HABAKUK 2:8 - KITTA' MATANGKASA'

⁸ Le'ba'mi nuella' jai bansa, mingka bansa-bansa akkullea ta'lappasa' langngellakko, lanri pammunoang le'baka nugaukang, siagang lanri kapallakkang le'baka nugaukang mae ri pa'rasangang-pa'rasanganga, kota-kotaya siagang pandudu'na.

HABAKUK 2:8 ပူးပေါင်းရင်းမြစ်များ

PAMMUJI 137:8

He Babel, ikau laniancurukko! Mate'nei tau ambalasakai ri kau kaja'dallang nugaukanga mae ri kambe.

PANGNGEBARANG 22:23

Saba', laNialleangangi ri Batara ri parkarana ke'nanga, siagang laNaallei nyawana tau anjallakkangai ke'nanga.

YESAYA 33:1

Cilakai sikamma musunta! Angngellaki ke'nanga, manna pole tena naniellaki, angngalle bokoi, manna pole tenaja nialle bokoi. Mingka le'baki ke'nanga angngella' siagang angngalle boko, kalenna ke'nanga laniella' siagang lanialle boko.

YESAYA 33:4

Kamma pa'rappungang katimbang battu taua ambakkai siagang angngellaki ke'nanga.

YESAYA 47:6

Riolo larroA' mae ri ummakKu, tenamo naKukana iNakke ampatangi. Nampa Kupassareang ke'nanga mae ri kau, nampa tena nukamaseangi ke'nanga, ba'lalo manna tau toa-toaya nujallakkang nukapallaki todong.

YEREMIA 27:7

Sikontu bansaya la'jari atai mae ri ia, mae ri ana'-ana' bura'nena, siagang mae ri cucunna sa'genna narapi' wattunna pa'rasangang kalenna tu'guru' todong. Anjo wattua bansa Babel la'jari atai mae ri bansa-bansa kassaka siagang karaeng-karaeng lompoa.

YEREMIA 30:16

Mingka kamma-kamma anne sikontu angnga'lukako lania'lu' tongi, siagang sikontu musunnu laniengkaki mange ri butta pammelakkang. LaKujallakkangi tau anjallakkangako, laKuellaki tau angngellakako.

YEREMIA 50:14

He ikau ngaseng tau angngeranga sanjata pana! Atoroki barisannu untu' angkurungi siagang ambunduki Babel. Pa'dalle' mangei ri Babel ana' pananu, lanri dorakai ri Nakke.

YEREMIA 50:28

Sikamma tau laria mange ri Yerusalem battu ri Babel nacaritai antekamma batena Karaeng Allata'alata ambalasaki panggaukanna tu Babel mae ri Balla'Na Batara.)

YEREMIA 50:37

Ancuruki jaranna siagang kareta bundu'na! Ancuruki sikamma tantara nisewana! Tamaka lammana ke'nanga! Ancuruki kakalumanynyangnganna Babel! Alleangi barang-baranna!

YEREMIA 51:13

Anjo pa'rasanganga teai sipato' kalumanynyanna siagang jai binangana, mingka lala'busu'mi wattu tallasa'na; battumi kala'busang katallassanna.

YEREMIA 51:24

Nakana Batara, “Kalennu anciniki kamma-kamma anne antekamma batena Kubalasa' mae ri Babel siagang pandudu'na sikontu kaja'dallanna ke'nanga, iamintu nagaukanga mae ri Yerusalem.

YEREMIA 51:44

Bel, iamintu rewatana pa'rasangang Babel Kuhukkungi. LaKusuroi ampoterangi sikamma apa-apa le'baka narampasa'. Bansa-bansaya tenamo nalanynyomba mae ri ia. Runtummi tembo'-tembo'na Babel.

YEREMIA 51:48

Sikontu apa niaka ri langi' siagang ri butta lakkio' rannui punna tu'guru' Babel mae ri limanna bansa waraka, ia battua untu' angngancuruki.

YEREMIA 51:8

Mingka ti'ring tu'guruki Babel na reppe'. Karrukimi Babel, siagang pa'boyammi pa'balle loko'-loko'na, gassingka akkulleji ammolle.

YEHEZKIEL 28:16

Tenamo sawenu napakamma a'balu-balu', siagang iaminjo angngerangko mange ri katerassanga siagang dosaya. Jari kubongka mako battu ri bulu' matangkasakKu, siagang malaeka' pajaganu angngembako battu ri tangnga-tangngana anjo paramata accillaka.

YEHEZKIEL 39:10

Jari taparalluami ke'nanga appasse're kayu tunuang ri kokoa yareka anna'bang poko' kayu ri romanga, nasaba' sikontu anjo sanjata nibokoia sukku' jaina untu' nipare' kayu tunuang. Lanaellaki siagang lanarampasaki barang-baranna sikamma tau le'baka angngellaki siagang anrampasaki barang-baranna ke'nanga. INakke, Batara Kaminang Tinggia, anne akkana.”

AMOS 3:10

Nakana Batara, “Sikamma anjo taua nabonei balla'-balla' karaenna ke'nanga siagang barang-barang nagappaya battu ri gau' ammacco' siagang gau' palla'. Ba'lalo tena sikali nangngasseng ke'nanga anggaukangi gau' lambusuka.

OBAJA 1:15

“Tojeng, a'reppese'mi allongKu, iNakke, Batara untu' angngadeli bansa-bansaya. Apa nagaukanga tu Edom lanibalasaki mae ri kalenna. Lanakasia' tongi apa le'baka nagaukang.

HABAKUK 2:10

Mingka anjo rancananu poro kasirikang bawang naerang mae ri kaluarganu. Lanri nuella'na jaia bansa, na nurugikammo kalennu.

HABAKUK 2:17

Nuta'bangi poko'-pokoka ri romanna Libanon, siagang kamma-kamma anne ikau kalennu lanita'bang. Nubunoi olo'-olo'na, siagang kamma-kamma anne napa'jari mallakko anjo olo'-oloka. Nakajariang kabusu' anjo kammaya lanri pammunoang siagang kapallakkang le'baka nugaukang mae ri pa'rasangang-pa'rasanganga, kota-kotaya siagang pandudu'na.

ZAKHARIA 1:15

Mingka sanna' larroKu mae ri bansa-bansa nakanaya amang siagang sannang pakkasia'na. Nasaba' ri wattunna Kutahang larroKu mae ri ummakKu, anjo bansa-bansaya pila' natambai sessana ummakKu.

ZAKHARIA 14:12

LaNapabattui Batara garring appakamalla'-mallaka mae ri sikontu bansa le'baka a'bundu' angngewai Yerusalem. Matanna siagang lilana ke'nanga, ba'lalo sikontu batangkalenna la'jari bottoki lalang attallasa'na ija ke'nanga.

PAPPICINI' 6:10

Akkio' lompomi ke'nanga angkana, “O Batara Kaminang Koasaya, Ia matangkasaka na tojeng! Siapapi sallona nampa Kiadeli tuma'buttaya ri lino siagang Kihukkung ke'nanga lanri nabunona ikambe?”