2 TIMOTIUS 2:20 - KITTA' MATANGKASA'

²⁰ Lalang se'rea balla' lompo nia' a'rupa-rupa pakkakasa' balla'. Nia' pakkakasa' pera' yareka bulaeng, mingka nia' todong battu ri kayu yareka butta. Nia' lanipake untu' kaparalluang lompo, na nia' todong lanipake untu' kaparalluang biasa.

2 TIMOTIUS 2:20 ပူးပေါင်းရင်းမြစ်များ

EZRA 1:6

Sikontu siampi' balla'na ke'nanga massing assaremi bantuang, iamintu a'rupa barang-barang, kammayami pakkakasa'-pakkakasa' pera' siagang bulaeng, untu' bokong ri aganga, olo'-olo' untu' atteke', barang-barang maraengannaya, kammayatompa passare-passare untu' ambangungi Balla'Na Batara ri Yerusalem.

EZRA 6:5

Kammayatompa sikamma pakkakasa' bulaeng siagang pera' ia le'baka nipake ri Balla'Na Batara ri Yerusalem nampa naalle Karaeng Nebukadnezar na naerang mange ri Babel, musti nipoterang ngasengi mange ri tampa'na rioloa.”

KALAPPASSANG 27:3

Apparekko siapa are pamaja', sikopang, mangko'-mangko', garpu-garpu siagang tampa' pepe'. Sikontu anjo pakkakasaka musti tambaga nipare'.

PIRAUNG 4:2

Riolo ana'-ana' rungkana Kota Sion rapangi bulaeng tinggia anggaranna, mingka anne kamma nipare' mami rapang uring butta bawang.

DANIEL 5:2

Lalang angnginung-nginunna ke'nanga, naparentakammi Belsyazar untu' angngallei mangko'-mangko' bulaenga siagang peraka, iamintu le'baka narampasa' Nebukadnezar, manggena, battu ri Balla'Na Batara ri Yerusalem. Pattujunna Karaeng Belsyazar iamintu sollanna sikamma tumalompoa, sikamma bainenna, baine piarana, kammayatompa pole kalenna, angnginungi battu ri anjo mangko'-mangkoka.

YOHANES 8:49

Appialimi Isa Nakana, “Tena nanasosoKa' setang. INakke Kupakala'biriki ManggeKu, mingka ikau ngaseng nuhina-hinaiA'.

ROMA 9:20

Mingka ikau sari'battang, tau biasajako bawang! Takkulleako barani appiali mae ri Allata'ala! Maka akkullei se'rea pammantangang bunga mae ri tau amparekai, angkana, “Apa saba'na nanupare' kamma' anne?”

1 KORINTUS 3:9

Ikambe sangkamma jaki' para tau anjama ri Allata'ala; na ikau sanrapangko kokonNa Allata'ala. Yareka sanrapang tongko balla' bangunanNa Allata'ala.

2 KORINTUS 4:7

Mingka anjo pa'barang-barangang rohani ga'gaya, ikambemi anne angngerangi, iami antu tubu tenaya anggaranna lanri buttaji nipare'. Lanri kammana, ma'nassami angkanaya anjo koasa malompoa niaki ri Allata'ala, jari tena nania' ri kambe.

EFESUS 2:22

Lanri asse'remi katallassannu lalang ri Almasi, kamma-kamma anne nipasibangung tommako siagang tau maraenga, a'jari se're balla' untu' Allata'ala; anjoremmi ammantang Allata'ala siagang RohNa.

1 TIMOTIUS 3:15

sollanna punna tenapa nakulinta' battu, nuasseng memammi angkana antekamma bateta musti attallasa' salaku ana'-ana'Na Allata'ala, iamintu jama'aNa Allata'ala mattallasaka. Iaminne jama'aka a'jari sanrapang benteng panjarrekinna siagang pattumpa'na katojengang battua ri Allata'ala.

1 PETRUS 2:5

Ikau sanrapang ngasengko batu-batu mattallasaka. Lanri kammana paralluko ampassareangi kalennu untu' nipake ambangung Balla' rohaniNa Allata'ala. Lalang kammana anjo a'jari mako imang-imang mae ri Allata'ala lalang ri katallassannu; siagang tete ri Isa Almasi angngerang mako koro'bang rohani mae ri Allata'ala, iamintu koro'bang nitarima bajika ri atinNa Allata'ala.