KAIMANGNGANG 8:17 - KITTA' MATANGKASA'

¹⁷ Mingka dagenna sapia anjo, kukkulu'na, bone parru'na kammayami parru' lolona, jari sikontu anjo sapia pantaranganna anjo bageang-bageang le'bakamo nisa'la', nitunui ri pantaranna pakkemaanga situru' Naparentakanga Batara.

KAIMANGNGANG 8:17 ပူးပေါင်းရင်းမြစ်များ

KALAPPASSANG 29:14

Dagenna, kukkulu'na siagang parru' lolona anjo sapi lakia musti nitunui ri pantaranna kemaya. Iaminjo a'jari passare untu' nipammopporanna dosana sikamma imanga.

YEHEZKIEL 43:21

Nampa, angngalleko sapi laki untu' pannangkasina anjo dosaya, siagang tunui ri tampa' le'baka nipattantu, iamintu ri pantaranganna tampa' matangkasa'na Balla'Na Batara.

KAIMANGNGANG 16:27

Sapi lakia siagang bembea untu' koro'bang pammopporang dosa, ia nieranga cera'na antama' ri Kamara' Kaminang Matangkasa' untu' pammopporanna dosaya, musti nierangi assulu' ri pantarang pakkemaanga nampa nitunu. Kukkulu'na, dagenna siagang bone parru'na anjo ruaya olo'-olo', musti nitunu ngasengi.

KAIMANGNGANG 4:21

Nampa anjo sapi lakia musti nierangi assulu' na nitunu ri pantaranganna pakkemaanga, sangkamma nigaukanga ri passare sapi lakia untu' koro'bang nipammopporanna dosana kallena anjo Imang Lompoa. Kammaminjo batena nipassareang koro'bang untu' nipammopporanna dosana ummaka.

KAIMANGNGANG 6:30

Olo'-olo' untu' upacara nipammopporanna dosaya niallei sipa'gang cera'na untu' nierang mange ri Kamara' Matangkasaka, musti nitunui sa'genna cappu', na takkulleai nikanre.

KAIMANGNGANG 9:11

Mingka dagenna siagang kukkulu'na anjo sapia natunui ri pantaranna pakkemaanga.

GALATIA 3:13

Mingka le'ba' maki' Napakabella Almasi battu ri pangngalarroiNa Allata'ala lanri hukkung-hukkung agamaya. Napassareammi KalenNa nituju ri pangngalarroia passabakkang ikatte. Nasaba' nia' tattulisi' lalang ri Kittaka angkanaya, “Cilakami tau mate nigentunga irate ri kayu sallika.”