KAIMANGNGANG 22:4 - KITTA' MATANGKASA'

⁴ Punna nia' jari-jarina Harun nataba garring bukkuleng iamintu garring sala, yareka garring baine sa'genna assulu' je'neka battu ri katauanna, tena nipa'biangi angkanrei kanre passare matangkasaka punna tenapa natangkasa' kalenna. Se'rea imang a'jari ra'masaki punna naseroi barang ra'masaka lanri le'baki nataba maya'. A'jari ra'masa' tongi punna assulu' je'ne' kebo'na battu ri katauanna,

KAIMANGNGANG 22:4 ပူးပေါင်းရင်းမြစ်များ

KAIMANGNGANG 11:39

Inai-nai anseroi bakke olo'-olo' hallalaka a'jari ra'masaki sa'genna labu alloa.

KAIMANGNGANG 15:17

Sikamma barang-barang battu ri kaeng yareka kukkulu' natabaya anjo je'ne' katauanna musti nisassai; anjo baranga ra'masaki sa'genna labu alloa.

KAIMANGNGANG 2:10

La'binnaya, iaminjo bageanna sikamma imanga. Anjo rotia teai sipato' tangkasa'na lanri niallei battu ri kanre le'bakamo nipassareang mae ri Batara.

KAIMANGNGANG 2:3

La'binna anjo koro'bang nipatalaya iaminjo bageanna sikamma imanga. Anjo koro'banga teai sipato' tangkasa'na lanri niallei battu ri kanre le'bakamo nipassareang mae ri Batara.

KAIMANGNGANG 21:1

Nasuroi Batara anjo Musa ampabattui anne parentaya mae ri sikamma imang jari-jarina Harun angkanaya, “Se'rea imang takkulleai nara'massi kalenna lanri amminawanna anghaderi upacara panguburanna bija pammanakanna,

KAIMANGNGANG 21:22

Mingka akkullei nakanre kanre nipassareanga, baji' koro'bang kanre-kanreang matangkasaka kammayatompa koro'bang kanre-kanreang sannaka matangkasa'na.

HAGAI 2:13

Nampa akkuta'nang pole Hagai angkana, “Ebara' angkana nia' tau a'jari ra'masa' lanri anna'galaki maya', nampa nata'gala' kalase'renna anjo kanre-kanreanga, apaka anjo kanrea a'jari ra'masa' tongi?” Appialimi sikamma imanga angkana, “Iyo, tantumi!”

PAMMILANGNGANG 18:19

Sa'genna satunggu-tungguna, sikontu passare nisa'la' naeranga tu Israel mae ri Nakke, Kupassareangi mae ri kau siagang mae ri sikamma ana'nu bura'ne baine. Anne paratoranga nipakei sa'genna satunggu-tungguna siagang a'jari passikko' parjanjiang tenaya nakkulle nipinra, battu ri Nakke siagang ikau na jari-jarinu.”

PAMMILANGNGANG 18:9

Battu ri passare kaminang matangkasa' tenaya nitunui irate ri tampa' pakkoro'bangnganga, anne kammaya anne untu' ikau: Koro'bang nipatala, koro'bang pammopporang dosa, siagang koro'bang passambe karugiang. Yangasenna anjo sikammaya passare matangkasa' a'jaria bageannu siagang bageanna sikamma ana'nu.

PAMMILANGNGANG 19:20

Tau a'jari ra'masaka siagang tena nagaukangi upacara pannangkasia ri kalenna, tuli ra'masa'na lanri tenapa nanitiriki siagang je'ne' upacara. Nara'massi KemaNa Batara, siagang tenamo nanibilangi anggota umma'Na Allata'ala.