2 TIMOTIUS 4:5 - KITTA' MATANGKASA'

⁵ Mingka manna naantekamma, ikau musti nupakalewai kalennu. Sa'barakko lalang ri kapa'risannu, siagang gaukangi jama-jamannu ambirittakangi anjo Kabara' Bajika, kammayatompa gaukang baji' tommi jama-jamannu a'jari palayanNa Allata'ala.

2 TIMOTIUS 4:5 ပူးပေါင်းရင်းမြစ်များ

YESAYA 62:6

Lammolika' pangawala' ri tembo' kalli'na Yerusalem; allo bangngi ke'nanga takkulleai a'mereki, mingka musti tuli napakaingaki Allata'ala mae ri janjinNa le'baka Napare'.

YEREMIA 6:17

Nampa a'mole-molemo Batara angngangka' pajaga untu' ampakaingaki ke'nanga sollanna napilangngeri pammateina sa'ra tarompeka. Mingka nakana ummaka, “Taerokai ikambe ampilangngeri.”

YEHEZKIEL 3:17

“He tau, ikau Kuangkakko a'jari pajaga mae ri bansa Israel. Pabattui mae ri ke'nanga anne pappakainga' Kupassareanga.

YEHEZKIEL 33:2

“He tau, paui mae ri bansanu, angkanaya punna Kupabattu pa'bundukanga ri se'reang pa'rasangang, iaminne lakajariang: Anjo pandudu'na pa'rasanganga lanapilei ke'nanga battu ri tangnga-tangngana ke'nanga sitau pajaga.

YEHEZKIEL 33:7

He tau, ikau Kuangkakko a'jari pajaga mae ri bansa Israel. Pabattui mae ri ke'nanga anne pasangKu:

MATIUS 25:16

Anjo palayang annarimaya limassa'bu doe' ringgi' bulaeng, a'lampa memammi a'danggang; nanggappamo passawallang limassa'bu doe' ringgi' bulaeng.

MARKUS 13:34

Pangngebarranna lasangkammai tau a'lampaya ambokoi balla'na nampa mange ri se'reang pa'rasangang bella. Nasuroi palayang-palayanna angngurusuki balla'na, siagang massing nasarei jama-jamang. Pajaga pakke'bu'na napasangi sollanna a'jaga baji'-baji'.

MARKUS 13:37

Anne apa Kupaua mae ri kau ngaseng, Kupau tongi mae ri yangasenna taua: a'jaga-jaga laloko!”

LUKAS 12:37

Teai sipato' upa'na ngaseng palayang-palayang nirapikanga sadia attayang ri wattunna battu karaenna. Patappa'mi angkanaya: lasadiai anjo karaenga assuroi anjo palayang-palayanga ammempo, nampa nasuro layani kalenna anjo karaenga.

LAMPA-LAMPANA 21:8

Ammukona a'lampa maki' pole, nakibattumo mange ri Kaisarea. Anjoreng, mange maki' ri se'reang pabiritta Kabara' Baji' niarenga Filipus. Ammantang maki' ri balla'na. Anne Filipus, iami kalase'renna anjo tau tujua le'baka nipile ri Yerusalem.

ROMA 15:19

kammayatompa ilalang gau'-gau' appakalannasaka, siagang sukkaraka antama' ri akkala'na rupataua; yangasenna anjo koasaNa RohNa Allata'ala anggaukangi. Le'ba' ngasemmi kubirittakang sikamma Kabara' Baji' ri passala'na Isa Almasi mae ri taua, appakkaramula battu ri Yerusalem sa'genna ri Ilirikum.

EFESUS 4:11

Iami “assarei sikamma passarea mae ri rupataua”; nia' Nasare pangngellai a'jari tunisuro, na maraenganga Nasare pangngellai a'jari na'bi; maraengannaya pole Nasarei pangngellai a'jari paerang Kabara' Baji'; na maraengannaya pole Nasarei pangngellai a'jari tummarakai jama'ah siagang a'jari guru.

EFESUS 4:12

Kammami anjo Nagaukanga, sollanna nipasadia baji' Umma'Na Allata'ala sollanna akkulle nalayani Batara siagang nabangung TubuNa Almasi.

KOLOSE 1:25

Nasuroma' Allata'ala a'jari palayang mae ri jama'aNa untu' kaparalluannu. Musti kupabattu ngasengi biritta battua ri Allata'ala;

KOLOSE 4:17

Siagang pauangi Arkhipus, angkanaya, “Pa'le'baki jama-jamang nipassareanga mae ri kau untu' allayani Batara.”

1 TESALONIKA 5:6

Lanri kammana, takkulleaki' attinro sangkamma tau maraenga. Paralluki' a'jaga-jaga siagang parallui singara' pikkiranta.

1 TIMOTIUS 4:12

Teako pa'biangi kalennu nicini' tuna lanri rungkanu ija. Mingka paralluko a'jari conto mae ri sikontu tau tappaka ilalang ri pau-paunu, panggaukannu, katappakkannu, pangngamaseannu, kammayatompa katangkassanna katallassannu.

1 TIMOTIUS 4:15

Attojeng-tojengko anggaukangi yangasenna anjo, sollanna akkulle nacini' ngaseng taua kamajuannu.

2 TIMOTIUS 1:8

Lanri kammana, teako siri'-siriki a'jari sa'bi mae ri Batarata, siagang tea tongko kasirikangia', ia nitarungkua lanri Batarata. Mingka, lanri kagassingang nugappaya battu ri Allata'ala, siratangko angkasia' tongi kasessanga untu' anjo Kabara' Bajika.

2 TIMOTIUS 2:10

Iami anjo saba'na nakusa'bara' antanggong ngasengi anjo kasessanga, lanri kaparalluanna sikamma tau le'bakamo Napile Allata'ala. Sollanna nagappa ngaseng todong ke'nanga kasalamakkang Napassareanga Allata'ala tete ri Isa Almasi, nirurunganga ri kala'birang mannannunganga.

2 TIMOTIUS 2:3

Musti amminawang tongko angkasiaki kasessanga salaku surudadu majarre'Na Isa Almasi.

2 TIMOTIUS 4:17

Mingka Narurunganga' Batara. Nasarea' kagassingang sa'gengku akkulle ambirittakangi sikontu anjo Kabara' Bajika, sollanna akkulle nalangngere' ngaseng bansa-bansa maraenga. Siagang ta'lappasa'ma' battu ri bahayana kamateanga.

IBRANI 13:17

Turuki parentana pamimping-pamimpinnu, siagang tundukko mae ri ke'nanga. Nasaba' tuli naparhatikangi ke'nanga nyawanu, namusti attanggong jawaki ke'nanga mae ri Allata'ala. Punna nuturuki ke'nanga, akkullei ke'nanga anjama siagang sannang pa'mai'na; punna tena, akkullei a'jari si'na pa'mai'na ke'nanga anjama, napunna kamma latena matu-matunna mae ri kau.

1 PETRUS 1:13

Lanri kammana, paralluko tuli a'jaga-jaga. Tutuko siagang manrannuang tojeng-tojengko mae ri barakka' lanipassareanga mae ri kau ri wattunna battu Isa Almasi sallang.

PAPPICINI' 3:2

Lanri kammana, ambangungko nai', siagang pakajarreki apa niaka ija ri kau ngaseng, genteng tenanapa numate taba sikali. Nasaba' Kurapikangi angkanaya anjo apa nugaukanga tenapa manna se're a'jari sukku' baji'na ri dallekanNa Allata'ala.