KALAPPASSANG 28:43 - KITTA' MATANGKASA'

⁴³ Anjo saluaraka musti tuli napakei ke'nanga punna antama' ri KemaKu yareka nareppesi tampa' pakkoro'bangnganga untu' anggaukangi ibadaya salaku imang ri Kamara' Matangkasaka, sollanna tena namate ke'nanga lanri kacinikangi bageang kalenna tenaya nasiratang nicini'. Anjo paratoranga tuli nipakei untu' Harun siagang jari-jarina.”

KALAPPASSANG 28:43 ပူးပေါင်းရင်းမြစ်များ

KALAPPASSANG 20:26

Teako ambangungi tampa' pakkoro'bangngang tinggi sa'genna musti ammake pako tuka' punna nupanaiki, sollanna tena nakacinikang apa tenaya nakkulle nicini' ri kalennu.”

KALAPPASSANG 27:21

Harun siagang sikamma ana'na musti angngurusuki anjo lampua battu ri karueng sa'genna bari'basa' ri tampa' kahaderangKu, pantaranna kaeng ta'gentunga ri dallekanna Patti Parjanjianga. Anjo parentaya musti nigaukangi untu' satunggu-tungguna ri tu Israel siagang sikontu jari-jarina.”

YEHEZKIEL 44:17

Ri wattunna antama ke'nanga ri pakke'bu' lompoa a'lampa mange ri paranglakkeng bageang lalanga, musti ammakeang kaeng lenangi ke'nanga. Takkulleai ke'nanga ammake pakeang wol punna tugasaki ke'nanga ri paranglakkeng bageang lalanga, yareka lalang ri BallakKu.

KAIMANGNGANG 16:13

Anjo dupaya musti natunui ri dallekanna Patti Parjanjianga, sa'genna natongko' anjo pa'rangka'na Patti Parjanjianga siagang umbunna siagang takkullea nacini' Harun, nasaba' punna naciniki, tena tamatena.

KAIMANGNGANG 17:7

Bansa Israel musti tamamminrayai mae ri Batara, siagang tena sikali-kali nakkulle anynyamballe ke'nanga olo'-olo' ri koko-kokoa untu' passare mae ri sikamma jing ja'dalaka. Anjo paratoranga musti nituruki sa'genna satunggu-tungguna.

KAIMANGNGANG 22:15

Sikamma imanga takkulleai nara'massi passare le'baka nisa'la' untu' KalengKu

KAIMANGNGANG 22:9

Sikontu imanga musti naturuki paratorang-paratorang Kupassareanga. Punna tena, salai ke'nanga siagang tena tamatena, lanri nadakkai ke'nanga anjo paratorang-paratorang matangkasaka. INakke Batara, siagang iNakke ansa'laki ke'nanga untu' KalengKu.

KAIMANGNGANG 3:17

Tena sikali nakkulle tu Israel angnganre janna yareka cera'. Anne paratoranga tappakei sa'genna satunggu-tungguna siagang musti nituruki ri sikontu tu Israel manna pole kemae ammantang.

KAIMANGNGANG 5:1

Anjo koro'bang nipammopporanna dosaya parallui nipassareang: Punna nia' tau nikellai assare kasa'biang ri pangadelanga, mingka tena nassare kasingarang ri anjo passala' le'baka nacini' yareka nalangngere', sa'genna nakasia' baji'-kodina.

KAIMANGNGANG 5:17

Punna nia' tau tena nakunjungi anggaukangi dosaya lanri nadakkaina kalase'renna parentaNa Batara, anjo taua salai siagang musti natanggongi kodina anjo kasalanna.

PAMMILANGNGANG 15:15

Anjo sikontu hukkunga siagang paratoranga nipasangkamma ngasengi mae ri kau siagang mae ri bansa maraeng ammantanga ri tangnga-tangnganu, lanri ikau siagang anjo ke'nanga nipasangkammako ri dallekanNa Batara. Na anjo kammaya tappakei sa'genna satunggu-tungguna.

PAMMILANGNGANG 18:22

Tu Israel maraengannaya takkulleai a'reppese' mae ri KemaKu, sollanna tena nanitujui ke'nanga hukkungang mate.

PAMMILANGNGANG 18:32

Tena nusala punna nukanrei, assala' le'ba'mi nupassareang bageang kaminang bajika mae ri Batara. Teako ra'massi passare matangkasa'na tu Israel, lanri nukanrena anjo passarea natenapa nusa'laki bageang kaminang bajika untu' Batara. Punna nudakkai anjo parentaya, tena tamatenu.

PAMMILANGNGANG 18:8

Nakana Batara mae ri Harun, “U'rangi! Sikontu passare nisa'la' nipassareanga mae ri Nakke, ia tenaya nitunui, iaminjo bageannu. Iaminjo bageannu le'baka nipattantu sa'genna satunggu-tungguna. Anjo Kupassareangi mae ri kau siagang mae ri jari-jarinu.

PAMMILANGNGANG 9:13

Kabalekanna tau tenaya nara'masa' siagang tenaya todong nalalang pa'jappang, mingka tanajampangiai ampakalompoi allo Paskaya, tenamo naKubilangi ummakKu, lanri tenana nassare koro'bang mae ri Nakke ri allo le'baka nipattantu. Anjo taua musti natanggongi kale'bakkang kodina anjo dosana.