EFESUS 1:11 - KITTA' MATANGKASA'

¹¹ Sikontu jama-jamanga, Napattantui siagang Nagaukangi Allata'ala situru' ero' KalenNa. Le'ba' maki' Napile memang battu ri pakkaramulanna, lanri Nakellaiki' sollanta a'jari umma'Na lanri a'jari se'reta siagang Almasi.

EFESUS 1:11 ပူးပေါင်းရင်းမြစ်များ

ROMA 8:28

Niassengi angkanaya Allata'ala ngaseng angngatoroki sikontu apa-apaya, sa'genna a'jari baji' mae ri sikamma tau angkamaseangai, iamintu sikamma tau Nakioka situru' ero' panggaukanNa.

1 PETRUS 1:4

Manrannuangki' untu' langgappai barakka'-barakka' Nabolika ri suruga, sa'genna takkullea panra' yareka a'jari botto', yareka a'jari a'langnge.

EFESUS 1:14

Iaminjo RohNa a'jari pammatei mattantua, angkanaya ma'nassa lanitarimai apa le'baka Napa'janjiang Allata'ala mae ri umma'Na. Iaminne ampakajarreki tappatta angkanaya ma'nassa laNalappassangi umma'Na Allata'ala. Nipujimi Allata'ala lanri kala'biranNa.

EFESUS 3:11

Nagaukammi Allata'ala anjo sikammaya situru' ero' laNagaukanga satunggu-tungguna, siagang Nagaukanga tete ri Isa Almasi, Batarata.

EFESUS 1:5

le'ba' memammi Napattantu la'bi riolo, angkanaya laNaangka' maki' a'jari ana'-ana' KalenNa, tete ri Isa Almasi. Na memang iaminjo eroka Nagaukang.

GALATIA 3:18

Nasaba' punna battu ri ia anjo hukkung agamaya naNapassareang passareNa Allata'ala, anjo passarea teaimi battu ri janjinNa Allata'ala.

IBRANI 6:17

Eroki Napakajarre' janjinNa Allata'ala mae ri sikamma tau Najanjia angkanaya talaNapinrayai janjinNa. Iaminjo saba'na naNapirurungi sumpa anjo janjinNa.

TITUS 3:7

sollanna lanri lammoro' pangngamaseanNa Isa nakiakkullemo assibajiki ammotere' siagang Allata'ala kammayatompa nakigappamo katallassang sitojennaya siagang katallassang mannannungang niminasaia.

ROMA 8:17

Jari punna a'jari maki' ana'-ana'Na, ma'nassa a'jari tommaki' warisi'Na, lantarimayai sikamma barakka' le'baka Napasadia Allata'ala untu' ana'-ana'Na. Lannarimaki' siagang Isa apa le'baka Napasadia Allata'ala untu' Isa; nasaba' punna sikapa'risangki' siagang Almasi, lasiagang tommaki' Almasi nipakala'biri'.

KOLOSE 1:12

kammayatompa appala' sukkuru' mae ri Manggea. Nasaba' iaminjo Manggea ampa'jari siratangko antarimai apa le'baka Napasadia Allata'ala untu' umma'Na lalang ri kakaraengang singaraka.

KOLOSE 3:24

U'rangi angkanaya langgappako pahala battu ri Batara. Apa Napasadiaya Batara untu' umma'Na, iaminjo laNapassareang mae ri kau. Nasaba' pinggawa sitojennaya nulayani kamma-kamma anne, iamintu KalenNa Almasi.

LAMPA-LAMPANA 26:18

untu' ansungkeangi matanna ke'nanga, sollanna akkulle assulu' ke'nanga battu ri sassanga nampa antama' ri singaraka; sollanna ta'lappasa' ke'nanga battu ri pangngajara' salana Billisika, nampa nikoasai ke'nanga ri Allata'ala. Na lanri tappa'na ke'nanga mae ri Nakke, naKupammopporammo dosa-dosana siagang la'jarimi ke'nanga umma'Na Allata'ala nipilea.’ ”

LAMPA-LAMPANA 20:32

Kamma-kamma anne kupassareang mako mae ri Allata'ala, naporo Iami amparakai ngasengko, siagang nuporo anna'gala' jarre' ngaseng mae ri anjo kabara' pangngamaseanNa Allata'ala. Koasai Allata'ala ampakajarrekko siagang assareko barakka'-barakka'Na, le'baka Napasadia untu' sikontu umma'Na.

LAMPA-LAMPANA 2:23

Situru' ero' KalenNa, Natappukimi Allata'ala laNapassareang Isa Almasi mae ri kau ngaseng. Na ri wattunna nipassareang mae ri kau ngaseng, nuallemi nubuno, lanri nubalang parekanna nisalli' ri tau ja'dalaka.

LAMPA-LAMPANA 20:27

Tena nakule'ba' ampilari tugasakku untu' ampakasingariangko sikontu apa eroka Nagaukang Allata'ala ri kau ngaseng.

LAMPA-LAMPANA 4:28

Asse'remi ke'nanga ero' a'gau' sangka' rupa, situru' apa le'baka Kipattantu angkanaya lakajariang memangi anjo kammaya. Na lanri koasa KalenTa siagang ero' KalenTa naKipattantu anjo apa lakajarianga.

YEREMIA 32:19

Hebaki rancana-rancanaTa, siagang appakalannasaki sikontu panggaukanTa; Kiciniki sikontu apa nagaukanga rupataua, siagang Kibalasaki ke'nanga situru' panggaukanna ke'nanga.

PAMMUJI 37:18

Najagai Batara katallassanna tu bajika, barang pisakana ke'nanga sa'genna satunggu-tungguna.

1 PETRUS 3:9

Teako pasibalasaki kaja'dallanga siagang kaja'dallang, yareka kana-kana pali'bo siagang kana-kana pali'bo; mingka pappalakkangi barakka' mae ri Allata'ala; iaminjo nupa'balassang. Nasaba' iaji naNakiokko Allata'ala kaNakellaiko sollannu akkulle annarima barakka' battu ri Ia.

ROMA 11:34

Nia' tattulisi' lalang ri Kittaka angkanaya, “Maka inai akkulle angngassengi pikkiranNa Batara? Maka inai akkulle assarei pappakainga'?

ZAKHARIA 6:13

Ia lambangungi BallakKu siagang lannarimai kala'birang sangkamma se'rea karaeng, siagang ia lammarenta mae ri ra'ya'na. Nia' sitau imang lanrurungangi siagang lasamaturuki ke'nanga siagang siamaki ke'nanga lalang ri jama-jamanna.’

YEREMIA 23:18

Kukana, “Tena manna sitau battu ri sikamma anjo na'bi-na'bia angngassengi apa takkimbolonga lalang ri pikkiranNa Batara. Tena battu ri ke'nanga le'ba' allangngereki siagang ampahangi rancana-rancanaNa; tena todong amparhatikangi yareka anjampangi kana-kananNa.

YESAYA 28:29

Anjo kacara'dekanna, iamintu kacara'dekang nagappa battu ri Batara Kaminang Makoasaya. Sikontu rancanaNa Batara pore ngasengi siagang tuli a'jari ngasengi.

YESAYA 5:19

Nukana, “Lappassammi angngalle linta' tindakang Karaeng, Allata'ala matangkasa'na Israel! Boli'mi kamma Nagaukang rancanaNa, sollanna niciniki siagang niassengi.”

PAOLE 4:20

Mingka ikaumi bansa Napasalamaka battu ri butta Mesir, tampa'nu sessa dudu riolo. Naerangko assulu' battu ri anjo pa'rasanganga, sollannu a'jari bansa KalenNa sangkamma kaadaannu kamma-kamma anne.

PANGNGEBARANG 8:14

Inakkemi assare pikkirang. Na inakke todong ampa'rupai. Inakke cara'de' na kugassing todong pole.

YAKOBUS 2:5

U'rangi sikamma sari'battangku, sannaka kukarimangnginna! Ia tau nicini' kasi-asia ri anne linoa, iami nipilei ri Allata'ala untu' a'jari tu kalumanynyang lalang ri katappakkanga. Iaminjo tau kammaya la'jari Umma'Na Allata'ala situru' Napa'janjianga Allata'ala mae ri sikamma tau angkamaseangai.

EFESUS 1:8

Teai sipato' lompona pangngarimangnginNa Allata'ala, le'baka Napa'laboang mae ri katte situru' kabajikang siagang pangngassengang.

AYUB 33:29

A'mole-molemi Nagaukang Allata'ala yangasenna anne kammaya,

YESAYA 25:1

Batara, iKatte Allata'alaku, kupakala'birikKi' siagang kupuji arenTa. Saba' sikamma bate pa'jariTa tamaka appakalannasa'na; le'ba' Kirancana memangi battu riolo, naKimmajarre' anggaukangi.

LAMPA-LAMPANA 13:48

Ri wattunna nalangngere' tau battua ri bansa maraenga anjo kananna Paulus, sannang sikalimi nyawana ke'nanga. Ammuji-mujimi ke'nanga ri Batara. A'jari tappa'mi sikamma tau le'baka nipattantu ri Allata'ala langgappai katallassang satunggu-tunggua.

ROMA 8:29

Sikamma tau le'baka Napile Allata'ala, le'ba' tommi nipattantu battu ri uru-uru memang untu' a'jari sangkamma ana'Na, iamintu Isa Almasi. Lanri kammana, iaminjo Isa Almasi a'jari ana' bungasa' mae ri sikamma sari'battanna ngaseng.

ROMA 8:30

Kammaminjo bateNa Allata'ala angkioki sikamma tau le'baka Napattantu memang la'bi riolo; na sikamma anjo tau Nakioka nisare oloang assibajiki ammotere' siagang Allata'ala. Na sikamma anjo tau le'baka nisare oloang assibajiki ammotere' siagang Allata'ala, nisare tommi pammantangang lalang katallassang KalenNa Allata'ala.

ROMA 9:11

Ri wattu tenanapa nanilassukangi anjo ana' ruaya, le'ba' memammi Napattantu Allata'ala ana' lanipilea sallang. Anjo pammileNa Allata'ala tena nabattu ri panggaukanna rupataua, passangalinna battu ri ero' pakkio'Na bawang Allata'ala. Nasaba' ri wattunna tenapa nangngasseng a'gau' baji' yareka a'gau' kodi anjo ruaya ana'na Ribka,

EFESUS 1:9

Lanri ero' KalenNa, Napauang maki' rahasiana jama-jamang eroka Nagaukang; le'ba'mi Napattantu angkanaya anjo jama-jamanNa laNapa'le'baki sallang lalang ri KalenNa Almasi.

EFESUS 1:18

Kupalaki ri Allata'ala sollanna Nasungke pikkirannu, sa'genna a'jari singara'; sollanna akkulle nupahang apa akkullea nurannuang battu ri Allata'ala, le'baka angkiokko. Kammayatompa sollanna nuasseng todong antekamma alla'bi-la'bina barakka' baji'Na Allata'ala, le'baka Napasadia untu' umma'Na;

TITUS 2:14

Le'ba'mi Nakoro'bangkang KalenNa untu' kasalamakkanta battu ri sikontu kaja'dallanga, na Napa'jariki' umma'Na matangkasaka, siagang rajenga a'gau' baji'.