EZRA 4:6 - KITTA' MATANGKASA'

⁶ Ri pakaramula pamarentahanna Karaeng Ahasweros, annulisiki sura' musu-musunna pandudu' Yerusalem siagang Yehuda. Anjo suraka, sura' kabaratang.

EZRA 4:6 ပူးပေါင်းရင်းမြစ်များ

PA'JARIANG 26:21

Angngekemi pole surona Ishak bungung maraeng, mingka a'jarimi pole pa'beserang anjo bungunga. Lanri kammana nasaremi areng Ishak anjo bungunga “Passimusuang”.

EZRA 4:5

Nasogo'mi ke'nanga siapa area tunna'galaka jama-jamang ri pamarenta Persia, sollanna nahalangi ke'nanga anjo rancanana tu Yahudia. Tuli kammaminjo kajariang lalang pamarentahanna Karaeng Kores sa'genna ri pamarentahanna Darius.

ESTER 1:1

Ri Susan, ibukotana Pa'rasangang Persia, nia' se're karaeng ammarenta, niarenga Ahasyweros. Pa'rasangang naparentaya nia' 127 daera propinsi, appakkaramula battu ri daera India sa'genna mae ri daera Sudan.

ESTER 1:10

Ri makatujuna alloa, angnginung-nginummi karaenga siagang sanna' sikali rannuna. Lanri kammana nakio'mi tujua palayang untu' kalenna. Ia arenna ke'nanga iamintu Mehuman, Bizta, Harbona, Bigta, Abagta, Zetar, siagang Karkas.

ESTER 2:16

Kammaminjo, ri makatujuna taung ammarenta Karaeng Ahasyweros, ri bulang sampulo, iamintu niarenga bulang Tebet, nierammi Ester mange andallekang ri Karaeng Ahasyweros ri balla' karaenga.

ESTER 3:8

Nampa nakanamo Haman ri karaenga, “O, karaeng, nia' se're bansa mara'-maraeng a'la'bang ri sikontu propinsia ri anne pa'rasanganga. Assisala sikali ada'-ada'na ke'nanga siagang bansa-bansa maraenga. Taerokai ke'nanga mannuruki ri sikamma atorang niaka ri anne kakaraenganga. Jari, teaki' lappassangi ke'nanga a'gau' situru' ero' kalenna ke'nanga.

DANIEL 11:2

Siagang anjo apa lakupaua mae ri kau kammatojengi.” Nakana anjo malaekaka, “Tallu karaeng maraeng lammarenta ri Persia, nipinawang ri karaeng makaappa', iamintu la'bi kalumanynyanga na maraengannaya. Ri coppo' kakoasanna siagang kakalumanynyangnganna, la'gassing-gassingangi siagang kakaraengang Yunani.

DANIEL 9:1

Ri taung makase're pamarentahanna Darius tu Media, ana' bura'nena Ahasyweros, mae ri kakaraengang Babel, inakke Daniel, ammaca-maca' kitta'-kitta' agama. Kunawa-nawai angkanaya turu' kananNa Batara mae ri Na'bi Yeremia, kota Yerusalem tuli runtunna lalang tujupulo taung sallona.

MATIUS 27:37

Ri tompo' ulunNa Isa, nia' natannang ke'nanga tulisang angkanaya, “Iaminne Isa, Karaenna tu Yahudia”. Iaminjo tattulisika nituduangi Isa.

LAMPA-LAMPANA 24:13

Siagang tena todong nakkulle napa'butti sikamma anjo apa natuduanga' ke'nanga ri dallekanta.

LAMPA-LAMPANA 25:7

Ri wattunna battu Paulus, ammentemmi anjo sikamma tu Yahudi battua ri Yerusalem angkulilingi Paulus. Nampa appakkaramulamo ke'nanga antudui siagang ambattalli Paulus. Mingka takkulleai ke'nanga ampa'butti anjo sikamma tuduhang napaua ke'nanga.

PAPPICINI' 12:10

Nampa nia' kulangngere' sa'ra lompo ri suruga angkana, “Iaminne wattunna Napasalama' Allata'ala umma'Na! Kamma-kamma anne Napappicinikammi kakoasanNa Allata'ala salaku Karaeng! Kamma-kamma todong minne naNapappicinikang kakoasanNa anjo Karaeng Mappasalama' nipa'janjianga! Nasaba' nipasulu'mi battu ri suruga anjo antuduai allo bangngi sari'battanta ri dallekanNa Allata'ala.