KAIMANGNGANG 12:7 - KITTA' MATANGKASA'

⁷ Imanga musti napassareangi anjo passarea mae ri Batara siagang nagaukang upacaraya untu' antangkasi kara'massanna anjo bainea, sa'genna a'jari tangkasa'. Jari iaminjo musti nagaukang se'rea baine punna le'ba' ammana'.

KAIMANGNGANG 12:7 ပူးပေါင်းရင်းမြစ်များ

AYUB 1:5

Punna le'ba' anjo massing pa'gaukanga, tuli ambangung bari'basaki Ayub nampa assare koro'bang untu' tungga'-tunggala' ana'na sollanna nipammopporang ke'nanga ri Batara. Saba' nakana pikkiranna Ayub, gassingka dorakami anjo ana'-ana'na siagang nahinai Allata'ala natanaassenga kalenna.

AYUB 14:4

Maka akkullei tau dorakaya appa'nia' apa sukku' baji'na?

KAIMANGNGANG 1:4

Nampa musti napadongkoki limanna irate ri tompo' ulunna anjo olo'-oloka, na Natarimamo Batara anjo passarena untu' nipammopporang dosana.

KAIMANGNGANG 12:6

Punna le'ba'mo wattu pannangkasina, baji' lanri le'ba'na allassukang ana' bura'ne yareka ana' baine, anjo bainea musti angngerangi passare mange ri imanga ri dallekang pakke'bu' KemaNa Batara. Anjo passarea iamintu sikayu ana' gimbala' umuru' sitaunga untu' koro'bang nitunu, siagang sikayu jangang-jangang bodobangkeng rungka yareka bukkuru' rungka untu' koro'bang pammopporang dosa.

KAIMANGNGANG 12:8

Punna tena pakkullena anjo bainea appasadia sikayu ana' gimbala', musti angngerangi ruang kayu jangang-jangang bodobangkeng yareka bukkuru' rungka: sikayu untu' koro'bang nitunu na sikayu untu' koro'bang pammopporang dosa. Imanga musti nagaukangi upacaraya untu' antangkasi kara'massanna anjo bainea, sa'genna a'jari tangkasa'.

KAIMANGNGANG 15:15

Imanga musti napassareangi sikayu anjo jangang-janganga untu' koro'bang pammopporang dosa, siagang anjo sikayua untu' koro'bang nitunu. Kammaminjo na nagaukammo imanga upacara pannangkasia mae ri anjo taua ri dallekanNa Batara.

KAIMANGNGANG 4:20

Ia carana sangkammai passare sapi laki nipassareanga untu' nipammopporanna dosaya. Kammaminjo carana Imang Lompoa ampassareangi koro'banga untu' nipammopporanna dosa-dosana ummaka, na nipammopporammo anjo dosa-dosaya ri Batara.

KAIMANGNGANG 4:26

Nampa sikontu jannana anjo olo'-oloka musti nitunui irate ri tampa' pakkoro'bangnganga, sangkamma nigaukanga ri koro'bang passiamakkanga. Kammaminjo carana imanga ampassareangi koro'banga untu' dosana se'rea tau anna'gala' koasa, na nipammopporammo dosana anjo taua ri Batara.

KAIMANGNGANG 4:31

Sikontu jannana anjo olo'-oloka musti niallei sangkamma todong nigaukanga ri koro'bang passiamakkanga. Anjo jannaya musti natunui imanga irate ri tampa' pakkoro'bangnganga, sollanna rasanna napakasannangi nyawaNa Batara. Kammaminjo carana imanga ampassareangi koro'banga untu' dosana se'rea ra'ya' biasa, na nipammopporammo dosana anjo taua ri Batara.

KAIMANGNGANG 4:35

Nampa musti nialle ngaseng sikontu jannana anjo olo'-oloka sangkamma nigaukanga ri koro'bang passiamakkanga. Anjo jannaya musti nitunui irate ri tampa' pakkoro'bangnganga, siagang ngaseng koro'bang nikanre maraenganga ia nipassareanga mae ri Batara. Kammaminjo carana imanga ampassareangi koro'bang untu' nipammopporanna dosana anjo taua, na nipammopporammo dosana ri Batara.

ROMA 3:23

sikontu rupataua doraka ngasemmi siagang bellami battu ri Allata'ala, akkullea ampasalamaki ke'nanga.

ROMA 3:26

Mingka kamma-kamma anne Natuntu'mi Allata'ala dosa-dosaya, lanri ero'na Napa'butti kaadelanNa. Kammaminjo carana, naNapappicinikammo katojenganNa; na inai-nai tappa' mae ri Isa, Napa'nyatami mae ri anjo taua angkanaya assibajikimi ammotere' siagang Allata'ala.

1 KORINTUS 7:14

Nasaba' bura'ne tenaya natappa' a'jari nipassiratangi ri Allata'ala, a'jari umma'Na Allata'ala lanri pa'buntinganna siagang anjo baine a'jariamo umma'Na Allata'ala. Kammayatompa, anjo baine tenayapa natappa', akkullei a'jari nipassiratang a'jari umma'Na Allata'ala, lanri pa'buntinganna siagang anjo bura'ne a'jariamo umma'Na Allata'ala. Punna takammaya, anjo ana'-ana'na ke'nanga tantu la'jari sangkammai ana'-ana' kapereka, padahala' anjo ana'-anaka nipasanrapangi anggota umma'Na Allata'ala.

GALATIA 3:28

Lalang ri kammana anjo tenamo nanipasimmaraengi tu Yahudia siagang bansa-bansa maraenga, yareka ataya siagang tau bebasaka, yareka tu bura'nea na tu bainea. A'jari se're ngaseng mako lanri Isa Almasi.