AMOS 9:14 - KITTA' MATANGKASA'

¹⁴ LaKupa'jari kalumanynyangi ammotere' ummakKu Israel. Lanabangungi ammotere' kota-kotana ke'nanga le'baka runtung, nampa ammantang ke'nanga anjoreng. Lanalamungi koko-koko anggoro'na ke'nanga, siagang nainung je'ne'na. La'lamung-lamungi ke'nanga, nampa nakanre wassele'na.

AMOS 9:14 ပူးပေါင်းရင်းမြစ်များ

PAMMUJI 107:37

Nakiori koko-kokonna ke'nanga na'lamung poko' anggoro', nampa napasse're wassele'na sanna' jaina.

PAMMUJI 53:6

Tau ja'dalaka lasanna' malla'na, natenaja apa appakamalla', saba' Napasiaraki Allata'ala buku-bukunna tau angkatulungiako; nitolla'mi ke'nanga ri Allata'ala, jari lanubetami ke'nanga.

YESAYA 60:4

Ciniki apa kajarianga ri tammulilinu; ra'ya' a'rappunga untu' ammotere' mae ri kau. Ana'-ana' bura'nenu niaki battu bella, ana'-ana' bainenu nikalawingi.

YESAYA 61:4

Lanabangungi ke'nanga kota-kota salloamo runtung nappaenteng tampa'-tampa' salloamo sino.

YESAYA 65:21

Tau ambangunga balla' na napammantangi kalenna; teai tau maraeng lampammantangi. Lanalamungi ke'nanga siagang poko' anggoro' na nakasia' je'ne' anggoro'na; teai tau maraenga langnginungi. UmmakKu lala'bui umuru'na rapang poko' kayu na nakasia' wassele' karesoanna ke'nanga.

YEREMIA 12:15

Mingka punna le'ba' Kupasulu' ke'nanga, laKukamaseangi ammotere' ke'nanga; tunggala' bansaya laKuerangi ammotere' mange ri massing pa'rasangang kalenna.

YEREMIA 16:15

Passangalinna lanri iNakke, Allata'ala mattallasaka, angngerangai umma' Israel assulu' battu ri se'reang pa'rasangang ri bageang wara' siagang battu ri sikontu pa'rasangang maraeng le'baka napammantangngi ke'nanga Kupasiara'. LaKuerangi ammotere' ke'nanga mange ri butta passolongang cera'na ke'nanga, pa'rasangang le'baka Kupassareang mae ri boe-boena ke'nanga.”

YEREMIA 23:8

passangalinna lanri iNakke, Allata'ala mattallasaka, angngerangai umma' Israel assulu' battu ri se'reang pa'rasangang ri bageang wara', siagang battu ri sikontu pa'rasangang maraeng tampa'na ke'nanga le'ba' Kupasiara'. Lammantangi ke'nanga ri butta passolongang cera'na.”

YEREMIA 24:6

LaKujagai ke'nanga siagang laKuerangi ke'nanga ammotere' mae anrinni ri pa'rasanganga. LaKupabangungi ke'nanga, tena naKuruntungi; laKulamungi, tena naKubi'buki ke'nanga.

YEREMIA 29:14

Tojeng, lanubuntulukKa'. LaKupasse'reko battu ri tangnga-tangngana tunggala' bansaya siagang battu ri pa'rasangang tampa'nu nipasisa'la'-sala' nipela'. LaKuerangko ammotere' mange ri pa'rasangang kabattuannu anne, siagang laKupakabajiki ammotere' katallassannu. INakke, Batara, anne akkana.’

YEREMIA 30:18

Nakana pole Batara: “Ikau, ummakKu laKukamaseangko siagang laKupakabajiki ammotere' katallassannu ri butta passolongang cera' kalennu. Lanibangungi ammotere' Yerusalem, siagang lanipakabajiki balla' karaenna.

YEREMIA 30:3

Nasaba' lanarapiki sallang wattunna nalaKupa'jari baji' ammotere' katallassanna ummakKu Israel siagang Yehuda. LaKuerangi ammotere' ke'nanga mange ri pa'rasangang le'baka Kupassareang mae ri boe-boena ke'nanga. Anjo pa'rasanganga lanapatangi ammotere' ke'nanga. INakke, Batara, anne akkana.”

YEREMIA 31:23

Batara Kaminang Koasaya, iamintu Allata'alana Israel, nakana, “Punna le'ba'mi Kupa'jari pore ummakKu sangkamma riolo, ri pa'rasangang Yehuda siagang ri desa-desana nia' nilangngere' tau lakkana, ‘Dasi-dasi naNabarakkaki Batara bulu' matangkasaka ri Yerusalem tampa' pammantangngang matangkasaka untu' KalenNa.’

YEREMIA 31:28

Kamma riolo Kujagai ke'nanga sollanna sallang Kubi'buki, Kuruntungi siagang Kuancuruki ke'nanga, kamma tomminjo laKujagai ke'nanga sollanna Kubangung siagang Kupakajarre' ke'nanga ammotere'.

YEREMIA 31:5

Lapparekko koko anggoro' ri moncong-monconna Samaria, siagang ia a'lamunga lanagappai rapponna.

YEREMIA 32:15

Batara Kaminang Koasaya, iamintu Allata'alana Israel, Nakana angkanaya, balla', tampa', siagang koko anggoro' lanipare' balukangi sallang.”

YEREMIA 32:37

LaKupasse'rei anne bansaya battu ri sikontu pa'rasangang tampa'na ke'nanga Kupasisa'la'-sa'la' lanri larroKu siagang lussakKu mae ri ke'nanga. LaKuerangi ke'nanga ammotere' mae anrinni siagang Kukellai ammantang anrinni siagang amang.

YEREMIA 33:11

Mingka anjoreng ri tampaka lania' pole kalangngerang sa'ra karannuang siagang kalompoang pa'mai' kammayatompa sa'ra passua'-suarrang pa'gaukang pa'buntingang. Lania' todong kalangngerang kelong-kelong tau angngerang koro'bang kasukkurang mange ri BallakKu. Lanakana ke'nanga, ‘Appala' sukkurukko mae ri Batara Kaminang Koasaya, lanri Ia bajiki siagang pangngamaseanNa sa'genna satunggu-tungguna.’ Anne pa'rasanganga laKupa'jari kalumanynyangi sangkamma riolo. INakke, Batara, anne akkana.”

YEREMIA 33:7

Yehuda siagang Israel laKupa'jari porei sangkamma riolo siagang lammentengi ammotere' salaku ummakKu.

YEHEZKIEL 16:53

Nakana Batara mae ri Yerusalem, “Sodom siagang Samaria kammayatompa desa-desana laKupa'jari kalumanynyangi ammotere'. Le'baki anjo, nampa mako Kupa'jari kalumanynyang todong.

YEHEZKIEL 28:26

Lattallasaki ke'nanga siagang amang anjoreng, siagang ambangung balla' siagang appareki koko-koko anggoro'. LaKuhukkungi sikamma bansa singngampi'na ke'nanga le'baka anghinai ke'nanga sa'genna a'jari amang Israel. Na naassemmi ke'nanga angkanaya iNakke Batara.”

YEHEZKIEL 37:21

Nampa paui mae ri ke'nanga angkanaya iNakke, Batara Kaminang Tinggia, angngallei sikontu bansaKu battu ri sikamma pa'rasangang napa'lampaia ke'nanga. LaKupasse'rei ke'nanga siagang Kuerangi ammotere' mange ri pa'rasangang kalenna.

YEHEZKIEL 39:25

Nakana Batara Kaminang Tinggia, “Mingka kamma-kamma anne laKukamaseangi umma' Israel jari-jarina Yakub, siagang Kupa'jari kalumanynyang poleangi ke'nanga. Lanri kammana anjo Kujagaimi arengKu sollanna tuli nipakalompo.

AMOS 5:11

Nujallakkangi tu kasi-asia siagang nurampasaki gandunna. Lanri kammana anjo talammantangnga mako lalang ri balla'-balla' ga'ganu, anjo le'baka nubangung. Tenamo nulangnginung anggoro' battu ri koko-koko anggoro' le'baka nulamungi.

ZEFANYA 1:13

Lanirampasaki barang-baranna ke'nanga siagang laniancuruki sikamma balla'na. Lambangungi ke'nanga balla', mingka takkulleai napammantangngi. Lappareki ke'nanga koko anggoro' mingka takkulleai nainung je'ne' anggoro'na.”

ZEFANYA 2:7

Pandudu'na Yehuda akkullea ta'lappasa' lanaempoi anjo daeranu. Lakkalawaki olo'-olo' ke'nanga anjoreng ri tampaka, siagang punna bangngi latinroi ke'nanga ri balla'na tu Askelon. Nasaba' Batara, iamintu Allata'alana ke'nanga, lanjagai pole ke'nanga siagang laNapa'jari ke'nanga akkalumanynyang poleang.