KALAPPASSANG 24:14 - KITTA' MATANGKASA'

¹⁴ Le'ba'mi appasang Musa mae ri sikamma pamimpinna tu Israel angkana, “Attayangko ri kemaya sa'genna ammotere' ikambe. Nia'ji Harun siagang Hur angngagangko anrinni. Inai-nai nia' parkarana, akkullei mange andallekang ri ke'nanga untu' alle'bakangi urusanna.”

KALAPPASSANG 24:14 ပူးပေါင်းရင်းမြစ်များ

PA'JARIANG 22:5

Nakanamo mae ri anjo ruaya surona, “Ammantang mako kau sipa'rua siagang anne keledaia anrinni. Inakke siagang anakku la'lampa' mange anjoreng untu' anynyomba ri Batara. Sinampe' nammotere' ikambe mae anrinni.”

KALAPPASSANG 17:10

Nagaukammi Yosua anjo apa naparentakanga Musa mae ri ia. A'lampami mange ambunduki tu Amalek, nampa Musa, Harun siagang Hur nai'mi ri buluka sa'genna ri coppo'na.

KALAPPASSANG 17:12

Ri wattunna mangngammo Musa, angngallemi Harun siagang Hur se're batu sollanna akkulle Musa ammempo; ammentemmi Harun siagang Hur ri sa'ri kairinna siagang ri sa'ri kananna Musa untu' antumpaki limanna sollanna tuli ta'angka'na nai' sa'genna labu alloa.

KALAPPASSANG 18:16

Punna nia' passisala-salanna ke'nanga, battui ke'nanga mae ri nakke sollanna kutappuki parkarana ke'nanga, siagang kupauangi ke'nanga sikamma parentaNa siagang hukkung-hukkunNa Allata'ala.”

KALAPPASSANG 32:1

Ri wattunna nacini' bansa Israel angkanaya sallo dudumi Musa natanaungapa ammotere' Musa battu ri monconga, mingka tuli ammantanna rate, battumi ke'nanga allipungi Harun na nakana ri ia, “Taniassengai angkana apa kajariang ri Musa, anjo tau angngerangaki' assulu' battu ri Mesir; jari papparekammi ikambe se're rewata akkullea ampimpingi ikambe.”

1 SAMUEL 10:8

Le'baki anjo musti a'lampako mange ri Gilgal nuttayang anjoreng tuju allo. Sallang labattua' untu' assare koro'bang nitunu siagang koro'bang pappasiama', nampa kupauangko apa musti lanugaukang.”