KAIMANGNGANG 4:20 - KITTA' MATANGKASA'

²⁰ Ia carana sangkammai passare sapi laki nipassareanga untu' nipammopporanna dosaya. Kammaminjo carana Imang Lompoa ampassareangi koro'banga untu' nipammopporanna dosa-dosana ummaka, na nipammopporammo anjo dosa-dosaya ri Batara.

KAIMANGNGANG 4:20 ပူးပေါင်းရင်းမြစ်များ

KALAPPASSANG 32:30

Ammukona nakanamo Musa ri anjo bansaya, “Ikau doraka lompo ngaseng mako. Mingka kamma-kamma anne eroka' nai' poleang ri monconga untu' andallekang ri Batara; dasi-dasi na Napammopporanga' siagang Napammopporangi dosa-dosanu.”

DANIEL 9:24

Pintuju tattujupulo taung iamintu wattu le'baka Napattantu Allata'ala untu' ampakabebasaki bansanu siagang anjo kota matangkasa'nu battu ri dosa-dosaya siagang kaja'dallanga. Sikontu dosaya lanipammopporangi siagang lanipaentengi kaadelang tamattappuka, sa'genna a'rupa anjo paccinika siagang botoa, kammayatompa anjo Balla' Matangkasa'Na Batara lanipangngadakkangi ammotere' mae ri Batara.

KAIMANGNGANG 1:4

Nampa musti napadongkoki limanna irate ri tompo' ulunna anjo olo'-oloka, na Natarimamo Batara anjo passarena untu' nipammopporang dosana.

KAIMANGNGANG 12:8

Punna tena pakkullena anjo bainea appasadia sikayu ana' gimbala', musti angngerangi ruang kayu jangang-jangang bodobangkeng yareka bukkuru' rungka: sikayu untu' koro'bang nitunu na sikayu untu' koro'bang pammopporang dosa. Imanga musti nagaukangi upacaraya untu' antangkasi kara'massanna anjo bainea, sa'genna a'jari tangkasa'.

KAIMANGNGANG 14:18

La'binnaya minynyaka musti nipatiriki irate ri ulunna anjo taua. Kammaminjo nanagaukammo imanga upacara pannangkasia mae ri anjo taua ri dallekanNa Batara.

KAIMANGNGANG 15:15

Imanga musti napassareangi sikayu anjo jangang-janganga untu' koro'bang pammopporang dosa, siagang anjo sikayua untu' koro'bang nitunu. Kammaminjo na nagaukammo imanga upacara pannangkasia mae ri anjo taua ri dallekanNa Batara.

KAIMANGNGANG 19:22

Imanga musti nakoro'bangkangi anjo gimbalaka lalang ri upacara pannangkasia, sollanna nipammopporang dosana anjo taua. Na iNakke, Allata'ala lampammopporangi.

KAIMANGNGANG 4:21

Nampa anjo sapi lakia musti nierangi assulu' na nitunu ri pantaranganna pakkemaanga, sangkamma nigaukanga ri passare sapi lakia untu' koro'bang nipammopporanna dosana kallena anjo Imang Lompoa. Kammaminjo batena nipassareang koro'bang untu' nipammopporanna dosana ummaka.

KAIMANGNGANG 4:26

Nampa sikontu jannana anjo olo'-oloka musti nitunui irate ri tampa' pakkoro'bangnganga, sangkamma nigaukanga ri koro'bang passiamakkanga. Kammaminjo carana imanga ampassareangi koro'banga untu' dosana se'rea tau anna'gala' koasa, na nipammopporammo dosana anjo taua ri Batara.

KAIMANGNGANG 4:35

Nampa musti nialle ngaseng sikontu jannana anjo olo'-oloka sangkamma nigaukanga ri koro'bang passiamakkanga. Anjo jannaya musti nitunui irate ri tampa' pakkoro'bangnganga, siagang ngaseng koro'bang nikanre maraenganga ia nipassareanga mae ri Batara. Kammaminjo carana imanga ampassareangi koro'bang untu' nipammopporanna dosana anjo taua, na nipammopporammo dosana ri Batara.

KAIMANGNGANG 4:8

Imanga musti naallei sikontu jannana anjo sapi lakia, iamintu janna anrokokiai bone parru'na,

KAIMANGNGANG 5:10

Le'baki anjo napassareang tongi imanga anjo jangang-jangang makaruaya untu' koro'bang nitunu, situru' paratoranga. Kammaminjo carana imanga ampassareangi koro'banga untu' antangkasi dosana anjo taua, na nipammopporang ri Batara.

KAIMANGNGANG 5:13

Kammaminjo carana nipassareang koro'banga untu' dosana anjo taua, na lanipammopporang dosana ri Batara. La'binna anjo labuka iaminjo a'jari bageanna imanga, sangkamma ri koro'bang gandunga.

KAIMANGNGANG 5:16

Anjo taua musti nabayaraki apa nakaluppaia riolo, nampa nitambai ruampulo parseng. Nampa musti napassareang anjo olo'-oloka mae ri imanga, nampa nakoro'bangkang imanga anjo olo'-oloka untu' pannangkasina dosana anjo taua, na lanipammopporang dosana ri Batara.

KAIMANGNGANG 5:18

Untu' koro'bang sambe karugiang musti angngerangi anjo taua sikayu gimbala' laki yareka bembe laki ia tenaya callanna siagang nitassereka anggaranna situru' anggarang nipakea ri KemaNa Batara. Imanga nakoro'bangkangi anjo passarea untu' pannangkasina dosana anjo taua, na lanipammopporang ri Batara.

KAIMANGNGANG 5:6

Na untu' antangkasi anjo dosana, musti angngerangi anjo taua sikayu gimbala' yareka bembe gana untu' napassareang mae ri Batara. Imanga musti napassareangi anjo koro'banga sollanna nipammopporang dosana anjo taua.

KAIMANGNGANG 6:7

Imanga nakoro'bangkangi anjo koro'banga untu' dosana anjo taua, na lanipammopporang ri Batara.

PAMMILANGNGANG 15:25

Nampa musti nagaukang imanga upacara pammopporang dosaya untu' ummaka. Lanipammopporangi ke'nanga lanri tenana nakunjungi anggaukangi anjo dosaya, siagang lanri angngerannamo ke'nanga koro'bang pammopporang dosa kammayatompa koro'bang nitunu mae ri Batara.

PAMMILANGNGANG 15:28

Imanga musti nagaukangi upacara pammopporang dosaya ri dallekanNa Batara, sollanna nanipammopporang dosana anjo taua.

ROMA 5:11

Ba'lalo la'biangampa pole, marannu tommi pa'maitta lanri kabajikanNa Allata'ala tete ri Batarata Isa Almasi. Nasaba' mannete ri Isa Almasi nanikasia'mo anjo passisambungang bajika siagang Allata'ala.

GALATIA 3:13

Mingka le'ba' maki' Napakabella Almasi battu ri pangngalarroiNa Allata'ala lanri hukkung-hukkung agamaya. Napassareammi KalenNa nituju ri pangngalarroia passabakkang ikatte. Nasaba' nia' tattulisi' lalang ri Kittaka angkanaya, “Cilakami tau mate nigentunga irate ri kayu sallika.”

IBRANI 1:3

Iami ampaccayai lalang ri KalenNa singara' kalompoanNa Allata'ala; Iami rupa ma'nyataNa battu ri KalenNa Allata'ala. Iatommi angkatutui kajarrekanna anne linoa, siagang sanna' makoasana kana Napaua. Ri le'ba'namo Nasare oloang rupataua untu' nilappassang battu ri dosa-dosana, mangemi ammempo ri empoang kala'biranNa ri suruga, ammarenta siagang Allata'ala, anna'galaka koasa kaminang tinggi.

IBRANI 2:17

Jari battuanna, angkanaya Iami musti a'jari sangkamma sari'battanNa ngaseng lalang ri sikontu-kontuna. Siagang lanri kammanami anjo nakkullemo a'jari Imang Malompo, Ia tamalanrea siagang lompo pangngamaseanga. Battu ri iaminjo palayananNa nakkullemo nipammopporang dosana rupataua.

IBRANI 9:14

la'biangampa pole cera'Na Almasi. Tete ri Roh mannannunganga, Napassareammi KalenNa Almasi mae ri Allata'ala a'jari koro'bang sukkuka baji'na. Cera'Na antangkasi ati mailalanta battu ri upacara agama tenaya matu-matunna sollanta akkulle a'jari palayang mae ri Allata'ala mattallasaka.

1 YOHANES 1:7

Mingka punna attallasakki' lalang ri singaraka, sangkamma Allata'ala niaki lalang ri singaraka, assiama' maki' massing para ikatte lalang ri katallassanta; kammayatompa nitangkasimi sikontu dosa-dosata lalang ri cera'Na Isa, Ana'Na Allata'ala.

1 YOHANES 2:2

Tete ri Ia minjo Isa Almasi nanipammopporang dosa-dosata. Siagang teai dosa-dosataji bawang, passangalinna dosana pole sikontu rupataua.

PAPPICINI' 1:5

siagang battu ri Isa Almasi, sa'bi tamamminraya. Iami uru-uru nipattallasa' poleanga ammotere' battu ri kamateanga siagang Iami makoasaya irateanganna sikamma karaeng niaka ri lino. Nakamaseangki' Isa, siagang lanri kamateanNa naNapata'lappasa' maki' battu ri dosa-dosata ngaseng.