EZRA 10:1 - KITTA' MATANGKASA'

¹ Lalang appala' doanna Ezra siagang angngarru' appala' popporo' ri dallekanna Balla'Na Batara, sanna' jaina tu Israel battu a'rappungang, bura'ne, baine, siagang ana'-ana'. Nakulilingi ke'nanga anjo Ezra nampa angngarru' lompo ngaseng.

EZRA 10:1 ပူးပေါင်းရင်းမြစ်များ

1 KARAENG-KARAENG 9:3

Nakanamo Batara ri ia, “Kulangngere'mi pappala' doannu, siagang kamma-kamma anne Kupaumi angkanaya anne balla' le'baka nubangung Kupa'jarimi tampa' matangkasa' untu' passambayangannu mae ri Nakke satunggu-tungguna.

2 PATTOTTORANG 20:13

Lalanna anjo wattua sikontu tu bura'ne Yehuda siagang massing tubai'-bainena kammayatompa ana'-ana'na ke'nanga ammentengi ri Balla'Na Batara.

2 PATTOTTORANG 20:9

angkanaya punna nihukkungi ke'nanga lanri dosa-dosana ke'nanga, siagang punna nituju ke'nanga ri pa'bundukang, garring, yareka kacipurang, akkullei battu ke'nanga mae ri Katte siagang ammenteng ri dallekanna anne balla' panynyombanga. Punna lalang kasukkarang ke'nanga, akkullei ke'nanga appala' doang mae ri Katte, siagang laKipilangngeri na Kitulung ke'nanga.

EZRA 10:6

Le'baki ke'nanga assumpa, a'lampami Ezra battu ri dallekanna anjo Balla'Na Batara nampa antama' ri tampa' pammantanganna Yohanan ana'na Elyasib, nampa a'bangngi anjoreng. Taerokai angnganre siagang angnginung napakamma si'na pa'mai'na annawa-nawai panggaukanna anjo sikamma tu le'baka nipela'.

NEHEMIA 1:4

Kulangngere'na anjo kabaraka, ammempoma' naung nampa angngarru'. Pirangallo arei tuli si'na kusa'ring pa'maikku. Tulusu' appuasama' siagang appala' doang ri Allata'ala,

NEHEMIA 1:6

Kicinikima' o Batara, siagang Kipilangngeri anne pappala' doang kupanaika ri Katte allo bangngi untu' umma' Israel, anjo atanTa ngaseng. Kumangakui angkana ikambe, umma' Israel, dorakami. Inakke siagang boe-boeku doraka tonga'.

NEHEMIA 10:28

Ikambe, ra'ya' Israel, sikamma imanga, tu Lewi, sikamma pajaga pakke'bu' lompona Balla'Na Batara, sikamma pakarena musika, siagang sikamma pajamaya ri Balla'Na Batara ri Yerusalem, kammayatompa bainenna ikambe siagang ana'-ana' anggannakamo umuru'na untu' ammahang, sikamma tau mannurukia mae ri hukkunNa Allata'ala siagang ia le'bakamo ansa'laki kalenna battu ri bansa maraeng ammantanga ri pa'rasanganna ikambe.

NEHEMIA 8:9

Nalangngere'na ke'nanga nibaca anjo Hukkunga, a'jari dinging-dingimmi pa'mai'na ra'yaka allangngereki, nampa angngarru' ke'nanga. Jari nakanamo guburnur Nehemia siagang Imang Ezra kammayatompa sikamma anjo tu Lewi ampakasingarakai anjo Hukkunga ri sikontu anjo ra'yaka, “Anne alloa, allo nipakatangkasa' untu' Karaeng Allata'alanu ngaseng, jari teako si'nai siagang teako angngarruki.

PAMMUJI 119:136

Assolongi je'ne' matangku sanrapang binanga, lanri tenana nituruki hukkunTa.

PAMMUJI 32:5

Nampa kumangakuimo dosaku mae ri Katte, tenamo kasalangku kucokkoi. Kutappukimi ri pa'maikku untu' angngakui mae ri Katte, na Kipammopporang ngasemmo sikontu dosaku.

YEREMIA 13:17

Punna kuttu nyawanu mappilangngeri, la'mere'-merekia' angngarru'. Pacce pa'maikku angkarruki anjo katampoannu. Lammattiki je'ne' matangku lanri niengka'na umma'Na Batara salaku tunitahang.

YEREMIA 9:1

Tamaka baji'na ka'de' ulungku rapangi bungung rassia je'ne', na matangku rapangi salu' je'ne' tulusu' assolonga je'ne'na! Nakuakkulle angngarru' allo bangngi, angkarruki julu bansaku nibuno ri musu.

DANIEL 9:20

Tulusu' appala' doamma' siagang kuanimi dosaku kammayatompa dosana bansaku Israel. Appala' doang tonga' mae ri Karaeng Allata'alaku sollanna Napakabaji' ammotere' balla' matangkasa'Na.

HOSEA 14:2

He bansa Israel, ammotere' mako mae ri Karaeng Allata'alanu! Passabakkang dosanu nutappeccoro' siagang tu'guru'.

ZAKHARIA 12:10

Nampa jari-jarina Daud siagang pandudu'na Yerusalem laKupa'jari tunangai mangngamaseang pa'mai'na siagang nangai appala' doanga. Lanaciniki ke'nanga anjo tau le'baka nacoka ke'nanga, nampa nakarruki rapang tau angkarruki ana' sitau-tauna matea. Langngarruki ke'nanga pacce pa'mai'na, rapang tau ammoteranga ana' bungasa'na.

MATIUS 3:6

Namangakuimi dosa-dosana ke'nanga, nampa nije'ne' ke'nanga ri Yohanes lalang ri Binanga Yordan.

LUKAS 19:41

Ri wattunna pila' a'reppese' Isa ri Yerusalem, naNacini'mo anjo kotaya, angngarru'mi.

LAMPA-LAMPANA 10:30

Appialimi Kornelius nakana, “Ri tallungallona allaloa, kira-kira ri wattu kamma-kammaya anne, sitabanga' appala' doang ri ballakku, ri wattu tette' tallu ri karuenga. Ti'ring nia'mo sitau bura'ne ammenteng ri dallekangku. Accilla'-cillaki pakeanna anjo taua.

LAMPA-LAMPANA 21:5

Mingka ri wattunna lala'busu'mo wattunta lammantang anjoreng, a'lampa maki' ambokoi ke'nanga, nanipannarrusu' lampata. Amminawang ngasemmi ke'nanga massing sipammanakang angngantarakki' sa'genna assulu' ri pantaranganna kotaya. Anjoreng ri biring tamparanga, akkulantu' ngaseng maki' appala' doang.

ROMA 9:2

Sanna' si'nana siagang pa'risi'na atingku,

PAOLE 31:12

Suroi sikontu tu bura'nea, bai'-bainea siagang ana'-anaka, siagang bansa maraeng niaka ammantang ri kota-kotanu asse're untu' ampilangngeri anjo pambacanga, sollanna appilajara' ke'nanga ampakala'biriki Karaeng Allata'alanu, kammayatompa majarrekko mannuruki ri parenta-parentaNa.

YOSUA 7:6

Sanna'mi si'nana pa'mai'na Yosua siagang sikamma pamimping umma'na Israel sa'genna nakekke'-kekke' pakeanna ke'nanga, siagang su'ju'mi ke'nanga sila'busu' allo ri dallekanna Patti ParjanjianNa Batara; nasareimi au ulunna ke'nanga salaku pammatei ri si'nana pa'mai'na ke'nanga.

YOSUA 8:35

Sikamma parentana Musa nabacakangi Yosua mae ri sikontu umma' Israel niaka asse're anjoreng, kammayami tubai'-bainea, ana'-anaka, siagang sikamma bansa maraeng niaka ammantang ri alla'na ke'nanga.