IBRANI 9:28 - KITTA' MATANGKASA'

²⁸ Kammatommi anjo Almasi. Sikaliji bawang nipassareang a'jari koro'bang, najai tau Natangkasi dosana. Labattu poleangi makapinruanna. Mingka teaimi untu' antanggongi dosaya; passangalinna untu' ampasalamaki sikamma tau antayangai kabattuanNa.

IBRANI 9:28 ပူးပေါင်းရင်းမြစ်များ

YESAYA 25:9

Anjo wattua lanakana taua, “Sikontutojenna, Iami Allata'alata; Iami nitayanga, sollanta Napasalama'. Tojeng, Iaminne Batara; Iami nitayanga. Anne kamma akkio' rannu maki', saba' le'ba' maki' Napasalama'.”

KAIMANGNGANG 10:17

“Angngapa natena nukanrei anjo koro'bang pammopporang dosaya ri tampa' matangkasaka? Anjo koro'banga teai sipato' tangkasa'na; Napassareangi Batara mae ri kau, sollanna nipammopporang dosana umma' Israel.

ZAKHARIA 14:5

Lalariko allalo ri anjo lappara' ka'bung ambage ruayai anjo buluka. Lalariko sangkamma boe-boenu ri wattunna ta'ge'goso' buttaya ri wattu ammarentana Uzia, iamintu karaenna Yehuda. Nampa battu Karaeng Allata'alaku, nirurungang ri sikontu malaekaka.

PAMMILANGNGANG 18:1

Nakana Batara mae ri Harun, “Ikau, ana'-ana'nu siagang tu Lewia, musti natanggongi kale'bakkanna kakodianna sikamma kasalang kajarianga lalang ri KemaKu; mingka ikauji bawang siagang sikamma ana'nu antanggongi kasalang kajarianga lalang ri jama-jamanna imanga.

PAMMILANGNGANG 18:23

Appakkaramula kamma-kamma anne tu Lewiji bawang akkulle angngurusuki KemaKu siagang ampisangi tanggong jawaka mae ri anjo jama-jamanga. Anjo paratoranga nipake tongi mae ri jari-jarinu sa'genna satunggu-tungguna. Tu Lewi tena pambageang warisi'na ri Israel,

MATIUS 20:28

Sangkamma minjo Ana' Ma'rupataua; niaki battu teai sollanna nanilayani, passangalinna sollanna na'jari palayang. NaNapassareang nyawaNa, sollanna nakkulle Napasalama' tau jaia.”

MATIUS 25:31

“Punna battu sallang Ana' Ma'rupataua a'jari Karaeng siagang nirurungang ri sikontu malaeka'Na, lammempomi irate ri empoang kala'biranNa.

MATIUS 26:28

Nasaba' iaminne cerakKu, ampakajarrekai janjinNa Allata'ala – cera' nipasolonga, sollanna akkulle nipammopporang sikontu dosana tau jaia.

YOHANES 14:3

Punna le'ba'Ma' a'lampa ampasadiang ngasengko tampa', lammotere' poleamMa' angngalle ngasengko; sollanna kemae-kemae pammantangangKu, lania' ngaseng tommako anjoreng.

LAMPA-LAMPANA 1:11

Nakanamo anjo tau ruaya, “E, ikau ngaseng tu battua ri Galilea, angngapa nummantang bawang antureng acconga nai' ri langika? Anjo Isa, nucinika ta'angka' nai' ri suruga, labattu poleangi sallang lalang kala'biranNa, sangkamma la'biri'Na ri wattunna nucini' nai' ri suruga sumpadeng.”

ROMA 3:25

Nakoro'bangkangi Allata'ala anjo Isa Almasi; sollanna, lanri kamateanNa anjo Isa Almasi, nilappassammi rupataua battu ri dosa-dosana, punna tappa'ja ke'nanga mae ri Isa Almasi. Nagaukammi Allata'ala kammaya anjo, lanri eroki Napappicinikang kaadelanNa. Nasaba' ri wattu allaloa, Nasa'barrammi Allata'ala dosa-dosana rupataua, sa'genna tena naNahukkungi ke'nanga.

ROMA 5:15

Mingka tena nasangkamma anjo tau ruaya; nasaba' lompoangangi passareNa Allata'ala punna nipasiukkuruki siagang dosa nagaukanga Adam. Passabakkang se're tau sala najaimo tau mate. Mingka la'biangampa lompona pangngamaseanNa Allata'ala siagang hadia kasalamakkang Napassareanga mae ri sannaka jaina tau tete ri baji' pa'mai'na se'rea tau iamintu Isa Almasi.

ROMA 6:10

Anjo kamateang Naoloa Almasi iami kamateang mae ri dosaya. Anjo sikaliji kajariang sa'genna satunggu-tungguna. Na anjo katallassang Naoloa ri kamma-kammaya anne, iamintu katallassang untu' mae ri Allata'ala.

ROMA 8:23

Ba'lalo teai linoa bawang akkunrareng; passangalinna manna ikatte akkunrareng tongi lalang atinta. Le'ba'mi nitarima RohNa Allata'ala. Iaminjo passare uru-uruNa Allata'ala. Mingka attayangijaki', sollanna nilappassang todong sikontu batangkalenta ri Allata'ala siagang Napa'jariki' ana'-ana'Na.

ROMA 8:3

Apa tenaya nakkulle nagaukang hukkung-hukkung agamaya, lanri lammana batangkalenta ikatte rupataua, iaminjo le'ba' Nagaukang Allata'ala. Le'ba'mi Nabeta Allata'ala koasana dosaya lalang ri sipa'na rupataua; iamintu lalang Nasurona battu Ana' KalenNa, le'bakamo battu sanrapang rupatau dorakaya, sollanna Natangkasi dosa-dosata.

1 KORINTUS 1:7

sa'genna tenamo nukakurangang barakka' manna sirupa, lalang nutayanna kabattuanNa Batarata Isa Almasi ampa'nyatai KalenNa mae ri sikontu rupataua.

1 KORINTUS 15:54

Punna nisambeimo tubu akkullea mate siagang tubu tenaya nakkulle mate, siagang anne tubu battua ri lino nisambeimi siagang tubu battua ri suruga, anjo wattua nampami kajariang apa niaka tattulisi' lalang ri Kittaka angkanaya, “Le'ba'mi nipattaena kamateanga; nigappami ammetaya!”

1 TESALONIKA 1:10

Nacarita tommi ke'nanga antekamma batenu anrannuangi kabattuanNa Ana'Na Allata'ala battu ri suruga, iamintu Isa, le'baka nipattallasa' poleang ammotere' battu ri kamateanga ri Allata'ala. Ia tomminjo Isa ampasalamakki' battu ri pangngalarroiNa Allata'ala labattua sallang.

2 TESALONIKA 2:1

Ri passala'na kabattuanNa Batarata Isa Almasi, siagang lanipasse'reta ngaseng untu' sipammantangang siagang Batara, iaminne kupala' tojeng-tojenga mae ri kau ngaseng:

2 TIMOTIUS 4:8

Na kamma-kamma anne sadiami hadia pammetangku. Ri Allo Kiamaka sallang, laNapassareammi Batara, Haking adeleka, anjo hadiaya mae ri nakke, lanri assibajikingku siagang Allata'ala lalang ri katallassangku. Siagang teai inakkeji bawang lannarima hadia kammaya anjo, mingka sikontu pole tau sannaka nakku'na antayangi kabattuanNa Batara.

TITUS 2:13

Kamma-kamma anne nitayammi anjo Allo niminasaya; anjo Alloa lanacini'mi bonena linoa kala'biranNa Isa Almasi, iamintu Allata'ala Kaminang Lompoa siagang Karaeng Mappasalamatta.

IBRANI 1:14

Jari punna kamma, apai sikontutojenna anjo malaeka'-malaekaka? Anjo ke'nanga, iamintu roh-roh allayaniai Allata'ala, siagang nisuroa ri Allata'ala antulungi sikontu tau lannarimaya kasalamakkang.

IBRANI 10:10

Le'ba'mi Nagaukang Isa Almasi apa Nakaerokia Allata'ala, na Napassareang KalenNa a'jari koro'bang. Poro sikaliji bawang Nagaukang untu' satunggu-tungguna, na nitangkasimo dosa-dosata ngaseng.

IBRANI 12:14

Usahako sollannu assiama' siagang yangasenna taua lalang katallassannu; kammayatompa usahako sollannu a'jari tangkasa' ri dallekanNa Batara. Nasaba' punna takammaya anjo tena manna sitau akkulle anciniki Batara.

IBRANI 2:3

La'biangampa pole anjo kasalamakkang hebakkanganga na anjo sikamma pappasanga. Punna tena nanijampangi anjo kasalamakkanga, mattantu takkulleaki' lata'lappasa' battu ri hukkunganga. Nasaba' KalenNa Batara uru-uru ampa'la'bangi anjo kasalamakkanga; na sikamma tau uru-uru allangngerekai le'ba'mi napa'butti katojenganna mae ri katte.

IBRANI 4:15

Anjo Imang Malompota teai imang tenaya nakkulle amminawang angkasiaki kapa'risanta. Passangalinna, le'ba' tommi Nataba paccoba lalang a'rupa-rupa passala', sangkamma todong massing-massing ikatte; iaji bawang tena Nagaukangi dosaya!

IBRANI 5:9

Jari ri le'ba'namo nipa'jari Tumappasalama', a'jarimi patteteang kasalamakkang mannannungang mae ri sikamma tau mannurukia ri Ia;

IBRANI 7:27

Tasangkammayai imang-imang lompo maraenganga, allo-alloa angngerang koro'bang lanri dosa-dosa kalenna rolong, nampa koro'bang lanri dosa-dosana ummaka. Isa, sikaliji bawang angngerang koro'bang untu' satunggu-tungguna, iamintu ri wattunna Napassareang KalenNa a'jari koro'bang.

IBRANI 9:25

Taung-taungi Imang lompona tu Yahudia antama' ri Kamara' Kaminang Matangkasaka lalang ri Balla'Na Batara. Antamaki angngerang cera'na sikayua olo'-olo'. Mingka antamaki Almasi angkoro'bangkangi KalenNa tena nauntu' a'mole-mole.

1 PETRUS 2:24

KalenNa Almasi ampisangi sikontu dosa-dosata irate ri kayu sallika, sollanta akkulle bebasa' battu ri kakoasanna dosaya, siagang nakiattallasa' situru' ero'Na Allata'ala. Loko'-loko'Nami Almasi ampamolleko ri garrinnu.

1 PETRUS 3:18

Nasaba' le'ba'mi sikali mate Almasi untu' satunggu-tungguna passabakkang dosana rupataua; Ia tena salanna mingka matemi untu' tau salaya. Nagaukammi Almasi kammaya anjo sollannu akkulle Narurungang ngaseng mae ri Allata'ala. Nibunomi tubuNa, mingka nipattallasa' poleammi ammotere' katallassang rohaniNa.

2 PETRUS 3:12

lalang nutayanna siagang nupakalinta'na Allo kabattuanNa Allata'ala. Anjo Alloa lala'busuki nakanre pepe' langika, siagang lassolongi sikamma apa-apa niaka ri langi' napakamma bambang.

1 YOHANES 3:2

Sikamma sari'battangku sannaka kukarimangnginna! Ikatte kamma-kamma anne ana'-ana'Na maki' Allata'ala, mingka antekamma kajarianta sallang, tenapa na'nassa. Mingka niassengi angkanaya punna battu sallang Almasi, la'jari sangkamma maki' Ia, nasaba' lanicini'mi kalenta sitojeng-tojennaya.

1 YOHANES 3:5

Nuassengi angkanaya battui Almasi untu' antangkasi dosa-dosana rupataua, siagang angkanaya tena dosa lalang ri KalenNa.

YUDAS 1:21

siagang tuli a'la'lang mako irawangang pangngamaseanNa Allata'ala, lalang nutayanna passareNa Batarata Isa Almasi, Ia lassareako katallassang sitojennaya siagang mannannunganga.

PAPPICINI' 1:7

Ciniki, niakI battu lalang ri rammanga! Sikontu rupataua lanacini' ngasengI, kammayatompa tau le'baka antobokI poke. Lanri Iami nalappiraung ngaseng sikontu bansa-bansaya ri lino. Mattantu kammana! Aming!