KAIMANGNGANG 7:12 - KITTA' MATANGKASA'

¹² Punna nipassareang anjo koro'banga untu' appala' sukkuru', anjo olo'-oloka musti nikoro'bangkangi siagang roti tenaya nammake pa'gambang. Anjo rotia akkullei kapala', nipareka battu labu' nipasileoka minynya' zaitun, akkulle tongi roti kalotoro' nipisika siagang nisapua siagang minynya', yareka kanrejawa labu' nipasileoka siagang minynya' zaitun.

KAIMANGNGANG 7:12 ပူးပေါင်းရင်းမြစ်များ

2 PATTOTTORANG 29:31

Le'baki anjo nakanamo Hizkia, “Lanri kamma-kamma anne le'ba' kabusu' mako nitangkasi untu' Batara, jari salaku tanra sukkuru'nu, musti angngerangko koro'bang mae ri Balla'Na Batara.” Nampa sikontu tau hadereka anjoreng massing naerammi anjo passarea, ba'lalo nia' todong battu ri ero' kalenna tonji nangngerang olo'-olo' untu' nipassareang salaku koro'bang nitunu.

2 PATTOTTORANG 33:16

Nampa napakabaji' tampa' pakkoro'bangngang panynyombanga mae ri Batara, nampa assare anjoreng koro'bang pappasiama' siagang koro'bang sukkuru'. Sikontu tu Yehuda nasuro kabusuki anynyomba mae ri Karaeng Allata'alana Israel.

NEHEMIA 12:43

Anjo alloa jai koro'bang nipassareang ri Batara. A'rannu-rannui ra'yaka lanri nipakasunggui ri Allata'ala. Sikamma bai'-bainea siagang ana'-anaka amminawang tongi assua'-suara', siagang kalangngerammi sa'genna bella sa'ra karannuanna ke'nanga.

PAMMUJI 107:8

Siratangi ke'nanga appala' sukkuru' ri Batara lanri pangngamaseanNa, lanri sikamma bate pare' malompoNa mae ri rupataua.

PAMMUJI 116:17

Langngeranga' koro'bang sukkuru' mae ri Katte, nakuappanai' pappala' doang mae ri Katte.

PAMMUJI 50:23

Tau assarea koro'bang sukkuru' salaku koro'banna, iami ampakalompoA', siagang mae ri tau appasadiaya oloang laKupicinikiangi kasalamakkang battua ri Nakke.”

YEREMIA 33:11

Mingka anjoreng ri tampaka lania' pole kalangngerang sa'ra karannuang siagang kalompoang pa'mai' kammayatompa sa'ra passua'-suarrang pa'gaukang pa'buntingang. Lania' todong kalangngerang kelong-kelong tau angngerang koro'bang kasukkurang mange ri BallakKu. Lanakana ke'nanga, ‘Appala' sukkurukko mae ri Batara Kaminang Koasaya, lanri Ia bajiki siagang pangngamaseanNa sa'genna satunggu-tungguna.’ Anne pa'rasanganga laKupa'jari kalumanynyangi sangkamma riolo. INakke, Batara, anne akkana.”

HOSEA 14:2

He bansa Israel, ammotere' mako mae ri Karaeng Allata'alanu! Passabakkang dosanu nutappeccoro' siagang tu'guru'.

KAIMANGNGANG 2:4

Punna anjo napassareanga roti nitunu lalang ri pattunuang rotia, anjo rotia musti tena nammake pa'gambang. Anjo rotia akkullei kapala', nipareka battu ri leokang labu' alusu' siagang minynya' zaitun; akkulle tongi kanrejawa nisapua siagang minynya' zaitun.

KAIMANGNGANG 2:5

Punna anjo roti napassareanga iamintu roti nilanggaya irate ri pa'langganga, anjo rotia musti nipareki battu ri labu' alusu' nileoka siagang minynya' zaitun, mingka takkulleai ammake pa'gambang.

KAIMANGNGANG 22:29

Punna assareko koro'bang kasukkurang mae ri Batara, gaukangi anjo kammaya situru' paratorang, sollanna nanitarima anjo koro'bang nupassareanga.

KAIMANGNGANG 6:16

La'binna anjo labuka musti nipareki roti tenaya nammake pa'gambang siagang nakanrei sikamma imanga ri tampa' le'baka nipattantu untu' anjo, iamintu ri paranglakkenna KemaNa Batara. Iaminjo bageanna sikamma imanga ia Napassareanga Batara mae ri ke'nanga battu ri koro'bang nipatalaya. Anjo kanrea teai sipato' tangkasa'na, sangkamma koro'bang nipammopporanna dosaya siagang koro'bang passambe karugiang.

KAIMANGNGANG 7:15

Dagenna musti nikanre memang ri allo nipassareanna anjo olo'-oloka, manna sike'de' takkulleai niboli' sa'genna ammuko bari'basa'.

AMOS 4:5

Assare mako roti salaku sukkuru'nu mae ri Nakke, siagang a'bicara kosong mako angkanaya le'ba' mako angngerang tambana passarenu! Tantu iaminjo nungai ngaseng nugaukang!

PAMMILANGNGANG 6:15

Musti assare tongi sibaku' roti tenaya nammake pa'gambang, iamintu roti a'bo'donga ia nipareka battu ri labu' nipasileoka siagang minynya' zaitun, kammayatompa kanrejawa nipisi' nisapua minynya' zaitun. Pantaranganna anjo sikammaya musti assare tongi koro'bang nipatala siagang koro'bang inung-inungang.

LUKAS 17:16

Nampa mange ri dallekanNa Isa, anynyomba appala' sukkuru' ri Isa. Anjo taua tau battu ri pa'rasangang Samaria.

LUKAS 17:18

Angngapa naiaji bawang anne tau battu pantarang pa'rasanganga ammotere' appala' sukkuru' ri Allata'ala?”

ROMA 1:21

Naassengi rupataua Allata'ala, mingka taerokai rupataua ampakala'biriki salaku Allata'ala, siagang tena todong nappala' sukkuru' ri Ia. Ba'lalo apa-apa tenayaji matu-matunna nanawa-nawa rupataua; a'jari sassammi nawa-nawanna ke'nanga.

EFESUS 5:20

Lalang ri apa-apa mamo, paralluko tuli appala' sukkuru' mae ri Allata'ala Manggea, lalang arenNa Isa Almasi, Batarata.

IBRANI 13:15

Lanri kammana, tete ri Isa, paralluki' tuli mammuji-muji ri Allata'ala; iaminjo a'jari koro'bang sukkurutta mae ri Ia, nipassareanga lalang kana-kana nipaua untu' ampakala'biriki arenNa.

1 PETRUS 2:5

Ikau sanrapang ngasengko batu-batu mattallasaka. Lanri kammana paralluko ampassareangi kalennu untu' nipake ambangung Balla' rohaniNa Allata'ala. Lalang kammana anjo a'jari mako imang-imang mae ri Allata'ala lalang ri katallassannu; siagang tete ri Isa Almasi angngerang mako koro'bang rohani mae ri Allata'ala, iamintu koro'bang nitarima bajika ri atinNa Allata'ala.