KAIMANGNGANG 12:8 - KITTA' MATANGKASA'

⁸ Punna tena pakkullena anjo bainea appasadia sikayu ana' gimbala', musti angngerangi ruang kayu jangang-jangang bodobangkeng yareka bukkuru' rungka: sikayu untu' koro'bang nitunu na sikayu untu' koro'bang pammopporang dosa. Imanga musti nagaukangi upacaraya untu' antangkasi kara'massanna anjo bainea, sa'genna a'jari tangkasa'.

KAIMANGNGANG 12:8 ပူးပေါင်းရင်းမြစ်များ

KAIMANGNGANG 1:14

Punna jangang-jangang anjo napassareanga, musti bukkuru' yareka jangang-jangang bodobangkeng rungkaya.

KAIMANGNGANG 12:7

Imanga musti napassareangi anjo passarea mae ri Batara siagang nagaukang upacaraya untu' antangkasi kara'massanna anjo bainea, sa'genna a'jari tangkasa'. Jari iaminjo musti nagaukang se'rea baine punna le'ba' ammana'.

KAIMANGNGANG 13:1

Napassareangi Batara mae ri Musa siagang Harun anne paratorang-paratoranga:

KAIMANGNGANG 14:21

Punna kasi-asi anjo taua siagang tena pakkullena, akkullei angngerang sikayumo bawang ana' gimbala' laki untu' koro'bang passambe karugiang, a'jari koro'bang nipatala mae ri Batara. Pantaranganna anjo sikilo labu' nipasileoka siagang minynya' zaitun untu' koro'bang nipatala, siagang bage tallunna silitereka minynya' zaitun.

KAIMANGNGANG 14:22

Musti angngerang tongi ruang kayu jangang-jangang bodobangkeng rungka yareka bukkuru' rungka: sikayu untu' koro'bang pammopporang dosa na sikayu pole untu' koro'bang nitunu.

KAIMANGNGANG 15:14

Ri makasagantujuna alloa, musti angngerangi ruang kayu jangang-jangang bodobangkeng yareka bukkuru' rungka mange ri dallekang pakke'bu' KemaNa Batara, nampa napassareang mae ri imanga.

KAIMANGNGANG 15:15

Imanga musti napassareangi sikayu anjo jangang-janganga untu' koro'bang pammopporang dosa, siagang anjo sikayua untu' koro'bang nitunu. Kammaminjo na nagaukammo imanga upacara pannangkasia mae ri anjo taua ri dallekanNa Batara.

KAIMANGNGANG 15:29

Ri makasagantujuna alloa musti angngerangi ruang kayu jangang-jangang bodobangkeng rungka yareka bukkuru' rungka mange ri imanga ri dallekang pakke'bu' KemaNa Batara.

KAIMANGNGANG 4:26

Nampa sikontu jannana anjo olo'-oloka musti nitunui irate ri tampa' pakkoro'bangnganga, sangkamma nigaukanga ri koro'bang passiamakkanga. Kammaminjo carana imanga ampassareangi koro'banga untu' dosana se'rea tau anna'gala' koasa, na nipammopporammo dosana anjo taua ri Batara.

KAIMANGNGANG 5:11

Punna tena pakkullena anjo tau kasalanga appasadia sipasang bukkuru' yareka jangang-jangang bodobangkeng untu' koro'bang nipammopporanna dosaya, musti angngerangi sikilo labu'. Anjo labuka takkulleai nipasileo' siagang minynya' zaitun yareka nipasierang kamanynyang, nasaba' anjo koro'banga iamintu koro'bang nipammopporanna dosaya, teai koro'bang nipatala.

KAIMANGNGANG 5:7

Mingka punna tena pakkullena anjo tau kasalanga appasadia gimbala' yareka bembe untu' antangkasi dosana, musti angngerangi sipasang jangang-jangang bukkuru' yareka jangang-jangang bodobangkeng rungka, sikayu untu' koro'bang nipammopporanna dosana, nampa sikayu pole untu' koro'bang nitunu.

MATIUS 21:12

Le'baki anjo antama'mi Isa ri Balla'Na Batara. Nabongka ngasemmi sikamma tau niaka anjoreng a'balu'-balu'. Nabulinta' ngasemmi mejang-mejanna pasambe doeka, kammayatompa bangko-bangkona pabalu' jangang-jangang bodobangkenga.

2 KORINTUS 8:9

Nasaba' baji' ngaseng nuassenna angkanaya teai sipato' nikarimangnginta ri Isa Almasi Batarata: Kalumanynyangi, mingka Napa'jari kasi-asimi KalenNa untu' kaparalluannu ngaseng; sollanna battu ri kakasi-asianNa nukkulle a'jari kalumanynyang.