EZRA 9:1 - KITTA' MATANGKASA'

¹ Ri le'ba'namo nigaukang ngaseng sikammaya anjo, nia'mo siapa are tutoa-toana bansa Israel battu mae ri nakke. Napauanga' ke'nanga angkanaya ra'ya' Israel, kammayatompa sikamma imanga, siagang sikamma tu Lewia, tena nanasa'laki kalenna ke'nanga battu ri bansa-bansa maraeng niaka a'reppese' anjoreng, iamintu bansa Amon, Moab, Mesir, Kanaan, Het, Feris, Yebus siagang Amori. Ba'lalo manna sikamma imanga siagang tu Lewia appakamma ngaseng tongi. Nagaukang ngaseng tongi ke'nanga panggaukang-panggaukang sannaka ja'dala'na, ia nagaukanga anjo bansa-bansa maraenga.

EZRA 9:1 ပူးပေါင်းရင်းမြစ်များ

PA'JARIANG 15:16

Punna narapi'mo patang lapisi' turungannu, lammotere'mi cucu-cucunnu mae anrinni, nasaba' talaKubongkayapi a'lampa tu Amori punna tenapa ta'liwa' ja'dala'na ke'nanga sa'genna parallu nihukkung.”

1 KARAENG-KARAENG 11:1

Karaeng Salomo jai baine battu pantara' nangai. Pantaranganna ana' bainena karaeng Mesir, a'nikka tongi Salomo siagang baine-baine battua ri Het, Moab, Amon, Edom, siagang Sidon.

2 PATTOTTORANG 33:2

A'gau' dosai mae ri Batara sangkamma kaja'dallang nagaukanga bansa-bansa le'baka Nabongka Batara assulu' battu ri butta Kanaan ri wattunna napantamakki tu Israel anjo pa'rasanganga.

2 PATTOTTORANG 8:7

Sikontu jari-jarina bansa Kanaan tenaya nakkulle la'busu' nibuno ri tu Israel ri wattunna napantamakki ke'nanga anjo pa'rasanganga, napagio' ngasengi Salomo untu' anjama terasa'. Ia ke'nanga iamintu tu Het, Amori, Feris, Hewi siagang Yebus. Sa'genna kamma-kamma anne tuli a'jari atana anjo jari-jarina ke'nanga.

EZRA 10:2

Nampa nakanamo Sekhanya ana'na Yehiel battu ri golongang Elam, ri Ezra, “Dorakami ikambe ri Batara lanri a'buntingi ikambe siagang baine bansa maraeng. Mingka nia' ija panrannuang mae ri bansa Israel.

EZRA 10:8

Inai-nai tena nabattu lalanna tallungalloa, lanialleang ngasengi sikontu barang-baranna siagang tenamo nanibilangi anggota masaraka'. Anjo apa nipa'la'banga nipabattu nitekengi ri sikamma pamimpinna ra'yaka.

NEHEMIA 13:23

Anjo wattua nia' todong kucini' angkana jai tu Yahudi a'bunting siagang baine battua ri bansa Asdod, Amon, siagang Moab.

NEHEMIA 4:3

Nampa akkana tommo Tobia niaka ammenteng ri sa'rinna, “Ciniki anjo tembo' nabangunga ke'nanga! Kamanna kongkong romanga akkulle tonji narumbang anjo!”

NEHEMIA 4:7

Ri wattunna nalangngere' Sanbalat, Tobia siagang tu battua ri Amon, tu battua ri Asdod kammayatompa tu Arab, angkana pila' majumi pakabajikanna anjo tembo' kallika ri Yerusalem, kammayatompa appakkaramulami nitongko' sikamma kali'bonna anjo temboka, a'jari teaimi sipato' larrona ke'nanga.

PAMMUJI 106:35

Ba'lalo sibengkoro'mi ke'nanga siagang anjo bansa-bansaya, na naturuki cara tallasa'na tau tenaya naassengi Allata'ala.

KALAPPASSANG 13:5

A'janjimi siagang assumpami Batara mae ri boe-boenu untu' laNapassareang mae ri kau pa'rasanganna bansa Kanaan, Het, Amori, Hewi, siagang Yebus. Punna Naerang mako Batara mange anjoreng ri anjo pa'rasangang akkalumanynyanga siagang copponga, tunggala' taung lalang bulang Abib, musti nugaukangi anne pa'gaukang kammaya.

KALAPPASSANG 23:23

La'lampa rioloi malaekakKu ri dallekannu siagang naerangko mange ri pa'rasanganna tu Amori, Het, Feris, Kanaan, Hewi siagang Yebus, siagang laKuancuru' ngasengi ke'nanga.

KALAPPASSANG 33:16

Antekamma lakkulle naasseng taua angkana mangngellaiKi' ri nakke siagang mae ri anne bansaya, punna tena Kitulungi ikambe? KahaderanTa o Batara, ri tangnga-tangngana ikambe iami la'jari pammatei angkanaya tena nasangkamma ikambe siagang bansa-bansa maraenga ri anne linoa.”

YESAYA 52:11

A'lampamako! Bokoi kota Babel, he ikau ngaseng angngerangai pakkasa'na Balla'Na Allata'ala! Teako seroi barang ra'masaka; tangkasi kalennu ri tenanapa nu'lampa.

YEREMIA 26:10

Ri wattunna nalangngere' pagawe-pagawena pamarenta Yehuda apa kajarianga, akkaro-karomi ke'nanga assulu' battu ri balla' karaenga nampa a'lampa mange ri Balla'Na Batara, siagang ammempo ri Pakke'bu' Lompo Berua.

YEREMIA 26:16

Nampa sikamma pagawe pamarentaya siagang ra'yaka nakanamo ri anjo imang-imanga siagang na'bi-na'bia, “Anne taua a'bicarai lalang arenNa Karaeng Allata'alata; tena nasiratang nihukkung mate.”

KAIMANGNGANG 18:3

Tea' laloko turuki panggaukanna bansa Mesirka, iamintu pammantangannu le'ba'ka, yareka tau niaka ri Kanaan iamintu tampa' lanumangeia Kupimping kamma-kamma anne.

MALEAKHI 2:11

Nadakkaimi umma' Yehuda parjanjianNa Allata'ala siagang ke'nanga siagang nagaukammi apa appakaringi'-ringika ri Yerusalem siagang ri sikontu pa'rasanganga. Nara'massimi ke'nanga Balla'Na Batara Nakarimangngia, siagang a'nikkami ke'nanga siagang bai'-baine anynyombaya ri rewata-rewatana bansa maraenga.

PAMMILANGNGANG 23:9

Battu irate ri coppo'-coppo'na monconga kucini' ke'nanga; battu ri bulu'-buluka kuparhatikang ke'nanga. Ciniki, nia' se're bansa akkale-kale tenaya nantama' ri golonganna bansa-bansa maraenga.

PAMMILANGNGANG 25:6

Ri wattunna angngarru' Musa siagang sikontu ummaka ri pakke'bu' KemaNa Batara, nia'mo nacini' ke'nanga sitau tu Israel angngerang baine tu Midian antama ri kemana.

PAOLE 18:9

“Punna antama' mako ri pa'rasangang Napassareanga Karaeng Allata'alanu mae ri kau, teako palembai panggaukang-panggaukang ja'dala'na bansa-bansa niaka anjoreng.

PAOLE 23:8

Appakkaramula ri lapisi' makatallua siagang jari-jarina ke'nanga akkullei a'jari anggota umma'Na Batara.”

PAOLE 7:1

“LaNaerangko Karaeng Allata'alanu mange ri pa'rasangang lanupammantangngia, siagang jai bansa laNabongka battu anjoreng. LaNabongkai tujua bansa la'bi lompo siagang la'bi kassakkangngang na ikau ri dallekang matannu, iamintu: Tu Het, Girgasi, Amori, Kanaan, Feris, Hewi siagang Yebus.

YOSUA 23:12

Punna tena namajarre' pa'mai'nu siagang punna assileokko siagang bansa-bansa niaka ija ammantang ri alla'nu, kammayatompa punna a'buntingko siagang ke'nanga,