AMOS 5:5 - KITTA' MATANGKASA'

⁵ Teako a'lampai mange ri Bersyeba untu' anynyomba. Teako boyaiA' ri Betel, nasaba' lalanynyaki Betel. Tea tongko a'lampai mange ri Gilgal, nasaba' pandudu'na anjo kotaya laniengkaki mange ri pammelakkanga.”

AMOS 5:5 ပူးပေါင်းရင်းမြစ်များ

PA'JARIANG 21:31

Kammaminjo naniaremmo anjo tampaka Bersyeba, nasaba' anjoremmi anjo tau ruaya massing assumpa.

PA'JARIANG 21:33

Nampa a'lamummo Abraham se're poko' kayu niarenga tamariska ri Bersyeba, siagang appakkaramula anjo wattua napakemi anjo tampaka untu' anynyomba ri Batara, Allata'ala mannannunganga.

PA'JARIANG 26:23

Nampa a'lampamo Ishak nabattu mange ri Bersyeba.

PA'JARIANG 26:33

Nampa nasaremo areng Ishak anjo bungunga “Sumpa”. Iaminjo assala' pakaramulanna naniareng anjo kotaya Bersyeba.

1 KARAENG-KARAENG 12:28

Le'ba'na napikki'-pikkiri' anjo passalaka, appare'mi rua patung sapi bulaeng, nampa nakana mae ri ra'yaka, “Bansa Israel! Sallo mako tuli a'lampa mange ri Yerusalem untu' assambayang. Kamma-kamma anne, iaminne rewata-rewatanu, ia le'baka angngantarakko assulu' battu ri Mesir.”

1 KARAENG-KARAENG 12:29

Nampa naboli' Yerobeam kalase'renna anjo sapi bulaenga ri Betel, na maraengannaya ri Dan.

2 KARAENG-KARAENG 23:8

Sikontu imang-imang niaka ammantang ri kota-kotana Yehuda nisuro kabusuki ri Yosia battu ri Yerusalem. Nampa kemae-kemae ri sikontu pa'rasangang Yehuda, iamintu ri tampa'-tampa' le'baka napammantangngi imang-imanga assare koro'bang, napanraki kabusuki Yosia tampa'-tampa' pakkoro'bangnganga mae ri rewataya. Anjo imang-imanga tenamo nanipa'biangi ammimping sambayang lalang ri Balla'Na Batara. Mingka akkulleji ke'nanga angnganre roti tenaya nammake pa'gambang iamintu nipasadia untu' aganna ke'nanga maraenga. Sikamma tampa' pakkoro'bangngang untu' panynyombang mae ri rewataya iamintu niaka ri ampi'na Pakke'bu' Lompo Yosua, walikotana anjo pa'rasanganga, niruntung kabusuki. Anjo pakke'bu' lompoa niaki ri sa'ri kairinna Pakke'bu' Lompo Uru-urua ri oloang antamaka ri kotaya.

AYUB 8:22

Lasiri'-siriki siagang latunai nasa'ring tau birisika ri kau, na balla' tau ja'dalaka lanipanraki sa'genna ancuru'.”

PAMMUJI 33:10

Napassalasai Batara rancanana bansa-bansaya, Napattaenai apa nakaerokia ke'nanga.

YESAYA 29:20

Iaminjo kale'bakkanna sikamma tau anjallakkangai paranna tau siagang anghinayai Allata'ala. LaNahukkungi Allata'ala sikontu tau dorakaya,

YESAYA 8:10

Apparekko rancana, mingka tena nia' anjari. Angngalle mako kaputusang, mingka tena matu-matunna, saba' ikambe Narurungangki' Allata'alana ikambe.

YEREMIA 48:13

Lala'bai pa'mai'na Moab mae ri Kamos, rewatana ke'nanga, sangkamma batena Israel la'ba pa'mai'na ri Betel ia napattoanga ke'nanga.

HOSEA 10:8

Sikamma balla' rewata niaka ri bulu'-bulu'na Betel tampa'na tu Israel anynyomba barhala, laniancuruki. Katintinga siagang rukuka lattimboi ri tampa' pakkoro'bangnganna ke'nanga. Nampa lammarrang ke'nanga mae ri moncong-monconga angkana, “Tongko'mi ikambe!” siagang mae ri bulu'-buluka angkana, “Tujumi ikambe!”

HOSEA 12:11

Le'ba'Ma' a'bicara mae ri na'bi-na'bia, siagang jaimi pappiso'na le'ba' Kupicinikiangi ke'nanga. Tete ri ke'nanga Kupaumi sikamma rancanaKu untu' ikau ngaseng, ummakKu,

HOSEA 4:15

He ikau ngaseng tu Israel, tena namajarre' pa'mai'nu mae ri Nakke! Mingka, Kurannuangi Yehuda natenaja nagaukang tongi kasalang kammaya! Teako mangei anggaukangi ibadanu ri Gilgal yareka ri Betel. Teako assumpai anjoreng lanri arenNa Batara mattallasaka.

HOSEA 9:15

Nakana Batara, “Sikontu kaja'dallanna ke'nanga appakkaramulai ri Gilgal. AnjoremMa' appakkaramula birisi' mae ri ke'nanga. Lanri panggaukanna ke'nanga ja'dalaka, laKubongkai ke'nanga battu ri anne pa'rasangangKu. Tenamo nalaKukamaseangi ke'nanga; sikontu pamimpinna ke'nanga angngewa ngasemmi ri Nakke.

AMOS 1:5

Sikamma pakke'bu' lompona Damsyik laKupanraki, kammayatompa pandudu'na Ka'bung Awen laKubarrasaki sa'genna tangkasa' battu ri tampa' pammantanganna ke'nanga. Pamarentana Bet-Eden laKupanaungi battu ri empoang kakaraenganna, siagang pandudu'na Siria lanitahangi siagang laniengkaki mange ri pa'rasangang Kir.”

AMOS 3:14

Ri allo Kuhukkunna tu Israel lanri dosana, laKuputtai tampa'-tampa' pakkoro'bangnganga ri Betel. Tunggala' tampa' pakkoro'bangnganga lanitepoki cappa'-cappa'na sa'genna tu'guru' naung ri buttaya.

AMOS 4:4

Nakana Batara Kaminang Tinggia, “He umma' Israel! A'lampa lalo mako mange ri tampa' ibadaya ri Betel, siagang gaukammi dosaya anjoreng! A'lampako mange ri Gilgal siagang gaukammi dosaya situru' pangngainnu! Assare mako koro'bang tunggala' bari'basa', siagang angngerang bage sampulona battu ri sikontu alle polenu lalang tunggala' tallungalloa!

AMOS 7:10

Amazia, iamintu imang ri Betel, akkiringi laporang kamma anne mae ri Yerobeam karaeng Israel, “Assikongkoloki Amos siagang ra'yaka untu' angngewaki' karaeng. Kana-kananna nakompa-kompai ra'yaka untu' angngancuruki anne pa'rasanganga.

AMOS 7:13

Tea' mako akkato'bai pole ri Betel. Anne kotaya nisa'laki untu' kalenna karaenga, siagang tampa' ibadana sikontu ra'yaka!”

AMOS 7:17

Nakana Batara angkanaya la'jari pasundalaki bainennu ri agang-agang kotaya, siagang sikamma ana'nu lanibunoi lalang pa'bundukang. Buttanu lanipa'bage-bageangi mae ri tau maraenga, nampa ikau kalennu lamateko ri pa'rasanganna tau tenaya natappa' ri Batara. Pandudu'na Israel ma'nassa laniengkaki mange ri pammelakkanga, bella battu ri pa'rasangang kalenna.”

AMOS 7:9

Tampa'-tampa' napakea jari-jarina Ishak untu' anynyomba laniancuruki. Tampa'-tampa' matangkasa'na tu Israel laniruntungi. LaKuputtai jari-jarina Yerobeam.”

AMOS 8:14

Sikamma tau assumpaya lanri barhala Samaria angkana, ‘Lanri rewatana bansa Dan’ yareka ‘Lanri rewatana Bersyeba’ – latu'guru' kabusuki siagang tambangungami pole.”

1 KORINTUS 1:28

Napilemi Allata'ala apa-apa nicini' rawaya, nicini' tunaya, yareka nicini' tenaya matu-matunna ri anne linoa, sollanna Naancu'-ancuru' Allata'ala apa-apa nicini' mala'birika ri anne linoa.

1 KORINTUS 2:6

Mingka manna nakamma, kupake tonji pangngassenganga ampabattui anjo birittaya mae ri tau rapang ti'nokamo katallassang rohanina. Mingka anjo pangngassenganga teai pangngassengang battu ri lino, yareka pangngassengang battu ri sikamma tau anna'galaka koasa ri anne jammanga, ia lalanynyaka sallang kakoasanna.

PAOLE 28:41

Langgappako ana'-ana' bura'ne siagang baine, mingka niallei ke'nanga salaku tunitahang lalang ri bunduka, sa'genna tappela'mi ke'nanga battu ri kau.

YOSUA 5:9

Nakana Batara mae ri Yosua, “Anne alloa le'ba'mi Kupa'lanynya' katunaannu ngaseng salaku ata-ata ri Mesir.” Iaminjo naniareng anjo tampaka Gilgal, battuanna nipa'lanynya', sa'genna kamma-kamma anne.

PAPPICINI' 18:17

Mingka sijangji bawang sallona, nalanynya' ngasemmo sikontu kakalumanynyanganna!” Sikamma juraganga, padongko' kappalaka, siagang ana'-ana' kappalaka, kammayatompa sikontu a'boya-boyaya ri tamparanga, ammenteng battu bella ngasemmi.

1 SAMUEL 11:14

Nampa nakana Samuel ri ke'nanga, “Umba ki'lampa ngaseng mange ri Gilgal na niresmikang Saul a'jari karaenta.”

1 SAMUEL 7:16

Taung-taungi a'jappa akkuliling mae ri Betel, Gilgal, siagang Mizpa. Siagang sikamma parkara-parkara passisalang niaka ri sikamma anjo tampaka, napa'le'ba' ngasemmi napakabaji'.

1 SAMUEL 8:2

Ana'na toaya niarengi Yoël, na makaruaya niarengi Abia. A'jari hakingi ke'nanga ri Bersyeba.