HAKING-HAKING 20:26 - KITTA' MATANGKASA'

²⁶ Jari a'lampami pole umma' Israel mange ri Betel nampa angngarru' mae ri Batara. Anjoreng appuasai ke'nanga sa'genna bangngi siagang assarei koro'bang passiamakkang na koro'bang nitunu mae ri Batara.

HAKING-HAKING 20:26 ပူးပေါင်းရင်းမြစ်များ

PA'JARIANG 28:19

Naaremmi anjo tampaka Betel. (Riolo arenna Lus.)

2 SAMUEL 3:35

Sikabusu'na alloa taua anynyonyoki Daud sollanna angnganre sike'de', mingka assumpai angkana, “Poro Nabuno laloa' Allata'ala punna angnganrea' lalang tenanapa nalabu alloa!”

2 PATTOTTORANG 20:3

A'jari malla'mi Yosafat nampa appala' doang untu' appala' pangngunju' battu ri Batara. Nampa naparentakang sollanna appuasa kabusu' sikontu ra'yaka.

EZRA 8:21

Nampa kupa'la'bammo kupau anjoreng ri biring Binanga Ahawa angkana sikontu taua musti appuasai siagang napakatunai kalenna ri dallekanNa Allata'ala. Appala' doammi ikambe sollanna nipimping ikambe ri Allata'ala lalang ri anjo pa'jappanga, siagang Najagai ikambe, ana'-ana'na ikambe, siagang sikontu barang-baranna ikambe.

YEREMIA 36:9

Ri bulang salapang taung makalima pamarentahanna Yoyakim karaeng Yehuda, appuasai ra'yaka untu' ampalaki pangngamaseanNa Batara. Pandudu'na Yerusalem siagang sikamma tau battua ri kota-kota Yehuda, appuasa ngasengi.

YO"EL 1:14

Parentakangi umma'nu untu' appuasa, pappiassengangi passibuntulang lompoa! Kioki sikamma pamimpinga siagang tutoa-toaya, kammayatompa sikontu pandudu'na Yehuda, sollanna battu mae ri Balla'Na Allata'ala, untu' akkio' appala' tulung mae ri Ia.

YOSUA 24:1

Napasse'rei Yosua suku-suku bansa Israel ri Sikhem, nampa nasuro sikamma tau toa-toaya, sikamma pamimpinga, sikamma hakinga siagang sikamma perwira tantaraya battu andallekang. Jari battu ngasemmi ke'nanga andallekang ri Allata'ala.

YOSUA 7:6

Sanna'mi si'nana pa'mai'na Yosua siagang sikamma pamimping umma'na Israel sa'genna nakekke'-kekke' pakeanna ke'nanga, siagang su'ju'mi ke'nanga sila'busu' allo ri dallekanna Patti ParjanjianNa Batara; nasareimi au ulunna ke'nanga salaku pammatei ri si'nana pa'mai'na ke'nanga.

HAKING-HAKING 20:18

A'lampai anjo tantarana umma' Israel mange ri tampa' ibadaya ri Betel, nakkuta'nang ri Allata'ala angkana, “O, Batara, suku kereanga battu ri kambe musti uru-uru maju ambunduki tu Benyamin?” Appialimi Batara angkana, “Suku Yehuda.”

HAKING-HAKING 20:25

Nassulu'mo pole makapinruanna tu Benyamin a'bundu'. Anjo wattua nia' 18.000 tantara le'ba'na nilati tu Israel nabuno.

HAKING-HAKING 21:2

Kamma-kamma anne a'lampami ke'nanga mange ri Betel, nammempo si'na pa'mai'na sa'genna bangngi ri dallekanNa Batara. Angngarruki siagang akkioki ke'nanga mae ri Batara, angkana,

HAKING-HAKING 21:4

Ammukona, bari'basa' dudu, appaentemmi umma' Israel se're tampa' pakkoro'bangngang anjoreng, nampa assare koro'bang ke'nanga mae ri Batara iamintu koro'bang nitunu siagang koro'bang passiamakkang.

1 SAMUEL 11:4

Kammaminjo nabattumo anjo sikamma tunisuroa mange ri Gibea, tampa' pammantanganna Saul. Napabattuna ke'nanga anjo kabaraka, angngarru'mi ra'yaka lanri tappu' panrannuammi ke'nanga.

1 SAMUEL 7:6

A'rappungang ngasemmi ke'nanga ri Mizpa. Anynye'ro'mi ke'nanga je'ne' nampa napatiri' salaku passare mae ri Batara, nampa appuasa ke'nanga siallo kabusu', anjo alloa. Nakanamo ke'nanga, “Dorakami ikambe mae ri Batara.” (Anjoremmi ri anjo Mizpa napakaramulai Samuel ampakabajiki sikamma parkara passisala-pasalanga ri tu Israel.)