KALAPPASSANG 24:7 - KITTA' MATANGKASA'

⁷ Nampa naalle kitta' parjanjianga niaka lalang nitulisi' sikamma parentaNa Batara, nampa nalompoi sa'ranna ambacai bonena mae ri sikamma anjo bansaya. Nakana ngasemmo ke'nanga, “Sadiai ikambe lamannuruki siagang langgaukangi sikontu parentaNa Batara.”

KALAPPASSANG 24:7 ပူးပေါင်းရင်းမြစ်များ

1 KARAENG-KARAENG 8:9

Tena sikali apa-apa bonena lalang anjo Patti Parjanjianga pantaranganna ruaya batu. Anjo batu-batua napantamaki anjoreng Musa ri Moncong Sinai, ri wattunna appare' parjanjiang Batara siagang bansa Israel, ri wattunna lalang pa'jappang ke'nanga battu ri Mesir mange ri pa'rasangang Kanaan.

2 PATTOTTORANG 15:14

Nalompoi sa'ranna ke'nanga assumpa mae ri Batara angkanaya lanata'gala' jarreki anjo janjinna ke'nanga. Nampa a'rannu-rannu ke'nanga appasa'ra tarompe'.

PAMMUJI 50:5

Nakana, “Passe'rei sikontu ummakKu, le'baka appare' parjanjiang siagang iNakke, nipakajarreka siagang koro'bang nipolong.”

PAMMUJI 78:36

Mingka naballe-ballei ke'nanga Allata'ala, bicaranna ke'nanga sangnging balle-balle bawang.

KALAPPASSANG 19:8

Appada-pada ngasemmi ke'nanga appiali angkana, “Sadiai ikambe untu' anggaukangi sikontu kananNa Batara.” Anjo pappialinna ke'nanga napabattui Musa mae ri Batara. Nampa Nakanamo Batara ri Musa, “LabattuA' mae ri kau nikalimbuki ri rammang kapalaka; lanalangngereki taua punna a'bicarA' mae ri kau, nappakkaramula anjo wattua tuli latappa'mi ke'nanga mae ri kau.

MALEAKHI 2:10

Sai sangkammaji mangge nipa'juluia ngaseng? Sai sangkamma ngaseng jaki' nipa'jari ri Allata'ala? Punna kamma, angngapa nakimassing takkaluppa ri parjanjiang Napareka Allata'ala siagang boe-boeta?

LAMPA-LAMPANA 13:15

Ri wattunna le'ba' nibaca Kitta'na Musa siagang Kitta'na Na'bi-na'bia, nasuromi pamimping-pamimping balla' sambayanga akkuta'nang tau niaka hadere' mae ri Paulus siagang agang-aganna. Nakanamo pamimping balla' sambayanga mae ri Paulus siagang aganna, “Sikamma sari'battangku, punna nia' pappakainga' ero' nupabattuangi anne taua ngaseng, pabattuammi.”

KOLOSE 4:16

Punna le'ba' nibaca anne suraka mae ri kau ngaseng, usahakang tongi sollanna nibacakang todong mae ri jama'ah niaka ri Laodikia. Kammayatompa, musti nubaca tongi sura' lanikiringa battu ri Laodikia mae ri kau.

1 TESALONIKA 5:27

Tete ri koasaNa Batara, kupala' tojeng-tojengi ri kau ngaseng sollanna nubaca anne suraka ri dallekanna sikontu sari'battang julu tappatta.

YOSUA 24:24

Nampa nakanamo anjo taua mae ri Yosua, “Ikambe Batara Allata'alata bawang lanisomba. Lanaturuki ikambe parenta-parentaNa.”