KAIMANGNGANG 7:16 - KITTA' MATANGKASA'

¹⁶ Punna nia' tau angngerang koro'bang passiamakkang untu' anrupai tinja'na, yareka untu' koro'bang lanri ero' kalenna, tena naparallu nikanre ngaseng memang anjo alloa. Punna nia' la'binna akkullei nikanre ammukona.

KAIMANGNGANG 7:16 ပူးပေါင်းရင်းမြစ်များ

PAMMUJI 116:14

Lakurupai janjingku ri Ia ri dallekanna sikontu umma'Na.

PAMMUJI 116:18

Lakurupai janjingku mae ri Batara, ri dallekanna sikontu umma'Na

PAMMUJI 66:13

Langngeranga' koro'bang nitunu mange ri BallatTa na kurupai janjingku mae ri Katte,

KALAPPASSANG 35:29

Sikontu tu Israelka massing naerammi passarena ke'nanga siagang ati maci'nonna mae ri Batara untu' jama-jamang Naparentakanga Batara tete ri Musa.

PANGNGEBARANG 7:14

“Anne alloa musti kubayaraki tinjakku, nalanri kammana le'ba'ma' assare koro'bang.

YEHEZKIEL 46:12

Punna ero' patugasa' pamarentaya angngerang passare ri ero' kalenna mae ri Batara, baji' a'rupa koro'bang nitunu kammayatompa koro'bang passiamakkang, musti nisungkeangi pakke'bu' lompo bageang iraya a'lampa mangea ri paranglakkeng bageang lalang. Carana ampassareangi anjo koro'banga musti sangkammai cara nagaukanga ri allo Pammari-marianga, mingka punna ammotere'mi musti nitongkoki linta' anjo pakke'bu' lompoa.”

KAIMANGNGANG 22:23

Untu' koro'bang ero' kalennu, akkulleko assare olo'-olo' tenaya nabaji' kalenna; mingka punna untu' anrupai tinja', anjo olo'-olo' kammaya tena nakkulle nitarima.

KAIMANGNGANG 22:29

Punna assareko koro'bang kasukkurang mae ri Batara, gaukangi anjo kammaya situru' paratorang, sollanna nanitarima anjo koro'bang nupassareanga.

KAIMANGNGANG 23:38

Anjo passua'-suarranga a'jari pannambai mae ri allo-allo Pammari-mariang biasaya; jari sikamma anjo koro'bang passarea a'jari tongi pannambai mae ri passarenu biasaya, ri koro'bang untu' anrupai tinja'nu, yareka koro'bang ero' kalennu ia nupassareanga mae ri Batara.

NAHUM 1:15

Ciniki, nia' sitau suro battu ri moncong-monconga, angngerang kabara' baji', iamintu kabara' pammetang. He bansa Yehuda, pakalompoi allo lomponu siagang bayaraki tinja'nu mae ri Allata'ala. Tenamo nalanijaja pa'rasangannu ri tau ja'dalaka. Le'ba'mi niancuru' taba sikali ke'nanga.

PAMMILANGNGANG 15:3

Untu' koro'bang nitunu yareka koro'bang pa'bayara' tinja', yareka koro'bang ero' kalennu; yareka koro'bang ri sikamma allo lompo biasaya, akkulleko assare mae ri Batara iamintu: sapi laki, gimbala' laki, yareka bembe, yareka gimbala'. Rasanna anjo sikamma koro'banga napakasannangi nyawaNa Batara.

PAOLE 12:11

Nampa lammile Karaeng Allata'alanu se're tampa' untu' lanupake anynyomba mae ri Ia. Anjoreng mako musti a'lampa angngerangi sikontu apa kuparentakanga, iamintu koro'bang nitunua siagang sikamma koro'bang maraengannaya, koro'bang bage sampulona panggappannu siagang koro'bang nupa'janjianga mae ri Batara.

PAOLE 12:17

Ri tampa' pammantangngannu takkulleako angkanrei passare bage sampulona panggappannu battu ri gandunga, battu ri anggoro'nu, battu ri minynya' zaitunnu, battu ri sapinu, bembenu siagang gimbala'nu bungasa' lassuka, koro'bang pa'bayara' tinja'nu, koro'bang ero' kalennu yareka passare maraengannaya.

PAOLE 12:26

Sikontu koro'banga siagang passare le'baka nupa'janjiang mae ri Batara, musti nuerangi mange ri tampa' Napilea Batara.

PAOLE 12:6

Anjoremmi ri tampaka musti nuerang sikamma koro'bang nitunua siagang sikamma koro'bang maraenganga, passare bage sampulona panggappannu siagang passare maraengannaya, koro'bang pa'bayara' tinja'nu, koro'bang passare ero' kalennu, kammayatompa ana' sapi, ana' bembe, siagang ana' gimbala' bungasa' lassuka.