10:36

Nuasseng ngasemmi bonena kabara' Napabattua Allata'ala mae ri bansa Israel. Anjo kabaraka, iamintu ri passala'na Kabara' Baji' passiamakkang lalang ri KalenNa Isa Almasi iamintu Batara mae ri sikontu rupataua.

LAMPA-LAMPANA 11:20

Mingka nia' todong anjo tau tappaka, iamintu tu battua ri Siprus siagang Kirene, a'lampa mange ri Antiokhia. Na iaminne ke'nanga ampabattui tongi Kabara' Bajika ri passala'na Isa mae ri tu tenayapa nantama' agama Yahudi.

LAMPA-LAMPANA 13:38

Lanri kammana minjo sari'battangku ngaseng, musti nuasseng ngasengi angkanaya ilalang arenNa minjo Isa nanipabattumo anjo kabara' nipammopporanna dosaya mae ri kau ngaseng; musti nuassengi angkanaya inai-nai tappa' ri Ia, lanipata'lappasaki battu ri sikontu dosaya, tenaya nakkulle nipata'lappasa' lanri sikamma parentaNa Allata'ala napassareanga Musa.

LAMPA-LAMPANA 17:18

Assigea'mi Paulus siagang guru-guru battua ri golongang Epikuros siagang golongang battua ri Stoa. Nia' siapa are maraeng ri ke'nanga angkana, “Apa todong naasseng anne taua? Sike'de' duduji pangngissenganna mingka teai sipato' jaina bicaranna!” Nia' todong siapa are tau angkana, “Kamma nicini' rewata-rewata bansa maraeng nakabarrang.” Akkana kammai anjo ke'nanga, lanri passala'Na Isa siagang passala' attallasa'Na ammotere' Isa battu ri kamateanga nabicara Paulus mae ri ke'nanga.

LAMPA-LAMPANA 17:3

Situru' apa niaka tattulisi' lalang ri Kittaka, napakasingara'mi siagang napa'buttimi Paulus angkanaya parallui Nakasia' sessaya siagang ambangung poleang battu ri kamateanga anjo Karaeng Mappasalama' Napa'janjianga Allata'ala. Nakana Paulus, “Anjo Isa, kukabarranga mae ri kau ngaseng, Iami Karaeng Mappasalama' le'baka Napa'janjiang Allata'ala.”

LAMPA-LAMPANA 20:31

Lanri kammana, paralluko a'jaga-jaga! U'rangi angkanaya tallun taungi salloku tammari-maria angngajarakko allo bangngi, siagang jaimi je'ne' matangku ammatti' lalang kugaukanna anjo jama-jamanga.

LAMPA-LAMPANA 3:20

Labattui Batara mae ri kau nalanukasia' kasannangang pa'maika. Siagang lanisuroi Isa ri Batara battu mae ri kau, nasaba' Iami le'ba' Napattantu Allata'ala a'jari Karaeng Mappasalama'nu.

LAMPA-LAMPANA 5:42

Na allo-allonamo angngajara' ke'nanga ri Balla'Na Batara siagang ri balla'na ngaseng taua. Tuli napabattumi ke'nanga Kabara' Bajika lalang arenNa Isa, angkanaya Iami anjo Karaeng Mappasalama' le'baka nipa'janjiang.

LAMPA-LAMPANA 8:35

Appakkaramulami Filipus a'bicara. Napakemi anjo aya'-ayaka appakkaramula ancaritai Kabara' Bajika ri passala'na Isa Almasi, mae ri anjo pagawe tinggia.

LAMPA-LAMPANA 8:5

A'lampami Filipus mange ri kota Samaria na napabattu passala'na anjo Karaeng Mappasalama' Napa'janjianga Allata'ala, mae ri tau niaka anjoreng ri Samaria.

LAMPA-LAMPANA 9:20

A'lampami mange ri sikamma balla' sambayanga, nappakkaramulamo ampabattui angkanaya, iaminjo Isa Ana'Na Allata'ala.

ROMA 16:25

Nipujimi Allata'ala! Makoasai anjarreki tappa'nu, situru' Kabara' Baji' battua ri Allata'ala, iamintu ri passala'na Isa Almasi, le'baka kubirittakang. Kubirittakangi anjo passalaka situru' apa Napa'nyataya Allata'ala; iamintu ri sesena rancanaNa Allata'ala, a'bilangngang taungamo tanaassenga taua.

1 KORINTUS 1:23

Mingka ikatte anne iaji bawang nibirittakang iamintu biritta ri passala'na Isa Almasi le'baka mate ri kayu sallika. Anjo birittaya napakanassui pa'mai'na tu Yahudia, siagang nicini' a'balle-ballei ri bansa-bansa maraenga. Na bansa maraenga nakanai kadongokang anjo kammaya.

1 KORINTUS 1:30

KalenNa Allata'ala ampasse'rei katallassannu siagang Isa Almasi. Tete ri Isa Almasi nanipa'jariki' cara'de'. Siagang tete ri Iatommi naNapasibajiki maki' Allata'ala mae ri KalenNa, iamintu Napa'jari maki' umma'Na, kammayatompa Napa'jari bebasa' maki'.

1 KORINTUS 12:8

Nia' tau nisare ri RohNa Allata'ala pakkulle a'bicara sa'genna lompo pangaruna. Maraenganga nia' nisare kacara'dekang untu' ampakasingaraki biritta battua ri Allata'ala; naia tonji anjo Roh se'rea assarei kacara'dekang.

1 KORINTUS 15:12

Punna le'ba'mi nabirittakang ikambe angkanaya le'ba'mi attallasa' poleang ammotere' battu ri kamateanga Almasi, angngapa nania' tu battu ri kau angkana tena nalanipattallasa' poleang ammotere' tau matea?

1 KORINTUS 2:15

Inai-nai nikoasai ri RohNa Allata'ala, akkulle ngasengi napahang sikontu apa-apaya; mingka kalenna anjo taua manna sitau tania' akkulle ampahangi.

1 KORINTUS 2:6

Mingka manna nakamma, kupake tonji pangngassenganga ampabattui anjo birittaya mae ri tau rapang ti'nokamo katallassang rohanina. Mingka anjo pangngassenganga teai pangngassengang battu ri lino, yareka pangngassengang battu ri sikamma tau anna'galaka koasa ri anne jammanga, ia lalanynyaka sallang kakoasanna.

1 KORINTUS 4:14

Teai lanri erokku ampakasirikko nakutulisi' anne kammaya mae ri kau, mingka lanri erokku ampakaingakko sangkamma ana'-ana' kalengku.

2 KORINTUS 10:14

Jari, ri wattunna battu ikambe angkunjungiko angngerang Kabara' Baji' ri sesena Almasi, sitojenna tena nakiassulu' battu ri daera panjama-jamanna ikambe.

2 KORINTUS 11:2

Nakkuka' mae ri kau ngaseng, sangkamma KalenNa Allata'ala nakku' tongi mae ri kau ngaseng. Sanrapangko se're tulolo, le'bakamo kujanji lakupa'nikka siagang sitau bura'ne, iamintu Almasi.

2 KORINTUS 4:5

Anjo biritta napabattua ikambe teai biritta ri sesena ikambe. Anjo birittaya, biritta ri sesena Isa Almasi, angkanaya Iami Batara; na ikambemi anne a'jari atannu ngaseng lanri Isa.

EFESUS 3:8

Ri sikontu umma'Na Allata'ala, inakkemi anne kaminang tuna. Mingka Nasarema' Allata'ala anne pangngamaseanga: Iamintu jama-jamang untu' ambirittakangi mae ri bansa-bansa maraenga Kabara' Bajika, iamintu kakalumanynyanganNa Almasi tenaya la'busu'na;

EFESUS 5:27

Battu ri kammanami anjo naNapaenteng baji'mo siagang matangkasa'mo anjo jama'aka ri dallekanNa, tena sikali panra'na yareka tena sikali callanna manna sike'de'.

PAOLE 4:5

Sikontu anjo hukkunga kupangngajarrangi mae ri kau situru' Naparentakanga Karaeng Allata'alaku. Turuki ngasengi sikammaya anjo ri pa'rasangang lanupantamakkia siagang lanupammantangngia.

KOLOSE 1:22

Mingka kamma-kamma anne, Napa'jari baji'mi ammotere' passisambungannu siagang KalenNa, lanri kamateanNa Ana'Na. Kammami anjo carana nukkulle nierang mange andallekang siagang malanynying, matangkasa' siagang tena callanu ri dallekanNa Allata'ala.

KOLOSE 2:10

Na lanri asse'renamo katallassannu siagang Almasi, nisare tommako katallassang sukkuka. Nasaba' Almasi a'jari kapala mae ri sikontu roh-roh makoasaya siagang ammarentaya.

KOLOSE 2:3

Almasimi ampa'nyatai sikontu apa-apa tenayapa niassengi battu ri kacara'dekanNa siagang pangngassenganNa Allata'ala, ia taccokkoa riolo.

KOLOSE 3:16

Parallui antama' ri atinnu ajarang-ajaranNa Almasi rassia barakka'. Paralluko massing siajara' siagang sipakainga' baji'-baji'. Kelongangi kelong-kelonga siagang pammuji-mujia kammayatompa lagu-lagu rohania; sukkurukko lalang ri atinnu nukkelong-kelong untu' Allata'ala.

KOLOSE 4:12

Sallang battu ri Epafras. Anne Epafras tau battu antureng tonji. Pajama-jamaNa tongi Isa Almasi, tenaya lanrena tuli ampappala' doangangko. Sanna' napala'na mae ri Allata'ala, sollanna pila' jarre' tappa'nu siagang a'jari toa tojeng pikkirang rohaninu; sollannu a'jari sukku' mannurukinnu mae ri ero'Na Allata'ala.

1 TESALONIKA 4:6

Ri anne passalaka, tea' laloko niakki appanggaukang sala yareka annipu mae ri sari'battanna. Pirangalloang le'ba'mi napau sitojeng-tojenna ikambe mae ri kau ngaseng angkanaya laNahukkungi Batara sikontu tau anggaukangai kasalang kammaya anjo.

1 TIMOTIUS 3:16

Tena manna sitau akkulle ansassali, antekamma lompona rahasiana agamata, angkanaya: Napa'nyatai KalenNa lalang tubuna rupataua, na nipa'nyata katojenganNa ri RohNa Allata'ala siagang nicini' ri sikamma malaekaka. Nipakkiokkammi birittana mae ri sikamma bansa-bansaya, na nipatappa' ri sikontu linoa siagang niangka' nai' ri suruga.

1 TIMOTIUS 3:2

Se'rea pamimping jama'ah, musti tau tena callanna, se'reji bainenna, naassengi napakalewa kalenna, annabai siagang angngassengi atorang; nangai annarimaya tau ri balla'na, akkullei angngajaraki taua;

IBRANI 10:14

Jari, tete ri se'rea koro'bang, Napasukku'mi Almasi matangkasa'na sikamma taua battu ri dosaya.

IBRANI 13:21

Poro Allata'ala, iamintu kabattuanna barakka' kasalewanganga ampassukku' ngasengko siagang sikontu apa-apa baji', nuparalluanga untu' anggaukangi ero'Na. Poro tete ri Isa Almasi, naNagaukang Allata'ala lalang ri kalenta apa Nakaerokia. Poro tuli nipuji-puji Almasi sa'genna satunggu-tungguna! Aming.

2 PETRUS 3:15

Pakemi anjo kasa'barranNa Batara a'jari kasampatang Napassareang mae ri kau sollannu akkulle salama'. Kamma tomminjo le'baka napau Paulus lalang sura'na mae ri kau. Pangngajara' battu ri Allata'ala nanatulisi' Paulus anjo kana kammaya mae ri kau.