KALAPPASSANG 6:6 - KITTA' MATANGKASA'

⁶ LaKupa'jariko ummakKu, siagang iNakke a'jari Allata'alanu. Na lanuassemmo angkanaya iNakkemi anne Batara, Allata'alanu, le'baka allappassangko battu ri Mesir, ampare' atayako.

KALAPPASSANG 6:6 ပူးပေါင်းရင်းမြစ်များ

2 KARAENG-KARAENG 17:36

Pakala'birikKa', iNakke Batara, le'baka angngerangko assulu' battu ri Mesir lalang koasa malompoKu; anynyombako ri Nakke siagang angngerangko passare mae ri Nakke.

1 PATTOTTORANG 17:21

Ri sikontu linoa tena bansa sangkamma Israel. Tena ruanna bansa Israel Kilappassang battu ri nipare' ataya untu' a'jari umma' KalenTa. Sikontu anjo gau' malompoa siagang appakalanasaka mae ri ke'nanga sa'genna a'jari masahoro'mo arenTa malla'bang lino. Kilappassangi ummatTa battu ri Mesir, siagang Kipakabellai bansa-bansa maraenga ri wattunna maju ummatTa a'bundu'.

NEHEMIA 1:10

O, Batara, ikambe anne ata-atanTa, umma' kalenTa le'baka Kipasalama' lalang koasaTa siagang kahebakkanna kagassinganTa.

PAMMUJI 77:16

Lalang kagassinganTa naKipakabebasa' ummatTa, turunganna Yakub siagang Yusuf.

PAMMUJI 81:11

INakkemi Batara Allata'alanu, anrurungangko assulu' battu ri Mesir. Wattunnu cipuru' Kusareko kanre.

PAMMUJI 81:6

Napa'jari se're katantuang mae ri bansa Israel, ri wattunna maju angngewai Mesir. Allangngereka' bicara tenaya nakuassengi, angkana,

PAMMUJI 81:7

“Le'ba'mi Kualle erangnganga ri salanggannu, naKulappassang karanjeng pisangngang niaka ri limannu.

KALAPPASSANG 1:11

Jari angngangka'mi tu Mesir siapa are jaina pajaga mae ri bansa Israel untu' ampakasukkaraki katallassanna ke'nanga, iamintu nasuroi tu Israel anjama terasa'. Nipassai ke'nanga ambangungi kota Pitom siagang Raamses, untu' karaeng Mesir untu' a'jari pammolikang barang-barang.

KALAPPASSANG 12:41

Ri allo kala'busanna anjo taung maka-430 taung, sikontu barisanna anjo umma'Na Batara a'lampami ambokoi butta Mesir.

KALAPPASSANG 12:51

Anjo alloa Naerammi Batara sikontu bansa Israel assulu' battu ri Mesir.

KALAPPASSANG 13:14

Punna ri bokoang allo nakkuta'nang ana'nu angkana apa ngaseng battuanna anjo sikammaya, musti appialiko angkana, ‘Lalang koasa malompoNa Batara na Naerang maki' assulu' battu ri pa'rasangang Mesir, tampatta nipare' ata.

KALAPPASSANG 13:16

Anjo kabiasang kammaya a'jari pappiu'rangi mae ri katte, sanrapang pammatei nipasikkoka ri limanta yareka pammatei ri abanta. Lanri kammana tuli nipiu'rangiang maki' angkanaya Batara le'ba' ampasulukki' battu ri Mesir siagang koasa malompoNa.”

KALAPPASSANG 13:3

Nakanamo Musa mae ri bansa Israel, “Anne alloa Nalappassang mako Batara lalang koasa malompoNa, sa'genna akkulle mako assulu' battu ri Mesir, tampa'nu nipare' ata. Lanri kammana anjo, pakalompomi anne alloa. Teako angnganrei roti ammakea pa'gambang.

KALAPPASSANG 15:13

Kipimpingi anne bansa le'baka Kipasalama', lanri majarrekKi' mae ri janjinTa. Lanri koasa malompoTa naKila'langi, siagang Kirurungang mae ri butta matangkasatTa.

KALAPPASSANG 16:6

Jari nakanamo Musa siagang Harun mae ri sikontu tu Israel, “Anne karuenga lanuassengi angkanaya KalenNa Batara angngerangko assulu' battu ri Mesir.

KALAPPASSANG 18:1

Yitro, matoanna Musa, imang Midian, nalangngereki kabara'na sikontu apa le'baka Nagaukang Allata'ala untu' Musa siagang bansa Israel, ri wattunna napimping ke'nanga assulu' battu ri pa'rasangang Mesir.

KALAPPASSANG 2:11

Wattunna lompomo Musa, a'lampai mange angngagangi sicini' tu a'julu bansana. Nacini'mi antekamma batena nipassa ke'nanga anggaukangi jama-jamang battalaka. Nacini' tommi nia' sitau tu Mesir ammuno sitau tu Ibrani.

KALAPPASSANG 3:17

Siagang le'ba'mi Kupattantu untu' angngerangi ke'nanga assulu' battu ri Mesir, tampa'na nijallakkang ke'nanga, siagang Kuantaraki ke'nanga mange ri se'reang pa'rasangang kalumanynyang siagang copponga buttana, iamintu pa'rasangang Kanaan, bansa Het, Amori, Feris, Hewi, siagang Yebus.

KALAPPASSANG 3:8

Lanri kammana anjo, erokKa' naung untu' allappassangi ke'nanga battu ri limanna tu Mesirka, nampa Kuerang ke'nanga assulu' battu ri anjo pa'rasanganga naKuerang mange ri pa'rasangang luaraka. Buttana coppongi siagang akkalumanynyangi. Kamma-kamma anne anjo pa'rasanganga napammantangi bansa Kanaan, bansa Het, Amori, Feris, Hewi siagang Yebus.

KALAPPASSANG 32:11

Napala'mi Musa mae ri Karaeng Allata'alana, nakana, “O, Batara, angngapa namusti kamma anjo Kigaukang mae ri ke'nanga? Sai iKatte ampasalamaki ke'nanga battu ri Mesir siagang kakoasanTa na kagassingang lompoTa?

KALAPPASSANG 6:2

Kupappicinikangi KalengKu mae ri Abraham, Ishak siagang Yakub, salaku Allata'ala Kaminang Koasaya, mingka tena Kupappiassengangi KalengKu mae ri ke'nanga lalang areng ‘Batara’.

KALAPPASSANG 6:29

Mingka appialimi Musa angkana, “O, Batara, Kiassengi angkanaya tena kucara'de' a'bicara. Antekamma batena lakkulle karaenga ampilangngeria?”

KALAPPASSANG 6:8

Sikontu anjo pasanNa Batara napabattui Musa mae ri bansa Israel, mingka taerokai ke'nanga anjampangi Musa, lanri tappu' minasami ke'nanga napakamma anjo sessanamo ke'nanga nipare' ata.

KALAPPASSANG 7:4

Lanri kammana anjo laKuhukkungi Mesir siagang hukkungang-hukkungang battala', nampa Kuerang sikontu bansa Israel, ummakKu, assulu' battu ri anjo pa'rasanganga.

KALAPPASSANG 7:5

Jari lanaassemmi tu Mesir angkanaya iNakkemi anne Batara, ri wattunna Kuhukkung ke'nanga siagang Kuerang tu Israel assulu' battu ri pa'rasanganna ke'nanga.”

YESAYA 9:12

Tena ijapa nassesse' lalang bansa Israel, manna pole nanihukkummo ri Batara Kaminang Makoasaya; tena ijapa natoba' ke'nanga mae ri Ia.

YESAYA 9:17

A'rinrai rapang pepe' kaja'dallanna ke'nanga na nakanre sa'genna cappu' rompo' katintinga. Rinrana rapangi romang akkanre, jai sikali nai' umbunna.

YEREMIA 21:5

KalengKu lambundukiko siagang kagassingangKu, lalang allumpana larroKu.

YEREMIA 27:5

“Lanri koasa malompoKu siagang lanri kagassingangKu nale'ba' Kupa'jari linoa siagang rupataua kammayatompa sikontu olo'-oloka, nampa akkulle Kupassareang mae ri inai-nai mamo Kukaerokia.

YEREMIA 32:21

Lanri koasa siagang kagassingang lompoTa Kierangi umma' Israel assulu' battu ri Mesir. Kigaukangi gau'-gau' appakalannasaka siagang gau'-gau' malompoa appakagegereka ri musu-musua.

YEHEZKIEL 20:33

“Lanri iNakke, Allata'ala Mattallasaka, Batara Kaminang Tinggia, Kupakaingakko angkanaya lanri larroKu, laKuparentako siagang terasa' sa'genna nukasia' kakoasangKu. LaKupa'rappungko siagang laKuerangko ammotere' battu ri sikontu pa'rasangang tampa'nu nipasisa'la'-sa'la'.

LAMPA-LAMPANA 13:17

Le'ba'mi Napile Allata'ala bansa Israel, boe-boeta, naNapa'jari jai anne bansaya ri wattunna ammantang ke'nanga annumpang ri butta Mesir. Nampa lalang kakoasang lompoNa Allata'ala, Naerammi Allata'ala assulu' ke'nanga battu ri Mesir.

PAOLE 11:2

U'rangi kamma-kamma anne apa nuassenga ri passala'na Batara battu ri pangalamannu. Ana'-ana'nu tenapa naassengi anjo pangalamang kammaya. Ikaumi le'ba' anciniki kalompoanNa Karaeng Allata'alanu, kagassinganNa, kakoasanNa,

PAOLE 15:15

U'rangi angkanaya ikau ata tonjako riolo ri Mesir nampa nipakabebasakko ri Karaeng Allata'alanu; iaminjo saba'na nakupassareang anne parentaya mae ri kau.

PAOLE 26:8

Lanri KoasaTa siagang kagassingang malompoTa naKilappassang ikambe battu ri Mesir. Kigaukangi gau'-gau' malompoa siagang appakalannasaka, kammayatompa Kipabattui kajariang-kajariang appakagegereka mae ri musua.

PAOLE 4:23

U'rangi baji'-baji'! Teako takkaluppai ri parjanjiang Napareka Karaeng Allata'alanu siagang ikau ngaseng! Turuki parentaNa; tea' laloko appareki patung manna pole antekammaya tanja'na untu' nusomba,

PAOLE 4:34

Le'bakika nia' rewata barani angngalle se'reang bansa battu ri bansa-bansaya nampa napa'jari ke'nanga umma' kalenna, sangkamma Nagaukanga Karaeng Allata'alanu untu' ikau ri Mesir? Kalennu anciniki antekamma bateNa Allata'ala appabattu kagassingang lompo, angngeranga bala siagang pa'bundukang, anggaukangai gau'-gau' appakalannasaka siagang apa-apa hebaka.

PAOLE 5:15

U'rangi angkana ikau riolo nipare' atako ri Mesir, nampa nilappassangko ri Karaeng Allata'alanu lalang kakoasang malompoNa. Lanri kammana minjo naKuparentakangko untu' ampakalompoi Allo Pammari-marianga.

PAOLE 6:12

katutui baji'-baji' sollanna tena nutakkaluppa mae ri Batara, le'baka allappassangko battu ri Mesir, tampa' le'baka nupammantangngi nipare' ata.

PAOLE 7:19

U'rangi sikamma bala lompo nucinika kalennu, gau'-gau' appakalannasa', siagang kakoasang lompo Napakea Karaeng Allata'alanu untu' allappassangko. Kamma tomminjo laNagaukanga Karaeng Allata'alanu mae ri sikontu bansa nukamallakkanga.

PAOLE 7:8

Mingka Napileko Batara lanri Nakamaseangko siagang eroki Narupai janji Napareka siagang boe-boenu. Iaminjo saba'na nale'ba' mako Napasalama' siagang kakoasang lompoNa siagang Nalappassangko battu ri nipare' atanu battu ri karaeng Mesir.

PAOLE 9:29

Mingka Kiu'rangi laloi, o Batara, angkanaya anne ke'nanga bansa Kipile a'jari ummatTa, siagang Kierangi battu ri Mesir lalang kagassingang siagang kakoasang malompoTa.”