EFESUS 4:11 - KITTA' MATANGKASA'

¹¹ Iami “assarei sikamma passarea mae ri rupataua”; nia' Nasare pangngellai a'jari tunisuro, na maraenganga Nasare pangngellai a'jari na'bi; maraengannaya pole Nasarei pangngellai a'jari paerang Kabara' Baji'; na maraengannaya pole Nasarei pangngellai a'jari tummarakai jama'ah siagang a'jari guru.

EFESUS 4:11 ပူးပေါင်းရင်းမြစ်များ

2 PATTOTTORANG 15:3

Sallo sikali tena namanynyomba tu Israel mae ri Allata'ala matojenga, tena nakatutui hukkung-hukkung mustia naturuki ke'nanga, siagang tena imang-imang angngajarakai ke'nanga.

YEREMIA 3:15

LaKusareko pamimping-pamimping mannurukia ri Nakke. Lanapimpingko ke'nanga siagang baji' kammayatompa mapahang bajika.

MATIUS 28:20

Ajaraki ke'nanga anggaukangi sikontu le'baka Kupassuroang ri kau ngaseng. Na u'rangimi angkanaya laniakKa' anrurungangko sa'genna kala'busang jammanga.”

LAMPA-LAMPANA 13:1

Ri jamaah Antiokhia nia' siapa are na'bi siagang guru. Areng-arenna ke'nanga iamintu: Barnabas, Simeon nigallaraka I Le'leng, Lukius battua ri Kirene, Menahem siaganga Herodes niparakai sa'genna lompo, siagang Saulus.

LAMPA-LAMPANA 20:28

Paralluko anjagai kalennu. Kammayatompa paralluko anjagai sikontu jamaah le'baka Napassareang RohNa Allata'ala mae ri kau untu' lanujagai; nasaba' le'ba' mako niangka' a'jari tummarakai ri anjo jama'aka. Parallui nujagai anjo jama'aNa Allata'ala, sanrapang pakalawaki anjagai gimbala'na; nasaba' le'ba'mi Napa'jari Allata'ala anjo jama'aka a'jari pisakaNa lanri kamateanNa Ana' KalenNa.

LAMPA-LAMPANA 21:8

Ammukona a'lampa maki' pole, nakibattumo mange ri Kaisarea. Anjoreng, mange maki' ri se'reang pabiritta Kabara' Baji' niarenga Filipus. Ammantang maki' ri balla'na. Anne Filipus, iami kalase'renna anjo tau tujua le'baka nipile ri Yerusalem.

ROMA 12:7

Tau niaka pakkullena untu' antulungi paranna tau, musti natulung tojeng-tojengi paranna tau. Tau niaka pakkullena untu' angngajara', musti angngajara' tojeng-tojengi.

1 KORINTUS 12:4

A'rupa-rupai passare battua ri RohNa Allata'ala, mingka se'reji Roh nakabattui anjo passare a'rupa-rupaya.

EFESUS 2:20

Nibangung tommako irate ri batu le'baka napadongko' sikamma tunisuroNa Allata'ala siagang na'bi-na'biNa; nampa Isa Almasi a'jari sanrapang batu malompona anjo bangunanga.

EFESUS 3:5

Riolo tena le'bakai nipau anjo rahasiaya mae ri rupataua; mingka kamma-kamma anne Nasungkemi RohNa Allata'ala mae ri tunisuroNa siagang na'bi-na'biNa.

EFESUS 4:8

Nia' tattulisi' lalang ri Kittaka angkanaya, “Ri wattunNa nai' ri tampa' kaminang tinggia, jai Naerang tu nitahang; nampa jai passare Napassareang mae ri rupataua.”

2 TIMOTIUS 4:5

Mingka manna naantekamma, ikau musti nupakalewai kalennu. Sa'barakko lalang ri kapa'risannu, siagang gaukangi jama-jamannu ambirittakangi anjo Kabara' Bajika, kammayatompa gaukang baji' tommi jama-jamannu a'jari palayanNa Allata'ala.

IBRANI 5:12

Sikontutojenna narapi'mi wattunnu la'jari guru; mingka ma'nassa parallu ijako appilajara' mae ri tau maraenga ri passala'na poko'-poko' pangngajaranNa Allata'ala. Takkullea pako nisare kanre terasa'; parallu ijako angnginung dadi'.

YUDAS 1:17

Mingka sikamma sari'battangku sannaka kukarimangnginna, u'rangi apa-apa le'baka napau sikamma tunisuroNa Batara Isa Almasi pirangalloang.

PAPPICINI' 18:20

He, surugaya, a'rannu-rannuko lanri posso'na anjo kotaya. He, Umma'Na Allata'ala, suro-suroa, siagang na'bi-na'bia ma'rannu-rannuko! Nasaba' nihukkummi ri Allata'ala anjo kotaya, a'jari pa'balasa' mae ri apa-apa le'baka nagaukang mae ri kau ngaseng!

PAPPICINI' 21:14

Iratei ri sampuloa anrua batu pundasi nibangung anjo temboka. Ri anjo batu-batu pundasia massing niaki tattulisi' arenna sampuloa anrua tunisuroNa anjo Ana' Gimbalaka.