KELONG MALA'BIRI' 6:10 - KITTA' MATANGKASA'

¹⁰ Inaika anjo battu mae, rapang allo ammumbaya, sangga'ga bulang cora, singara' kamma allo? Sanna' angngallena pa'mai', rapang tantara siagang bandera-banderana.

KELONG MALA'BIRI' 6:10 ပူးပေါင်းရင်းမြစ်များ

2 SAMUEL 23:4

rapangi caya singara' ammumbaya ri bari'basa' dudua wattu singara'na langika. Rapangi singara'na alloa ri wattu le'ba'na bosi ampaccillaki ruku' moncongbuloa ga'ga nicini'.”

AYUB 11:17

Lasingarangngammi tallasa'nu na singara'na alloa, na wattu-wattu sassanga lalang tallasa'nu lasingara' kammami singara' bari'basaka.

AYUB 31:26

Tale'bakai kusomba allo singaraka sioro'na yareka bulang ga'gaya cayana.

PAMMUJI 14:5

Tau ja'dalaka lasanna' malla'na, saba' Nala'langi Allata'ala tu mannurukia ri Ia.

PANGNGEBARANG 4:18

Oloanna tau ja'dalaka sassangi sangkamma sassanna bangngia. Tatto'roi siagang tu'guruki ke'nanga natanaassenga kalenna. Mingka, oloanna naoloa tau bajika sanrapangi pammumbana alloa, pila' sallo pila' singaraki, sa'genna kala'busanna a'jari singara' sikali.

KELONG MALA'BIRI' 1:15

Teai sipato' ga'ganu, sayang, tojeng tamaka ga'ganu! Matannu, rapangi mata bodobangkeng.

KELONG MALA'BIRI' 3:6

Apa kutadeng anjo niaka battu ri parang lompoa, sangkamma umbu a'rumbua? Bau'na sangkammai muru' siagang kamanynyang, siagang ba'ra' battua ri padangganga.

KELONG MALA'BIRI' 6:4

Ikau ga'ga, sayangku, sangga'ga kota Yerusalem, sambaji' kota Tirzah. Sanna' angngallenu pa'mai', rapang tantara siagang bandera-banderana.

KELONG MALA'BIRI' 8:5

Inaika anjo, niaka battu ri parang lompoa ammanjeng ri tanrinna? Kupabangungko irawanganna poko' appele', tampa'nu nitianangngang siagang nilassukang.

YESAYA 58:8

Na lammumbamo singaraka mae ri kau rapang ammumbana alloa, siagang lammollemi linta' sikamma bokka'nu. LaKururungangko untu' ampasalamakko. LahaderekKa' untu' anjagaiko battu ri tammulilinu.

YESAYA 63:1

“Inaika anjo niaka battu ri Bozra ri Edom? ejai bajunna, pakeanna accayai; teai sipato' gammara'na batena a'jappa.” “INakkemi Batara akkullea appasalama' siagang battua angngerang kabara' pammetang.”

HOSEA 6:5

Lanri kammana anjo Kusuromi battu na'bi-na'biKu untu' ampabattui mae ri kau kaputusangKu angkanaya musti nihukkung ngasengko siagang nipanrakiko. Apa Kukaerokia battu ri kau ngaseng a'nassami siagang singara'mi:

MALEAKHI 4:2

Mingka ikau tau mannurukia ri Nakke, lammumbai koasangKu mappasalamaka rapang mataallo, nasioro'na angngerangi pappakamolle ri garring. Lata'lappasakko siagang larannuko rapang ana' sapi beru assuluka battu ri barana.

MATIUS 13:43

Na sikontu tau anggaukangai ero'Na Allata'ala laccayami sanrapang mataalloa lalang ri Lino BeruNa Allata'ala, a'jaria Manggena ke'nanga. Jari, punna nia' tolinnu, pilangngerimi baji'-baji'!”

MATIUS 17:2

Anjoreng, ti'ring tappinrami rupanNa Isa ri dallekanna ke'nanga: a'jari singaraki nicini' rupanNa kamma matanna alloa. Kammayatompa accillaki pakeanNa lanri kebo'na.

ROMA 8:37

Tena! Ba'lalo lalang ri sikammaya ngaseng anjo anggappa maki' pammetang tojeng-tojenga lanri Ia mangngamaseanga mae ri katte ngaseng!

EFESUS 5:27

Battu ri kammanami anjo naNapaenteng baji'mo siagang matangkasa'mo anjo jama'aka ri dallekanNa, tena sikali panra'na yareka tena sikali callanna manna sike'de'.

PAPPICINI' 1:16

Lima kananNa anna'galaki tuju bintoeng, na battu ri bawaNa nia' assulu' pa'dang sannaka taranna, siagang tarang pimbali-balia. RupanNa accayai sangkamma matanna alloa ri wattu tangngana alloa.

PAPPICINI' 10:1

Nampa nia' kucini' malaeka' maraeng sannaka gammara'na naung battu ri suruga. Nikalimbuki ri rammang, siagang nia' tarawe takkalu' ri ulunna. Accayai rupanna sangkamma mataallo, na bangkenna sangkammai benteng pepe'.

PAPPICINI' 12:1

Nampa nia' nicini' ri langika apa-apa sannaka appakalannasa'na. Nia' sitau baine ammakeang mataallo ammenteng irate ri bulanga. Ri ulunna nia' songko' niaka bintoenna sampulo anrua.

PAPPICINI' 21:23

Tena naparallu nasiori mataallo yareka bulang anjo kotaya, lanri nisiorimi ri kala'biranNa Allata'ala, siagang Iaminjo Ana' Gimbalaka a'jari lampunna.

PAPPICINI' 22:16

“INakke Isa, Kusuromi malaekakKu mae ri kau ngaseng sollanna napau ngaseng anne passalaka untu' kasalamakkanna sikontu jama'aka. INakkemi sossoranna Daud; iNakkemi anjo bintoeng singaraka, niaka battu raya.”

PAPPICINI' 22:5

Tenamo nalaparallu ke'nanga ri lampu yareka ri singara'na mataalloa, nasaba' latenamo bangngi kammayatompa nasaba' KalenNami Karaeng Allata'ala lansingari ke'nanga. Nalammarentamo ke'nanga, a'jari karaeng sa'genna satunggu-tungguna.