EFESUS 2:8 - KITTA' MATANGKASA'

^8-9 Nakarimangngiko Allata'ala. Iaminjo Nanapasalamakko, lanri tappa'nu mae ri Isa. Anjo kasalamakkannu, teai wassele' usaha kalennu. Mingka passare malammoro'Na Allata'ala. Jari, tena manna sitau akkulle ampattampo-tampoangi kalenna ri anjo passalaka.

EFESUS 2:8 ပူးပေါင်းရင်းမြစ်များ

MATIUS 16:17

Nakanamo Isa, “Upa' sikaliko kau Simon ana'na Yona! Nasaba' teai rupataua ampauangko anne, mingka ManggeKu ri suruga.

MATIUS 20:9

Battumi anjo pajama tette' limaya ri karuenga nappakkaramula anjama. Massing nibayara'mi tasse'renna doe' pera'.

MARKUS 16:16

Na inai-nai tatappaka, lanihukkungi. Mingka inai-nai tappa' na nije'ne', iami lanipasalama'.

LUKAS 7:50

Mingka Nakanamo pole Isa ri anjo bainea, “Nipasalama' mako lanri tappa'nu mae ri Nakke. A'lampamako siagang pakasannammi pa'mai'nu!”

YOHANES 3:36

Inai-nai ampatappaki anjo Anaka, iami langgappai katallassang satunggu-tunggua. Mingka inai-nai tamannurukia ri anjo Anaka, talanagappayai katallassanga. Iami lanihukkung ri Allata'ala sa'genna satunggu-tungguna.

YOHANES 4:10

Appialimi Isa Nakana, “Ka'de' nanuasseng passareNa Allata'ala, siagang nanuasseng todong angkana inai appalaka je'ne' ri kau, mattantu ikau kalennu lappala' je'ne ri Ia, na Nasareko je'ne' katallassanga.”

YOHANES 5:24

Ma'nassa kontutojengi anne kana-kanangKu: Inai-nai amparhatikangi kana-kanangKu, siagang tappaki mae ri Ia assuroA' battu, ma'nassa nagappami katallassang mannannunganga. Tenamo nalanihukkung; ta'lappasa'mi battu ri kamateanga nanagappa katallassanga.

YOHANES 6:35

Nakanamo Isa ri ke'nanga, “INakkemi roti assarea katallassang. Inai-nai battu mae ri Nakke, tenamo nalacipuru' sa'genna satunggu-tungguna. Siagang inai-nai tappa' ri Nakke, tenamo nalaturere pole sa'genna satunggu-tungguna.”

YOHANES 6:37

Sikamma tau Napassareanga Manggea mae ri Nakke, labattui mae ri Nakke. Manna inai tena nalaKusorongboko punna battui mae ri Nakke.

YOHANES 6:40

Memang, iaminne Nakaerokanga ManggeKu: Sikamma tau ancinikai Anaka na tappa' ri Ia, nagappami katallassang satunggu-tunggua, siagang laKupattallasa' poleangi sallang ri Allo Kiamaka.”

YOHANES 6:44

Tenanniakka manna sitau akkulle battu mae ri Nakke, punna tanieranga ri ManggeKu battu mae ri Nakke iamintu Mangge assuroA' battu; na inai-nai battu mae ri Nakke, iami laKupabangung poleang ri Allo Kiamaka.

YOHANES 6:65

Nakanamo pole Isa, “Iaminjo saba'na naKupauangko angkanaya tenanniakka manna sitau akkulle battu mae ri Nakke punna tena nisarei pakkulle ri Manggea.”

LAMPA-LAMPANA 14:27

Ri wattunna battumo ke'nanga mange ri Antiokhia, napa'rappungammi ke'nanga sikamma anggota jama'aka anjoreng. Nampa nacaritakang ngaseng anjo anggota jama'aka sikamma apa le'baka Nagaukang Allata'ala lalang ri kalenna ke'nanga ilalang ri pa'lampanna ke'nanga. Nacarita tommi ke'nanga antekamma batena Nasungkeang todong Allata'ala bansa-bansa maraenga agang, sa'genna akkulle todong ke'nanga a'jari tappa' mae ri Isa.

LAMPA-LAMPANA 15:11

Kabalekanna, kamma-kamma anne tappakki', angkanaya iaji nikkulle salama' lanri pangngamaseanNa bawang Batara Isa; kamma le'ba' tommi anjo ke'nanga.”

LAMPA-LAMPANA 16:14

Kalase'renna ri ke'nanga niareng Lidia, tu battu ri daera Tiatira. Jama-jamanna iamintu padanggang kaeng lango-lango. Lanri mangngamaseanna ri Allata'ala, nipagio'mi atinna ri Batara sollanna natarima anjo apa napangngajarranga Paulus mae ri ia.

LAMPA-LAMPANA 16:31

Appialimi Paulus siagang Silas angkana, “Tappakko ri Batara Isa, sollannu nipasalama' – iamintu ikau siagang sikontu tau niaka lalang balla'nu!”

ROMA 10:14

Mingka antekamma lakkulle taua akkio' mae ri Batara punna tenapa natappa' ke'nanga? Siagang antekamma lakkulle tappa' ke'nanga mae ri Batara punna tenapa nalangngereki biritta battua ri Batara? Kammayatompa, antekamma lakkulle nalangngere' ke'nanga biritta battua ri Batara punna tena tau ampabattui anjo birittaya?

ROMA 10:17

Iaminjo saba'na na'jari tappa' taua, nasaba' allangngereki biritta, siagang nania' tau allangngereki anjo birittaNa Almasi nasaba' nia' tau ampabattui anjo birittaya.

ROMA 4:16

Jari lanri tappa'naji taua mae ri Allata'ala nania' anjo janjinNa Allata'ala. Iaminjo a'jari pammatei mattantua mae ri sossoranna Abraham, angkanaya nisareang bawang-bawanji ke'nanga anjo janjia battu ri Allata'ala; teai untu' tau mannurukiaji bawang ri hukkung agama Yahudia, passangalinna untu' tau tappaka pole ri Allata'ala, sangkamma tappa'na Abraham mae ri Allata'ala. Nasaba' iaminjo Abraham bapa' rohanita ngaseng.

ROMA 4:5

Mingka nia' tau tena nausaha kalenna napare' panna'gallang; passangalinna napappirannuangi kalenna mae ri Allata'ala, nasaba' Allata'alami allappassangi tau dorakaya battu ri dosa-dosana. Lanri iaminjo tappa'na nanitarimamo anjo taua a'jari tau nikarannuang ri atinNa Allata'ala.

ROMA 9:16

Jari anjo apa Natappukia Allata'ala, teai lanri usahana yareka rellana rupataua, passangalinna kabajikang pa'mai'Na bawang Allata'ala mae ri anjo tau Napilea.

GALATIA 3:14

Nagaukammi Almasi kammaya anjo, sollanna nisare todong bansa-bansa maraenga barakka' le'baka Napa'janjiang Allata'ala mae ri Abraham. Jari, ikatte tau tappaka mae ri Allata'ala, akkulle tommaki' anggappai anjo Roh Napa'janjianga Allata'ala.

GALATIA 3:22

Mingka nia' tattulisi' lalang ri Kittaka angkanaya nikoasai ngasemmi sikontu rupataua ri dosaya. Lanri kammana, anjo passare nipa'janjianga nipassareangi mae ri tau tappaka, lanri tappa'na ke'nanga mae ri Isa Almasi.

EFESUS 1:19

siagang antekamma heba'na kakoasanNa Allata'ala Nagaukanga lalang ri jama-jamanna ri tangnga-tangngata tau tappaka. Teai sipato' heba'na anjo koasaNa Allata'ala,

EFESUS 2:10

Ikatte bate pare'Naki' Allata'ala; tete ri Isa Almasi, Napare' beru maki' Allata'ala, sollanna nigaukang apa-apa bajika, le'baka Napasadiangki' Allata'ala.

EFESUS 2:5

sa'genna ri wattunna mate katallassang rohanita, lanri gau'-gau' salata, Napattallasa' poleang maki' ammotere' siagang Almasi. Jari, lanri kabajikanNa bawang Allata'ala, naNapasalamakko.

FILIPI 1:29

Nasaba' Nasare mako pangngamaseang Allata'ala teai untu' katappakkang bawang mae ri Almasi, passangalinna untu' angkasia' tongi sessaya lanri Almasi.

KOLOSE 2:12

Nasaba' ri wattunnu nije'ne', iaminjo a'jari pammatei angkanaya nitarawang mako siagang Almasi; siagang iatommi anjo pa'je'neka a'jari pammatei angkanaya nibangung poleang todong mako battu ri kamateanga siagang Almasi, lanri tappa'nu ri koasaNa Allata'ala, ampabangung poleangai Almasi battu ri kamateanga.

2 TESALONIKA 1:9

Anjo tau kammaya langgappai hukkungang kapanrakang sa'genna satunggu-tungguna; nipelaki assulukang battu ri pammantanganNa Batara, battu ri kalompoanNa siagang kakoasanNa,

IBRANI 6:4

Nasaba' tenamo olona lanirurungang ammotere' tau ammono'bokoa. Riolo nia'mi ke'nanga lalang ri kasingaranNa Allata'ala, siagang nakasia'mi passareNa. Kammayatompa amminawang tommi ke'nanga nikoasai ri RohNa Allata'ala.

1 PETRUS 1:5

Yangasenna anjo nipasadiai untu' ikau, lanri tappa' mako ri Allata'ala. Jari nijagai mako siagang kakoasanNa Allata'ala, sollanna akkulle nutarima kasalamakkang le'bakamo nipasadia untu' nipa'nyata sallang ri kala'busang jammanga.