KAIMANGNGANG 9:7 - KITTA' MATANGKASA'

⁷ Le'baki anjo nakanamo ri Harun, “A'lampako mange ri tampa' pakkoro'bangnganga siagang pasadiai koro'bang pammopporang dosaya kammayatompa koro'bang nitunua, sollanna Napammopporang Batara dosanu siagang dosana ummaka. Gaukangi anjo kammaya situru' Naparentakanga Batara.”

KAIMANGNGANG 9:7 ပူးပေါင်းရင်းမြစ်များ

KAIMANGNGANG 16:11

Punna le'baki napassareang siagang nasamballe Harun sapi lakia untu' pammopporang dosa kalenna siagang dosana sikontu kaluargana,

KAIMANGNGANG 16:24

Nampa musti a'je'ne' ri se'reang tampa' le'baka nipattantu nampa napake ammotere' pakeang kalenna. Le'baki anjo musti assuluki nampa napassareang koro'bang nitunua untu' pammopporanna dosa kalenna siagang dosana bansa Israel.

KAIMANGNGANG 16:6

Musti napassareangi Harun sikayu sapi laki untu' koro'bang pammopporang dosa mae ri kalenna siagang sikontu kaluargana.

KAIMANGNGANG 4:3

Punna anjo dorakaya iamintu Imang Lompoa, sa'genna ta'beso' ngaseng todong bansa Israel sala, musti assarei koro'bang iamintu sikayu sapi laki rungka, ia tenaya callanna, mae ri Batara sollanna nipammopporang salana.

KAIMANGNGANG 8:34

Naparentakangi Batara sollanna anne apa nigaukanga anne alloa nigaukangi pole situlusu'na. Lanri iaminne upacaraya na nipammopporang dosa-dosanu.

KAIMANGNGANG 9:2

Nakanamo Musa mae ri Harun, “Angngalleko sikayu sapi laki rungka siagang sikayu gimbala' laki, rua-ruana tena ngaseng callanna. Passareangi anjo ruaya olo'-olo' mae ri Batara; anjo sapi lakia untu' koro'bang pammopporang dosa, nampa anjo gimbala' lakia untu' koro'bang nitunu.

IBRANI 5:1

Massing-massing imang lompoa nipilei battu ri tangnga-tangngana ummaka, na niangka' a'jari wakkele'na ke'nanga untu' allayani mae ri Allata'ala. Jama-jamanna iamintu angngerangangi Allata'ala sikamma passare lanipabattua siagang sikamma koro'banga sollanna nipammopporang dosa-dosaya.

IBRANI 5:3

Na lanri kalenna jai tongi kakurangnganna, jari musti assaremi koro'bang; teai lanri dosa-dosana bawang ummaka, mingka lanri dosa-dosa kalenna pole.

IBRANI 9:7

Akkullea antama' ri bageang kaminang lalanna anjo pammantanganga, iamintu imang lompoaji bawang. Naporo sikaliji bawang sitaung nagaukang anjo kammaya. Siagang punna nagaukang anjo kammaya, angngerangi cera' untu' lanapangngadakkang mae ri Allata'ala untu' kalenna anjo imanga, siagang lanri sikamma dosa nagaukanga umma'Na.

1 SAMUEL 3:14

Lanri kammana, assumpA' mae ri kaluargana Eli, angkanaya anjo dosana ke'nanga sannaka lompona, takkulleai nitangkasi siagang koro'bang apa-apa mamo sa'genna satunggu-tungguna.”