2 YOHANES 1:3 - KITTA' MATANGKASA'

³ Poro nisareki' barakka', pangngamaseang kammayatompa kasalewangang battu ri Allata'ala Manggea, siagang battu ri Isa Almasi Ana'Na anjo Manggea. Poro nitarima ngasengi anjo siagang ati maci'nong kammayatompa lalang pangngamaseang.

2 YOHANES 1:3 ပူးပေါင်းရင်းမြစ်များ

ZAKHARIA 8:19

“Puasa nigaukang lalang bulang makaappa', makalima, makatuju, siagang makasampulo la'jari passua'-suarrang appakarannua siagang appakasannanga mae ri pandudu'na Yehuda. Mangngaiko ri katojengang siagang passiamakkang!”

ROMA 1:7

Iaminjo saba'na nakutulisi' anne suraka mae ri kau ngaseng. Poro Nabarakkakiko siagang Nasareko katallassang salewangang Allata'ala Manggea siagang Batarata Isa Almasi.

GALATIA 5:6

Nasaba' punna asse'remi tallasatta siagang Almasi, tenamo naparallu anjo nikanaya mannuruki yareka tena, mae ri paratorang sunnaka. Ia mami parallu anjo tappaka mae ri Almasi; na anjo tappaka ma'nassai lalang ri pangngamaseanta mae ri paranta tau.

1 TIMOTIUS 1:14

Mingka ba'lalo nipila'bi-la'bianga' kalammorang pangngamaseang ri Batarata. Nasarea' pakkulle untu' tappa' ri Ia, siagang pangngamaseang akkullea nipatang punna asse'reki' siagang Isa Almasi lalang ri katallassanta.

2 TIMOTIUS 1:13

Attojeng-tojengko anturuki pangngajarang tojenga, ia le'baka kupassareang mae ri kau. Siagang paralluko tuli anna'gala' ri katappakkanta siagang ri pangngamaseanta lanri asse'reta siagang Isa Almasi.

1 YOHANES 4:10

Iaminne pangngamaseanga: Teai ikatte le'ba' angkamaseangi Allata'ala, mingka Allata'ala angkamaseangki' siagang Nasuroi battu Ana'Na sollanna tete ri Ia nanipammopporang dosa-dosata.

2 YOHANES 1:1

Battu ri nakke, pamimping jama'aka; kupappitarimangi anne suraka mae ri Amma' Napilea Allata'ala, siagang mae ri ana'-ana'na Amma' sannaka kukarimangnginna. Teai inakke bawang, mingka sikontu pole tau angngassengai Allata'ala tojenga, Nakarimangngi ngaseng tongko.