KAIMANGNGANG 10:13 - KITTA' MATANGKASA'

¹³ Anjo rotia musti anjorengi ri tampa' matangkasaka nikanre, lanri battu ri iaminjo kanre le'baka nipassareang mae ri Batara, anjo rotia a'jari bageannu siagang ana'-ana'nu bura'nea. Iaminjo parentaNa Batara mae ri nakke.

KAIMANGNGANG 10:13 ပူးပေါင်းရင်းမြစ်များ

YEHEZKIEL 42:13

Nakana anjo tu bura'nea ri nakke, “Anjo ruaya bangunang matangkasaki. Anjoreng, sikamma imanga akkulle andallekang ri kahaderanNa Batara, angnganre koro'bang kaminang matangkasaka. Anjoreng tommi musti natampakkang ke'nanga sikamma koro'bang kaminang matangkasaka, iamintu: koro'bang gandung siagang koro'bang pannangkasi dosa yareka koro'bang sambe karugiang.

KAIMANGNGANG 10:12

Nakana Musa ri Harun siagang ruaya ana'na, iamintu Eleazar siagang Itamar, “Allei la'binna gandung kanre nipassareanga mae ri Batara. Battu ri anjo labuka apparekko roti tenaya nammake pa'gambang, nampa nukanre ri sa'rinna tampa' pakkoro'bangnganga, lanri anjo koro'banga teai sipato' tangkasa'na.

KAIMANGNGANG 10:14

Mingka ikau ngaseng siagang ana'-ana'nu bura'nea siagang ana'-ana'nu bainea akkullei nukanre barambanna koro'bang nipappicinikanga siagang passare nisa'laka. Iaminjo bageanna sikamma imanga battu ri koro'bang passiamakkanna bansa Israel. Akkullei nukanre ri sambarang tampa' tenaya nara'masa'.

KAIMANGNGANG 2:3

La'binna anjo koro'bang nipatalaya iaminjo bageanna sikamma imanga. Anjo koro'banga teai sipato' tangkasa'na lanri niallei battu ri kanre le'bakamo nipassareang mae ri Batara.

KAIMANGNGANG 6:16

La'binna anjo labuka musti nipareki roti tenaya nammake pa'gambang siagang nakanrei sikamma imanga ri tampa' le'baka nipattantu untu' anjo, iamintu ri paranglakkenna KemaNa Batara. Iaminjo bageanna sikamma imanga ia Napassareanga Batara mae ri ke'nanga battu ri koro'bang nipatalaya. Anjo kanrea teai sipato' tangkasa'na, sangkamma koro'bang nipammopporanna dosaya siagang koro'bang passambe karugiang.

PAMMILANGNGANG 18:10

Anjo kammaya matangkasaki mae ri kau, jari musti anjoreng tongi ri tampa' matangkasaka musti nukanre. Tu bura'neaji bawang akkulle angkanrei.

PAMMILANGNGANG 5:10

Apa napassareanga se'rea tau mae ri Batara, bageanna todong anjo tau assarea. Poro anjo bawang napassareanga mae ri imanga, a'jari bageanna anjo imanga.