EFESUS 3:2 - KITTA' MATANGKASA'

² Tantu nulangngere'mi, angkanaya, lanri kabajikanNa Allata'ala Nasarema' jama-jamang untu' kabajikannu ngaseng.

EFESUS 3:2 ပူးပေါင်းရင်းမြစ်များ

LAMPA-LAMPANA 13:2

Ri wattunna assambayang mae ri Batara siagang appuasa ke'nanga, Nakanamo RohNa Allata'ala mae ri ke'nanga, “Pilei nanusa'lakkangA' Barnabas siagang Saulus, sollanna Kusuro anjamai jama-jamang le'baka Kupattantuangi ke'nanga.”

LAMPA-LAMPANA 13:46

Mingka pila' baranimi Paulus siagang Barnabas a'bicara silambusu'na. Nakanamo ke'nanga, “Musti nipabattu memangi rolong kananNa Allata'ala mae ri kau ngaseng. Mingka lanri tenana nuero' antarimai, jari kalennu tommi ampattantui angkanaya tena nusiratang antarimai katallassang sitojennaya siagang satunggu-tunggua. Jari kamma-kamma anne kubokoi ngaseng mako, nampa a'lampa ikambe mae ri bansa maraenga.

LAMPA-LAMPANA 22:21

Mingka Nakanamo pole Batara mae ri nakke, ‘A'lampamako, nasaba' laKusuroko a'lampa mange ri tampa'-tampa' bellaya, mange ri bansa-bansa maraenga.’ ”

LAMPA-LAMPANA 9:15

Mingka Nakanamo Batara ri Ananias, “A'lampamako! Nasaba' le'ba'mi Kupile anjo taua a'jari palayangKu; sollanna akkulle napabattu arengKu mae ri bansa-bansa maraenga, tenaya nantama' agama Yahudi, siagang ri sikamma karaenga, kammayatompa ri umma' Israel.

ROMA 1:5

Lanri Iami anjo Isa Almasi, nakuNasaremo pangngamaseang Allata'ala, a'jari tunisuroNa. Sollanna, akkulle kupakala'biri' Almasi, siagang akkulle kururungang sikontu bansa-bansaya na'jari tappa' siagang mannuruki ri Allata'ala.

ROMA 11:13

Mingka kamma-kamma anne bajiki punna a'bicara' mae ri sikamma sari'battang bansa maraenga. Anne siapaya sallona, a'jariku tunisuro mae ri bansa-bansa maraenga, teai sipato' kupakalompona anjo jama-jamangku.

ROMA 12:3

Le'ba'ma' Nasare passare malammoro'Na Allata'ala. Lanri kammanami anjo nakupakainga' ngasengko angkanaya: Teako pakatinggi dudui kalennu battu ri siratannaya. Parallui nupakatuna pa'mai'nu nampa nuparessa rolong kalennu; massing-massing tau parallui naparessa kalenna situru' pakkulle natarimaya battu ri Allata'ala lanri tappa'na ri Isa.

1 KORINTUS 4:1

Alle rapammi angkanaya ikambe anne palayang-palayanNaki' Almasi; ikambemi nisare tugasa' ambirittakangi sikamma rancanaNa Allata'ala, tenayapa naassengi anne linoa.

GALATIA 1:13

Tantu le'ba'mi nulangngere' katallassangku pirangalloang salaku tu tappa' ri agama Yahudia. Nuassengi antekamma sekke'na panggaukangku mae ri jama'aNa Allata'ala. Siagang antekamma terasa'na usahaku ero' angngancuruki ke'nanga.

EFESUS 1:10

Anjo eroka Nagaukang, iamintu, sollanna sikontu linoa, baji' na niaka ri suruga yareka na niaka ri buttaya, a'jari se're ngasengi lalang ri Almasi, a'jaria kapala. Na punna narapi'mi wattunna, laNapa'le'ba'mi Allata'ala anjo jama-jamanga.

EFESUS 3:7

Nasarema' pangngamaseang Allata'ala, iamintu jama-jamang, untu' ampa'la'bangi anjo Kabara' Bajika. Kutarimami anjo pangngamaseanga lalang ri koasaNa Allata'ala, anjamaya lalang ri kalengku.

EFESUS 3:8

Ri sikontu umma'Na Allata'ala, inakkemi anne kaminang tuna. Mingka Nasarema' Allata'ala anne pangngamaseanga: Iamintu jama-jamang untu' ambirittakangi mae ri bansa-bansa maraenga Kabara' Bajika, iamintu kakalumanynyanganNa Almasi tenaya la'busu'na;

EFESUS 3:9

kammayatompa sollanna battu ri nakke nanaasseng sikontu rupataua angkana antekamma bateNa Allata'ala, – le'baka ampa'niaki sikontu anne linoa – anggaukangi ero'Na, Narahasiakanga mae ri linoa siapa sallona battu riolo.

EFESUS 4:21

Le'ba'mi nulangngere' kabara' battua ri KalenNa! Salaku tau amminawanga ri Ia, le'ba' tommako niajara' ri passala' katojengang sipa'-sipa'Na Allata'ala niaka ri KalenNa!

EFESUS 4:7

Massing nisare maki' barakka' situru' apa Napassareanga Almasi.

KOLOSE 1:6

Tassiara'mi anjo kabaraka alla'bang lino. Na nibarakkakimo katallassanna rupataua lanri anjo birittaya; sangkamma todong nibarakkakimi katallassannu appakkaramula ri nulangngere'na anjo passare malammoro'Na Allata'ala na nupahang baji'-baji'.

1 TIMOTIUS 1:11

Anjo pangngajaranga niaki lalang ri Kitta' Kabara' Bajika ia nipassuroanga mae ri nakke untu' nipa'la'bang, iamintu Kabara' Baji' mala'birika battua ri Allata'ala siagang siratanga nipuji.

1 TIMOTIUS 1:4

Pakaingaki ke'nanga sollanna tena naparhatikangi anjo carita nipare'-pareka siagang carita pattottorang tenaya la'bu'-la'busu'na. Yangasenna anjo kammaya sangnging pa'beseranji naerang, siagang tena napakamajui jama-jamanNa Allata'ala ia akkullea niasseng tete ri katappakkang bawang mae ri Ia.

1 TIMOTIUS 2:7

Na iaminjo saba'na kunisuromo a'lampa mange ri bansa-bansa maraenga untu' ambirittakangi mae ri ke'nanga biritta ri sesena katappakkang annabaya. Anne kupabattua ma'nassa biritta kontutojeng; tena nakua'balle-balle.

2 TIMOTIUS 1:11

Untu' iaminjo Kabara' Bajika lanibirittakang naNaangkaka' Allata'ala a'jari tunisuro siagang guru.