KALAPPASSANG 6:7 - KITTA' MATANGKASA'

⁷ LaKuerangko mange ri pa'rasangang Kupa'janjianga ammake sumpa mae ri Abraham, Ishak siagang Yakub; Kupassareangi anjo buttaya mae ri kau a'jari ikau ampatangi. INakkemi Batara.”

KALAPPASSANG 6:7 ပူးပေါင်းရင်းမြစ်များ

PA'JARIANG 26:3

Inakke lanjagaiko siagang lambarakkakiko. Sikontu anne daeraya laKupassareangi mae ri kau, siagang mae ri turungannu. LaKurupai janjingKu, ia le'baka Kupau mae ri Abraham manggenu.

PA'JARIANG 28:13

Na ri sa'rinna ammentemmi Batara siagang Nakana, “INakkemi Batara, Allata'ala napakalompoa Abraham siagang Ishak. LaKupassareangi mae ri kau siagang mae ri turungannu anne butta nupanra'baia.

1 KARAENG-KARAENG 20:28

Nampa nia'mo sitau na'bi battu mae ri Karaeng Ahab siagang angkana, “Iaminne Nakananga Batara: ‘Lanri anjo tu Siria nakanangi ri daera pa'moncongangi bawang jari kakoasangKu na tena ri lappara' rawaya, laKusareko pammetang mae ri anjo tantarana ke'nanga, sannaka ta'liwa'na jaina. Ikau siagang ra'ya'nu lanuassengi angkanaya iNakkemi Batara.’ ”

1 KARAENG-KARAENG 8:60

Lanri kammana, sikontu bansaya ri lino lanaassemmi angkanaya Iaji bawang Batara, Allata'ala, tena maraenganna.

NEHEMIA 1:10

O, Batara, ikambe anne ata-atanTa, umma' kalenTa le'baka Kipasalama' lalang koasaTa siagang kahebakkanna kagassinganTa.

PAMMUJI 100:3

U'rangi angkanaya anjo Karaeng Allata'ala. Ia ampa'jariki' siagang Ia ampatangki'; ikatte umma'Na, bansa Naparakaia.

PAMMUJI 81:6

Napa'jari se're katantuang mae ri bansa Israel, ri wattunna maju angngewai Mesir. Allangngereka' bicara tenaya nakuassengi, angkana,

KALAPPASSANG 13:14

Punna ri bokoang allo nakkuta'nang ana'nu angkana apa ngaseng battuanna anjo sikammaya, musti appialiko angkana, ‘Lalang koasa malompoNa Batara na Naerang maki' assulu' battu ri pa'rasangang Mesir, tampatta nipare' ata.

KALAPPASSANG 13:3

Nakanamo Musa mae ri bansa Israel, “Anne alloa Nalappassang mako Batara lalang koasa malompoNa, sa'genna akkulle mako assulu' battu ri Mesir, tampa'nu nipare' ata. Lanri kammana anjo, pakalompomi anne alloa. Teako angnganrei roti ammakea pa'gambang.

KALAPPASSANG 14:18

Lanaassengi tu Mesir angkanaya iNakke Batara.”

KALAPPASSANG 14:4

LaKupa'jari kapala batui anjo karaenga sa'genna amminawang angngondangko. Mingka laKupappicinikangi kakoasangKu mae ri anjo karaenga siagang tantarana, na lanaasseng ke'nanga angkanaya iNakkemi Batara.” Nampa nagaukammo tu Israel situru' anjo apa Naparentakanga Batara mae ri ke'nanga.

KALAPPASSANG 15:16

Tamaka malla'na ke'nanga ansa'bikangi kagassinganNa Batara. Ammalona ummatTa, takkulleai musua antahangi; ta'lappasa'mi bansa le'baka Kilappassang.

KALAPPASSANG 15:2

Batara angngalleia', Ia makkassa'; Iami ampasalamakka'. Ia Allata'alaku, erokka' mammuji mae ri Ia, Allata'alana boe-boeku, kupakkelongangi kala'biranNa.

KALAPPASSANG 16:12

“Kulangngereki pa'moro-morona ke'nanga tu Israel. Pauammi ke'nanga angkana punna karueng langgappami ke'nanga dageng, siagang punna bari'basa' langnganrei ke'nanga roti sa'genna bassoro'. Jari lanaassemmi ke'nanga angkanaya iNakkemi Batara, Allata'alana ke'nanga.”

KALAPPASSANG 16:6

Jari nakanamo Musa siagang Harun mae ri sikontu tu Israel, “Anne karuenga lanuassengi angkanaya KalenNa Batara angngerangko assulu' battu ri Mesir.

KALAPPASSANG 2:11

Wattunna lompomo Musa, a'lampai mange angngagangi sicini' tu a'julu bansana. Nacini'mi antekamma batena nipassa ke'nanga anggaukangi jama-jamang battalaka. Nacini' tommi nia' sitau tu Mesir ammuno sitau tu Ibrani.

KALAPPASSANG 6:6

LaKupa'jariko ummakKu, siagang iNakke a'jari Allata'alanu. Na lanuassemmo angkanaya iNakkemi anne Batara, Allata'alanu, le'baka allappassangko battu ri Mesir, ampare' atayako.

KALAPPASSANG 7:17

Lanri kammana anjo, kammaminne kananNa Batara, ‘Battu ri apa Kugaukanga sallang, lanuassemmi angkanaya iNakkemi Batara.’ Anne takkanga laKupake antunrungi rateanna je'neka ri binangaya, nampa tappinra je'ne'na a'jari cera'.

YESAYA 41:20

Na sikontu taua lanaciniki siagang lanaassengi angkana iNakke, Batara, anggaukangi anjo. Lanaparhatikangi siagang lanapahangi ke'nanga, Allata'ala matangkasa'na Israel ampa'jari anjo kammaya.”

YESAYA 49:23

Sikamma karaenga larapangi mangge mae ri kau, na sikamma karaeng bainea a'jari amma' mae ri kau. La'su'juki ke'nanga ampakalompoko siagang napakatuna kalenna mae ri kau. Na lanuassemmo angkanaya iNakke anne Batara; tau manrannuanga ri Nakke tena nala'ba pa'mai'na.”

YESAYA 49:26

LaKupa'jari sikamma musunnu palla' ero' ammuno, sa'genna para ia sibuno-buno. Nalanaasseng sikontu umma' rupataua, angkanaya iNakke, Batara, Mappasalama'nu; Kaminang Kassaka, Allata'alana Yakub, Mappasulu'nu.”

YESAYA 51:15

Saba' iNakkemi Karaeng Allata'alanu, ampa'jalloki tamparanga siagang ampamarrungi bombanna. Kaminang Makoasaya, iaminjo arengKu.

YESAYA 60:16

Laniparakaiko ri bansa-bansaya siagang sikamma karaenga, rapang sitau amma' amparakai ana'na. Nanuassemmo angkana iNakke Batara, Mappasalama'nu, angkanaya Allata'alana Israel makassaka allappassangko.

YESAYA 63:8

Nakana Batara, “Tojeng, anjo ke'nanga ummakKu, ana'-ana' tenaya nappakala'ba pa'mai'.” Na Ia a'jari Mappasalama'na ke'nanga,

YEREMIA 31:33

Iaminne parjanjiang beru laKupareka siagang umma' Israel: Hukkung-hukkungKu laKuboliki ri ati mailalanna ke'nanga, Kutulisiki ri pa'mai'na ke'nanga. INakke la'jari Allata'alana ke'nanga, siagang ke'nanga la'jari ummakKu.

YEHEZKIEL 20:19

INakkemi Karaeng Allata'alanu. Turuki hukkung-hukkungKu siagang parenta-parentaKu.

HOSEA 1:10

Bansa Israel la'jari sanrapangi kassika ri tamparanga jaina, sa'genna takkullea nibaku' yareka nirekeng. Kamma-kamma anne Nakana Allata'ala ri ke'nanga, “Ikau teaiko ummakKu,” mingka lanarapiki sallang wattunna nalaNakana ri ke'nanga, “INakkemi Allata'ala mattallasaka siagang ikaumi ana'-anakKu!”

KAIMANGNGANG 11:44

INakke Karaeng Allata'alanu, lanri kammana anjo jagai kalennu sollannu tuli matangkasa', lanri iNakke matangkasakKa'.

KAIMANGNGANG 11:45

INakkemi Batara angngerangko assulu' battu ri butta Mesir, sollangKu akkulle a'jari Allata'alanu. Musti matangkasakko, lanri iNakke matangkasakKa'.

ZAKHARIA 13:9

Bage talluna mami lasalama'. Siagang anjo ke'nanga laKupakatangkasaki rapang pera' nipakati'noka siagang pepe'. LaKuuji ke'nanga rapang tau angngujia bulaeng. Nampa lappala' doang ke'nanga mae ri Nakke, siagang laKupiali pappala'na ke'nanga. LaKupauangi ke'nanga angkanaya iami ke'nanga ummakKu, nampa ke'nanga lamangaku tongi angkanaya iNakkemi Karaeng Allata'alana ke'nanga.”

PAMMILANGNGANG 15:41

INakkemi Karaeng Allata'alanu; iNakke angngerangko assulu' battu ri butta Mesir sollanna iNakke a'jari Allata'alanu. INakkemi Batara.”

MATIUS 22:32

‘INakkemi Allata'alana Abraham, Allata'alana Ishak, siagang Allata'alana Yakub.’ Anjo Allata'ala, teai Allata'alana tau matea; mingka Allata'alana tau attallasaka!”

ROMA 8:31

Apamo lanikana kamma-kamma anne ri passala' kammaya ngaseng anjo? Punna Narurungangki' Allata'ala, maka inai akkulle angngewaki'?

PAOLE 14:2

Ikaumi Napatanga Karaeng Allata'alanu; battu ri sikontu bansaya ri lino, ikaumi Napile Allata'ala untu' a'jari umma'Na.”

PAOLE 26:18

Anne alloa Natarimako Batara salaku umma' KalenNa, sangkamma Napa'janjianga mae ri kau, siagang Naparentakangi mae ri kau sollanna nuturuki sikamma hukkunNa.

PAOLE 29:12

Appareki Karaeng Allata'alanu parjanjiang siagang ikau, siagang asse're ngasengko anrinni untu' ansikkoki anjo parjanjianga kammayatompa antarimai sikamma kawajibannu.

PAOLE 29:13

Iaminjo parjanjianga Napake Batara anne alloa ampakajarrekko a'jari bansaNa, siagang Ia a'jari Allata'alanu sangkamma Napa'janjianga mae ri kau siagang mae ri boe-boenu iamintu Abraham, Ishak siagang Yakub.

PAOLE 29:5

Patampulo taungi sallona Batara ampimpingko a'jappa ri parang lompoa, mingka tena na'jari toa pakeannu siagang sandala'nu.

PAOLE 4:20

Mingka ikaumi bansa Napasalamaka battu ri butta Mesir, tampa'nu sessa dudu riolo. Naerangko assulu' battu ri anjo pa'rasanganga, sollannu a'jari bansa KalenNa sangkamma kaadaannu kamma-kamma anne.

PAOLE 7:6

Gaukangi anjo kammaya lanri ikau Karaeng Allata'alanu ampatangko. Battu ri sikontu bansaya ri anne linoa, ikaumi Napile Karaeng Allata'alanu untu' a'jari umma'Na kaminang Nangaia.

IBRANI 11:16

Mingka ma'nassami angkanaya nakkuki ke'nanga ri se'reang pa'rasangang la'bi bajika, iamintu pa'rasangang niaka ri suruga. Lanri kammana minjo natena nasiri'-siri' Allata'ala nikio' Allata'ala ri ke'nanga. Nasaba' le'ba'mi Napasadiang Allata'ala ke'nanga se're kota untu' ke'nanga.

1 PETRUS 2:10

Riolo teaiko umma'Na Allata'ala, mingka kamma-kamma anne umma'Na mako Allata'ala. Riolo tanikamaseangako ri Allata'ala; mingka kamma-kamma anne nutarimami pangngamaseanNa.

PAPPICINI' 21:3

Nampa nia'mo kulangngere' sa'ra lompo akkio' battu ri anjo empoang kala'biranga angkana, “Kamma-kamma anne nia'mi pammantanganNa Allata'ala ri tangnga-tangngana pammantanganna rupataua! Lattallasa'mi siagang ke'nanga, siagang la'jarimi ke'nanga umma'Na. KalenNa Allata'ala lania' ri tangnga-tangngana ke'nanga siagang la'jari Allata'ala mae ri ke'nanga.

PAPPICINI' 21:7

Tau ammetaya lanatarima ngasengi yangasenna anjo battu ri Nakke. INakke la'jari Allata'alana siagang ia la'jari anakKu.