KALAPPASSANG 34:6 - KITTA' MATANGKASA'

⁶ Nampa allalomo Batara ri dallekanna Musa na Nakana, “INakke Batara, iamintu Allata'ala malammoro' pa'maika siagang mangngamaseanga. Anjo pangngamaseangKu alla'bi-la'bi; majarreKa' siagang tena naKulinta' larro.

KALAPPASSANG 34:6 ပူးပေါင်းရင်းမြစ်များ

PA'JARIANG 24:27

Nakana, “Nipujimi Batara, Allata'alana karaengku Abraham. Ma'nassa akkana sitappa' tojengi Batara siagang baji' pa'maiki mae ri karaengku Abraham. KalenNa ampimpinga' tulusu' mae ri bija pammanakanna.”

2 SAMUEL 24:14

Appialimi Daud angkana, “O, dende'! Ballasa'ma' inakke! Mingka bajikangngang mami Batara anghukkung ngasengki' kala rupa tau langhukkunga'; nasaba' Batara lompo pangngamaseangi.”

1 KARAENG-KARAENG 19:11

Nakanamo Batara, “Assulukko battu ri antu kali'bonga, siagang ammentengko a'dalle' mae ri Nakke rate ri monconga.” Nampa allalomo Batara anjoreng, nipirioloi ri anging mammiri' sannaka sarrinna, sa'genna tappuemo sikamma bontoa siagang moncong-moncong batua reppe'mi napakamma. Mingka tena Napa'nyatai KalenNa Batara lalang ri anjo anginga. Ri wattunna sannammo anjo anginga, ta'ge'goso'mi buttaya, mingka tena todong Napa'nyatai KalenNa Batara lalang ri anjo butta ta'ge'gosoka.

2 PATTOTTORANG 30:9

Punna ammoterekko mange anynyomba ri Batara, anjo tau le'baka allalingi bija pammanakannu salaku tunitahang, lamangngamaseangi siagang lanapa'biangi ke'nanga ammotere' mae anrinni ri pa'rasanganta. Anjo Karaeng Allata'alanu, Iami Allata'ala mabaji' siagang Mangngamaseangi; laNatarimako punna ammoterekko mae ri KalenNa.”

NEHEMIA 9:17

Tamannurukiai ke'nanga, nakaluppai sikontu kabajikanTa, tenai ri pangngu'ranginna sikamma gau' mappakalannasatTa. Tampomi ke'nanga ammile sitau pamimping, untu' angngerangi ke'nanga ri Mesir, ammotere' a'jari ata. Mingka iKatte Allata'ala mangngai mappammopporang, sarro sa'bara', lammoro' pa'mai', sukku' pangngamaseang. Teai sipato' heba'na pangngamaseanTa; tena naKibokoi ke'nanga.

PAMMUJI 108:4

O, Batara, erokka' appala' sukkuru' mae ri Katte ri alla'na bansa-bansaya. Erokka' akkelong kelong pammuji mae ri Katte ri alla'na umma' rupataua.

PAMMUJI 111:4

Anjo Batara mangngamaseangi siagang manynyayangi, Nagaukang gau'-gau' malompoa, sollanna ikatte tuli niu'rangi.

PAMMUJI 111:8

Attahangi hukkunNa satunggu-tungguna, nipassareangi lalang katojengang siagang kaadelang.

PAMMUJI 112:4

Accayai singaraka lalang ri sassanga mae ri tau lambusuka, mae ri tau adeleka, mangngamaseanga siagang manynyayanga.

PAMMUJI 116:5

Anjo Batara mangngamaseangi siagang adeleki; Allata'alata la'bi ri pangngamaseang.

PAMMUJI 138:2

Su'juka' a'dalle' mae ri Balla' matangkasatTa nakupuji arenTa, saba' tamamminrayaKi' siagang tulusu' mangngamaseangKi'. La'bi Kiparalluangangi janjinTa kala panggappa pikkiranna taua mae ri Katte.

PAMMUJI 145:8

Anjo Batara mangngamaseangi siagang mangngarimangngi, tena nalinta' larro siagang tuli mangngamaseangi.

PAMMUJI 146:6

Iami ampa'jari langika siagang linoa, tamparanga siagang sikontu bonena; Ia tamamminraya satunggu-tungguna.

PAMMUJI 31:19

Kitongkoki bawana tu paballe-ballea tu borroa ancau-caui tu lambusuka.

PAMMUJI 57:10

O, Batara, erokka' appala' sukkuru' mae ri Katte ri alla'na bansa-bansaya. Erokka' akkelong lagu pammuji mae ri Katte ri alla'na umma' rupataua.

PAMMUJI 86:15

Mingka iKatte, o, Batara, Allata'ala mangngamaseang siagang manynyayang, sa'bara', la'bi pangngamaseang siagang majarre'.

PAMMUJI 86:5

IKatte bajikKi', o, Batara, Kingai ampamopporangi taua, tau appala' doanga mae ri Katte tuli Kikamaseangi siagang pangngamaseang alla'bi-la'bia.

PAMMUJI 91:4

LaNatongkokko siagang ka'nyi'Na, sa'gennu amang lalang ri la'lanNa; nyawa tamamminraNa sanrapangi pa'lapa' ri batangkalennu anjagaiko.

KALAPPASSANG 20:5

Teako anynyombai ri patung kammaya anjo, nasaba' iNakkeji Karaeng Allata'alanu, siagang taerokA' nipasangkamma manna apa-apa mamo. Sikamma tau mangngabirissia mae ri Nakke Kuhukkungi sa'genna jari-jari lapisi' makatalluna siagang makaappa'na.

KALAPPASSANG 22:27

nasaba' anjo jubaya tena ruanna lanapake untu' angkammuki kalenna. Punna tena nupoterangi mae ri ia, maka apa lanapake a'jari kalimbu' punna tinroi? Punna akkioki mae ri Nakke appala' tulung, laKupilangngeri pakkio'na lanri Kukamaseanna.

KALAPPASSANG 33:19

Appialimi Batara angkana, “LanumaloA' siagang sikontu kala'birangKu ri dallekannu, nampa Kupau areng matangkasakKu. INakkemi Batara, siagang laKupappicinikangi kalammoranna pa'maikKu siagang pangngamaseangKu mae ri sikamma tau le'baka Kupile.

PANGNGEBARANG 3:3

Paralluko tuli tappa' siagang tamamminraya mae ri Allata'ala siagang mae ri parannu tau. U'rangi anjo kammaya siagang boliki ri pa'mai'nu,

KATO'BA 8:11

Angngapa nagampang kamma taua anggaukangi kaja'dallanga? Lanri tenana nalinta' nipitabai hukkungang.

YESAYA 12:4

Nia' sallang se're wattu na nukana, “Sukkurukko mae ri Batara, siagang anynyombako ri Ia. Kabarrangi mae ri bansa-bansaya kalompoanNa siagang sikontu panggaukanNa.

YESAYA 65:16

Tunggala' taua ri anjo pa'rasanganga, ia appalaka barakka', lanapalaki sollanna nibarakkaki ri Allata'ala tamamminraya. Tunggala' taua eroki assumpa; lassumpai lanri arenNa Allata'ala tamamminraya. Saba' kasessang rioloa tappela'mi siagang nikaluppaimi.”

YEREMIA 32:18

Kipappicinikangi pangngamaseang satunggu-tungguTa mae ri assa'bu-sa'bua tau, mingka Kihukkung tongi taua lanri dosana tau toana. IKattemi Allata'ala mala'birika siagang porea; arenTa iamintu Batara Kaminang Koasaya.

YEREMIA 9:24

Inai ero' lompo pa'mai' ri passabakkang apa-apaya, musti lompo pa'maiki passabakkang naassengKu siagang napahangKu; angkanaya naassengi angkana mangngamaseangA' sa'genna satunggu-tungguna na Kupaenteng hukkunga siagang kaadelanga ri lino. Yangasenna anjo napakasannangi atingKu. INakke, Batara, akkana kamma anjo.”

PIRAUNG 3:23

tuli beruna tunggala' bari'basa' tojeng-tojeng, anjo Batara tena le'bakai amminra pa'mai'Na!

YO"EL 2:13

Teako pakeannu nukae-kae mingka atinnu.” Assaile mako mae ri Karaeng Allata'alanu. Sarro sa'baraKi siagang lompo panynyayang lammoro' pa'maiKi na mangngamaseang. Nangai appamopporang siagang taNangaiyai anghukkunga.

YUNUS 4:2

Nampa appala' doang nakana, “O Batara, sai le'ba'mi kupau ri tenanapa ku'lampa ri ballakku pirangalloang, angkanaya tantu laKigaukanna anne kammaya? Iaminjo saba'na nakutulusu' lari mange ri Spanyol! Kuassengi angkanaya iKatte Allata'ala assayang siagang angngamaseang, la'bu ri sa'bara', lamma siagang alusu' pa'mai', siagang tuli sadiaKi' untu' ampinrai rancanaTa anghukkung.

MIKHA 7:18

Tena Allata'ala sangkammanTa, o Batara, ampammopporangai dosana umma' nipileNa niaka tassesa. Tena Kituli lalarro; kabalekanna, sannangi nyawaTa ampappicinikangi pangngainTa tenaya sanggana.

MIKHA 7:20

Mae ri ummatTa, iamintu jari-jarina Abraham siagang Yakub, laKipappicinikangi majarretTa siagang pangngainTa tenaya sanggana sangkamma Kipa'janjianga mae ri boe-boena ikambe battu riolo dudu.

NAHUM 1:3

Memang, Batara tena nalinta' larro; mingka sanna' todong makoasaNa sa'genna inai-nai anggaukangi salaya tena nalaNapata'lappasa' battu ri hukkunganga. Kemae-kemae Batara a'jappa, anjorengi ammumba anging lompoa; kemae angngonjo' bangkenNa, anjorengi limbu'buka a'jari rammang.

PAMMILANGNGANG 12:8

Siagang iNakke a'bicarA' sidallekang siagang ia, a'nyatai siagang tena nasangkamma boto-botoang. Ba'lalo manna rupangKu le'ba'mi nacini'! Angngapa nubarani angngewai Musa, anjo atangKu?”

YOHANES 1:17

Nitarimai HukkunNa Batara, tete ri Musa. Mingka pangngamaseang siagang pangngatutuiNa Allata'ala nipa'nyatami lalang ri Isa Almasi.

ROMA 2:4

Yareka nucapaki pangngamaseanNa siagang kabajikanNa kammayatompa kalompoanNa Allata'ala? Mattantu nuassengi angkanaya iaji naNapappicinikang kabajikang pa'mai'Na Allata'ala, lanri nakellainu ngaseng toba' ri dosa-dosanu.

PAOLE 32:3

Kumammuji ri arenNa Batara. Kabarrangi kalompoanNa Allata'alata!

PAOLE 4:31

Anjo Karaeng Allata'alanu, Iami Allata'ala sannaka lompona pangngamaseanNa. Tena nalaNabokoiko yareka tena nalaNapanrakiko, yareka tena nalaNakaluppai parjanjiang Napareka KalenNa siagang boe-boenu.

PAOLE 5:10

Mingka Kupappicinikangi pangngamaseangKu mae ri assa'bu-sa'bua jari-jari ri tau mangngamaseanga ri Nakke siagang mannurukia ri parentaKu.

YAKOBUS 5:11

Nigallara'mi ke'nanga tau sunggu, lanri sa'bara'na ke'nanga. Nulangngere' tommi kasa'barranna Ayub, siagang nuasseng tommi antekamma batena nibarakkaki ri Batara, ri kale'bakkanna. Nasaba' teai sipato' baji' pa'mai'Na siagang lompo pangngamaseanNa Batara.