KAIMANGNGANG 10:12 - KITTA' MATANGKASA'

¹² Nakana Musa ri Harun siagang ruaya ana'na, iamintu Eleazar siagang Itamar, “Allei la'binna gandung kanre nipassareanga mae ri Batara. Battu ri anjo labuka apparekko roti tenaya nammake pa'gambang, nampa nukanre ri sa'rinna tampa' pakkoro'bangnganga, lanri anjo koro'banga teai sipato' tangkasa'na.

KAIMANGNGANG 10:12 ပူးပေါင်းရင်းမြစ်များ

2 PATTOTTORANG 31:14

Kore ana'na Yimna, tu Lewi, a'jari kapala pangawala' ri Pakke'bu' Lompo Timboro'na Balla'Na Batara, nisarei tugasa' untu' antarimai passare-passare nipassareanga mae ri Batara, nampa nabage-bage.

EZRA 7:5

Abisua Pinehas Eleazar Imang Lompoa Harun.

KALAPPASSANG 29:2

Apparekko leokang battu ri tarigu kaminang bajika tenaya nammake pa'gambang. Sipa'gang anjo leokanga musti nipareki roti siagang minynya' zaitun, sipa'gang maraenga tena nammake minynya', nampa la'binna nipareki kanrejawa nisapua siagang minynya'.

KALAPPASSANG 29:33

Musti nakanrei ke'nanga kanre nikoro'bangkanga lalang ri upacara pammopporang dosa ri wattunna palantikang. Imangaji bawang akkulle angkanrei kanre le'baka nisa'la' untu' iNakke.

KALAPPASSANG 6:23

Korah nia' tallu ana'na bura'ne, iamintu: Asir, Elkana, siagang Abiasaf. Iaminjo ke'nanga boe-boena golongang kaluargana Korah.

YEHEZKIEL 44:29

Katallassanna ke'nanga iamintu musti battu ri gandung passarea, koro'bang pannangkasi dosa, siagang koro'bang passambe karugiang; sikontu-kontuna apa nipassareanga mae ri Nakke, musti nisareangi ke'nanga.

KAIMANGNGANG 10:13

Anjo rotia musti anjorengi ri tampa' matangkasaka nikanre, lanri battu ri iaminjo kanre le'baka nipassareang mae ri Batara, anjo rotia a'jari bageannu siagang ana'-ana'nu bura'nea. Iaminjo parentaNa Batara mae ri nakke.

KAIMANGNGANG 21:22

Mingka akkullei nakanre kanre nipassareanga, baji' koro'bang kanre-kanreang matangkasaka kammayatompa koro'bang kanre-kanreang sannaka matangkasa'na.

KAIMANGNGANG 24:9

Anjo rotia iami untu' bageanna Harun siagang jari-jarina. Musti nakanrei ke'nanga ri tampa' matangkasaka, nasaba' anjo rotia iamintu bageang sannaka tangkasa'na battu ri koro'bang nipassareanga mae ri Batara untu' sikamma imanga.

KAIMANGNGANG 7:9

Tunggala' koro'bang nipatalaya ia nitunua lalang ri pattunuanga yareka nipallua lalang ri pamaja' yareka nilanggaya, a'jari bageanna imang tugasaka ampassareangi anjo wattua.

PAMMILANGNGANG 3:2

Harun nia' appa' ana'na bura'ne, iamintu: Nadab kaminang toaya, nampa Abihu, Eleazar siagang Itamar.