DANIEL 11:36 - KITTA' MATANGKASA'

³⁶ Karaeng pa'rasangang waraka lappaero'-eroki appanggaukang. Tampoi ke'nanga nangkana angkanaya la'bi lompoangngangi kalenna namanna pole rewata battu kemae, ba'lalo la'bi lompoangngangi na Allata'ala Kaminang Tinggia. Lakkullei appanggaukang kamma anjo sa'genna kala'busang pangngalarroinNa Allata'ala. Nasaba' anjo apa le'baka Napattantu Allata'ala musti a'rupai la'bi riolo.

DANIEL 11:36 ပူးပေါင်းရင်းမြစ်များ

PAMMUJI 136:2

Sukkurukko mae ri Allata'ala Kaminang Tenaya Ruanna; pangngamaseanNa sa'genna satunggu-tungguna.

PAMMUJI 33:10

Napassalasai Batara rancanana bansa-bansaya, Napattaenai apa nakaerokia ke'nanga.

PANGNGEBARANG 19:21

Rupataua jai rancanana, mingka kaputusanNa bawang Batara a'jari.

YESAYA 10:23

Iyo, sikontu pa'rasanganga laniancuruki ri Batara Kaminang Makoasaya; iaminjo kaputusanNa Batara, siagang takkulleami nipinra anjo kaputusanga.

YESAYA 10:25

Sinampe'ji nammari larroKu mae ri kau, nampa Kuancuru' anjo ke'nanga.

YESAYA 10:5

Nakana Batara, “Cilakai Asyur! Asyur laKupake a'jari cambo' siagang palu-palu untu' antunrungi tau natabaya pangngalarroingKu.

YESAYA 14:13

Appattujuangko nai' ri langika siagang nupadongko' empoang kala'birannu irate ri bintoeng kaminang tinggia! Nupikkiriki angkana akkulleko ammempo salaku karaeng irate ri moncong bageang wara', tampa'na sikamma rewataya a'rappungang.

YESAYA 14:14

Nukana, angkana ikau lanaikko ri rammang tinggia nu'jari sangkamma Kaminang Tinggia.

YESAYA 26:20

Antama' mako ri balla'nu, he bansaku, nampa nutongko' pakke'bu'nu. Accokko mako untu' sinampekang, sa'genna ammari larroNa Batara.

YESAYA 30:33

Battu riolo iji nale'ba'mo nipasadia tampa' pattunuanna karaeng Asyur. Anjo tampaka lantangi naluara', rassi kayu tunuang attambung-tambung. LaNaparinrai Batara nampa nappasa'Na Napatui' sangkamma batu a'rinra assulu' ri nappasa'na.

YESAYA 46:10

Battu ri pakaramulanna Kupaumi apa-apa labattua ri bokoanganna, battu riolo Kutappu memammi apa lakajarianga. Kukana: Lakajarianga apa le'baka Kutappuki, mattantu Kugaukangi erokKu!

YESAYA 57:9

Ammakeko minynya'-minynya' mabau', nampa a'lampako mange anynyomba ri rewata niarenga Molokh. Nukiringi sikamma tunisuronu mange ri pa'rasangang-pa'rasangang bellaya, ba'lalo mange ri lino tau matea.

YEHEZKIEL 28:2

“He tau, pabattui mae ri karaeng Tirus apa Kupaua, iNakke, Batara Kaminang Tinggia, mae ri ia, angkana, ‘Tampoko ampaui kalennu angkana rewatako ammarentaya ri tangnga-tangngana tamparanga. Akkulleko nukana kalennu rewata, mingka u'rangi, angkanaya ikau poro tau biasajako bawang.

YEHEZKIEL 35:13

He bansa Edom, ikau lompo bicarako, siagang a'bicara tampoko mae ri Nakke. Kulangngere' kabusu'mi anjo sikammaya.

DANIEL 11:16

Anjo karaeng pa'rasangang waraka lappaero'-eroki appanggaukang, nampa tena naniewai manna sike'de'. Lanaempoi tongi pa'rasangang ga'gaya nampa nakoasai kabusu'.

DANIEL 11:3

Nampa lania' ammumba sitau karaeng pore. Lammarentai se're kakaraengang lompo siagang lappaero'-eroki appanggaukang.

DANIEL 11:37

Anjo karaenga tena najampangi manna pole rewata battu kemae, ia nasombaya boe-boena, kammayami rewata napakalompoa tubainea. Tena najampangi anjo rewata-rewataya lanri nakanai kalenna la'bi lompoangngangi naanjo rewata-rewataya.

DANIEL 12:7

Anjo maraenganga naangkaki rua-rua limanna nai' ri langika. Kulangngereki assumpa lanri Allata'ala mannannunganga siagang nakana, “Anjo sikamma kajarianga lanarapiki sa'genna tallu sitangnga taung. Punna le'ba'mo passessaya ri umma'Na Allata'ala, lakala'busang tommi anjo sikamma kajariang appakalannasaka.”

DANIEL 2:47

Nakana karaenga ri ia, “Tojeng, Daniel, anjo Allata'alanu kaminang malompo ri alla'na sikontu rewataya. Iami makoasa mae ri sikontu karaenga, siagang assungkeai sikontu rahasiaya. Kuassengi anjo passalaka nasaba' ikau akkulleko ampakasingaraki anne rahasiaya.”

DANIEL 4:35

Bansa-bansaya ri lino tena anggaranna. Allata'ala makoasa mae ri malaekaka ri suruga siagang pandudu'na buttaya. Tena manna sitau akkulle ambaliangi ero'Na, tena barani ampakuta'nangngangi apa Nagaukanga.”

DANIEL 5:19

Antekamma malompona, sa'genna sikamma tau battua ri sikontu bansaya, suku bansaya siagang bahasaya, annekkereki siagang mallaki ri ia. Punna eroki ammuno tau, nabuno mami anjo taua. Punna eroki napasalama' se'rea tau, napasalamaki anjo taua. Napakatinggi siagang napakatunai taua situru' ero'na.

DANIEL 5:20

Mingka ri wattunna a'jari tampo, kapala batu siagang palla', nigulummi battu ri kakaraenganna sa'genna tappela'mo kala'biranna.

DANIEL 7:8

Lalang kuparhatikanna tanru'-tanru'na, ti'ring nia'mo se're tanru' maraeng attimbo ri alla'-alla'na. Anjo tanruka ca'di, mingka akkullei nasorongang siagang nabi'bu' tallu battu ri anjo tanru' rioloangannaya. Anjo tanru' ca'dia nia' matanna sangkamma mata tau siagang nia' bawana accarita tampoa.

DANIEL 8:19

“Lakupauangko apa lakajarianga sallang lanri pangngalarroiNa Allata'ala. Nasaba' anjo paccini'nu napa'nyatami antekamma sallang kala'busang jammanga.

DANIEL 8:4

Kuciniki anjo gimbala' lakia angngula' kalau', wara' siagang timboro'. Tena manna sikayu olo'-olo' akkulle attahang andallekangi yareka ta'lappasa' battu ri kakoasanna. Appaero'-eroki appanggaukang siagang sanna' tampona.

ZAKHARIA 11:16

Nasaba' nia' sitau pakalawaki laKusuro untu' anjagai sikamma gimbalakKu, mingka tena najampangi gimbala' tappelaka; tena naboyai gimbala' sala oloanga, tena todong naballei gimbala' bokkaka, kammayatompa tena nasarei kanre gimbala' attallasaka ija. Ba'lalo ia kalenna angkanrei dagenna gimbala' kaminang co'moka siagang nabi'buki sikamma kanukunna anjo olo'-oloka.

YOHANES 5:30

“Tena apa-apa akkulle Kugaukang punna battu ri ero' KalengKu bawang. Punna angngadeliA', lanri parentaNa bawang Allata'ala Kuturuki. Na adeleki punna iNakke angngadeli, lanri teai erokKu Kuturuki, passangalinna ero'Na Manggea assuroA' battu.

YOHANES 6:38

Nasaba' naKunaung battu ri suruga, teai ero' KalengKu laKugaukang, passangalinna ero'Na Ia assuroA' battu, iamintu ManggeKu.

LAMPA-LAMPANA 4:28

Asse'remi ke'nanga ero' a'gau' sangka' rupa, situru' apa le'baka Kipattantu angkanaya lakajariang memangi anjo kammaya. Na lanri koasa KalenTa siagang ero' KalenTa naKipattantu anjo apa lakajarianga.

PAOLE 10:17

Karaeng Allata'alanu ri tompo'na sikontu rewataya siagang irateanganna sikontu kakoasanga. Iami Allata'ala mala'biri' siagang makoasaya, mustia nituruki ero'Na. TaNangaiyai angngalle sialia siagang tena todong Naero' annarima passare nipacoco'.

2 TESALONIKA 2:3

Mingka manna antekamma, teako eroki nitipu ri taua. Nasaba' ri tenanapa nabattu anjo Alloa, musti nia' apa-apa kajariang la'bi riolo: Jai tau lammono'boko, ansassali Almasi; siagang Tau Ja'dala' le'baka nipattantu lantama' ri naraka, laniaki ampappicinikangi kalenna.

2 TESALONIKA 2:4

Lalang katampoanna nalanaewa siagang lanapakatinggi kalenna irateanganna sikamma nasombaya rupataua, yareka sikamma apa nakanaya rewata rupataua. Ba'lalo lammempoi lalang ri Balla'Na Allata'ala, nampa nakana kalenna iami Allata'ala.

2 TESALONIKA 2:8

nampami kacinikang anjo Tau Ja'dalaka. Jari punna battu Batara Isa, la'mai'ji bawang naNabuno anjo Tau Ja'dalaka siagang laNalissara' ri kalompoang kabattuanNa.

YOSUA 22:22

“Kaminang Makoasaya iamintu Batara! Kaminang Makoasaya iamintu Batara! Naassengi angkanaya apa saba'na nanagaukang ikambe anne passalaka, siagang ero' tongi ikambe sollanna nuasseng tongi anne passalaka. Ebara' angkana nagaukangi ikambe anne kammaya lanri ero'na ikambe angngewai Batara, yareka lanri tenanamo natappa' ikambe mae ri Ia, boli'mi kamma namate memang ikambe kamma-kamma anne!

PAPPICINI' 10:7

Mingka punna napasa'ra tarompe'na anjo malaeka' makatujua, laNapa'jarimi rahasia eroka Nagaukang Allata'ala, sangkamma le'baka napabattu ngaseng ata-atanNa, iamintu na'bi-na'bia.”

PAPPICINI' 12:14

Mingka nisaremi anjo bainea rua ka'nyi' jangang-jangang rajawali lompoa sollanna anri'ba' mae ri tampa'na ri parang lompoa; anjoremmi laniparakai tallun taung assitangnga sallona, sa'genna a'lilimo battu ri anjo nagaya.

PAPPICINI' 13:1

Nampa nia' kucini' sikayu olo'-olo' ammumba battu lalang ri tamparanga. Nia' sampulo tanru'na na tuju ulunna. Ri massing-massing tanru'na nia' songko' karaeng, kammayatompa ri massing ulunna nia' tattulisi' se're areng anghinayai Allata'ala.

PAPPICINI' 17:17

Nasaba' Napagio'mi Allata'ala atinna ke'nanga untu' anggaukangi pattujunNa Allata'ala. LaNapassamaturu'mi ke'nanga untu' ampassareangi kakoasanna ke'nanga mae ri anjo olo'-oloka sollanna ammarenta anjo olo'-oloka sa'genna kajariang apa Napaua Allata'ala.

PAPPICINI' 17:3

Nampa nikoasaima' ri RohNa Allata'ala, siagang nieramma' mange ri parang lompoa ri anjo malaekaka. Anjoreng nia'mo kucini' sitau baine ammempo irate ri dongko'na sikayua olo'-olo' ejaya siagang a'rinraya nicini'; rassi kalenna siagang tulisang-tulisang areng antunraiyai Allata'ala. Nia' tuju ulunna siagang sampulo tanru'na anjo olo'-oloka.