HABAKUK 2:9 - KITTA' MATANGKASA'

⁹ Nitunraiko ikau! Nupa'jari kalumanynyangi kaluarganu battu ri passawallang nugappaya lanri gau' palla'nu, sollanna balla' kalennu a'jari amang siagang bellai battu ri kasusaanga siagang balaya.

HABAKUK 2:9 ပူးပေါင်းရင်းမြစ်များ

PAMMUJI 49:11

Tena, ia lanaciniki angkanaya manna tau annabaya mate tonji. Tau dongoka siagang tau toloa para lapossoki, na nabokoi barang-baranna untu' tau maraenga.

PAMMUJI 52:7

Mingka ikau lanipossokko ri Allata'ala satunggu-tungguna; nijakkalakko siagang nire'resangko battu lalang ri balla'nu, siagang nipa'lanynyakko battu ri linona tau attallasaka.

YESAYA 28:15

Nukana kalennu le'ba' mako appare' panjanjiang siagang kamateanga, kammayatompa appare' passitujuang siagang lino tau matea. Nupattantui ri kalennu angkana anjo bala labattua sallang talanatujuako, lanri akkala' balle-ballenu.

YESAYA 5:8

Cilakako sikamma ammallia balla' siagang angngalle passaya koko untu' antambai barang-barannu! Tenamo nasallo nacappu' tampaka untu' tau maraenga sa'genna ikau mami ammantang ri anjo pa'rasanganga.

YEREMIA 17:11

Rapang jangang-jangang anggoppoki bayao teai bayaona, kammaminjo tau jekkonga anggappa pa'barang-barangngang. Ri attangnga umuru'na latappela' ngasengi barang-baranna. Ri kala'busang tallasa'na a'butti angkana ia tau dongo' sikali.

YEREMIA 22:23

Amangko ammantang nitammulili ri benteng camara Libanon, mingka sallang punna natuju mako kapa'risang, lasessa mako rapang baine eroka ammana'.”

YEREMIA 49:16

Lanitipuko ri katampoannu. Tena lamalla' ri kau kamma nukapanga. Ammantangko ri alla'-alla'na batua, bella ri coppo'na monconga. Mingka, manna pole nupare' balla'nu ri tampa' tinggi dudua, sangkamma tinggina ru'munna jangang-jangang rajawalia, mingka laNapanaungko Batara battu anjoreng. Batara ampaui yangasenna anjo.”

YEREMIA 51:13

Anjo pa'rasanganga teai sipato' kalumanynyanna siagang jai binangana, mingka lala'busu'mi wattu tallasa'na; battumi kala'busang katallassanna.

YEREMIA 51:53

Manna pole nakkulle Babel nai' ri langika siagang ambangung pattahangngang takkullea nirapi', mingka tuli laKupabattuna taua untu' ampanraki. INakke, Batara, anne akkana.”

YEHEZKIEL 22:27

Sikamma pagawe-pagawe pamarentana rapangi serigala angkae-kaei apa nakokkoka. Nagaukangi ke'nanga ammunoa lanri poro ero'na anggappa passawallang.

OBAJA 1:4

Manna pole nupare' balla'nu santinggi ru'munna jangang-jangang rajawali, siagang santinggi bintoenga ri langi', mingka ma'nassa laKutu'gurangko.

YUDAS 1:11

Cilaka ngasengi ke'nanga! Amminawammi ke'nanga rioloang le'baka naolo Kain. Napanaummi kalenna ke'nanga ri kalo'bang kalinguanga sangkamma Bileam, sollanna akkulle ke'nanga anggappa doe'. Na niancuru' tommo ke'nanga lanri angngewana sangkamma Korah.