2 SAMUEL 7:23 - KITTA' MATANGKASA'

²³ Ri sikontu linoa tena nia' bansa sangkamma Israel. Tena ruanna bansa Israel le'ba' Kilappassang battu ri tunipare' ataya untu' Kipa'jari umma' kalenTa. Sikontu gau' malompoa siagang appakalannasaka Kigaukanga mae ri ke'nanga, ampa'jari masahoroki arenTa ri sikontu linoa. Bansa-bansa maraenga siagang rewata-rewatana le'ba'mi Kibongka ri wattunna maju ummatTa a'bundu'.

2 SAMUEL 7:23 ပူးပေါင်းရင်းမြစ်များ

2 SAMUEL 7:24

Le'ba'mi bansa Israel Kipa'jari ummatTa sa'genna satunggu-tungguna, siagang iKatte o Batara, a'jari Allata'alana ke'nanga.

1 PATTOTTORANG 17:21

Ri sikontu linoa tena bansa sangkamma Israel. Tena ruanna bansa Israel Kilappassang battu ri nipare' ataya untu' a'jari umma' KalenTa. Sikontu anjo gau' malompoa siagang appakalanasaka mae ri ke'nanga sa'genna a'jari masahoro'mo arenTa malla'bang lino. Kilappassangi ummatTa battu ri Mesir, siagang Kipakabellai bansa-bansa maraenga ri wattunna maju ummatTa a'bundu'.

NEHEMIA 1:10

O, Batara, ikambe anne ata-atanTa, umma' kalenTa le'baka Kipasalama' lalang koasaTa siagang kahebakkanna kagassinganTa.

PAMMUJI 106:22

Tamaka lompona apa-apa le'baka Nagaukang ri anjo pa'rasanganga, appakalannasaki tindakanna ri Tamparang Alara'.

PAMMUJI 111:9

Napakabebasaki umma'Na, appareki parjanjiang mannannungang siagang ke'nanga. Iami Batara matangkasa' siagang sannaka poreNa!

PAMMUJI 145:6

Nakabarrangi ke'nanga sikamma panggaukang hebatTa, lakupappiassengangi kalompoanTa.

PAMMUJI 147:20

Tena Nagaukangi kammaya mae ri bansa-bansa maraenga, tena naassengi ke'nanga hukkung-hukkunNa. Pujimi Batara!

PAMMUJI 40:5

Mate'nei tau matappaka ri Batara, tenaya nanynyomba ri rewata-rewataya, yareka appala' tulung mae ri tau tampoa.

PAMMUJI 44:3

IKatte kalenTa ambongkai bansa-bansaya sollanna ammantang ummatTa ri pa'rasanganna ke'nanga. Bansa-bansa maraenga Kicilakai, mingka ummatTa Kilappassang a'bakka'-bakka'.

PAMMUJI 65:5

Mate'nei tau Kipilea, siagang tau Kikioka untu' ammantang ri BallatTa. Lanipassukkuki ikambe ri sikamma apa baji' ri BallatTa, ri pammantangngang matangkasatTa.

PAMMUJI 66:3

Angkana mako ri Allata'ala, “Tojeng, appakalannasaki panggaukanTa! Tunduki musua mae ri Katte napakamma malla', saba' teai sipato' lompona koasaTa.

KALAPPASSANG 12:12

Anjo bangngia laKujappai sikontu butta Mesir, nampa Kubuno sikontu ana'-ana' bura'ne toaya, baji' rupataua, kammayatompa olo'-oloka. LaKuhukkungi sikontu rewatana Mesir, lanri iNakkeji bawang Batara.

KALAPPASSANG 33:16

Antekamma lakkulle naasseng taua angkana mangngellaiKi' ri nakke siagang mae ri anne bansaya, punna tena Kitulungi ikambe? KahaderanTa o Batara, ri tangnga-tangngana ikambe iami la'jari pammatei angkanaya tena nasangkamma ikambe siagang bansa-bansa maraenga ri anne linoa.”

KALAPPASSANG 6:7

LaKuerangko mange ri pa'rasangang Kupa'janjianga ammake sumpa mae ri Abraham, Ishak siagang Yakub; Kupassareangi anjo buttaya mae ri kau a'jari ikau ampatangi. INakkemi Batara.”

KALAPPASSANG 9:15

Ebara' angkana erokKa' anghukkungko siagang ra'ya'nu iamintu Kupitujuiko garring, mattantu sallo mako tena ngaseng.

KALAPPASSANG 9:16

Mingka Kulappassang ngasengko attallasa', sollanna akkulle Kupappicinikang kakoasangKu mae ri kau, sa'genna a'jari masahoro' arengKu ri sikontu linoa.

YEREMIA 32:20

Riolo dudu iKatte anggaukangi gau' appakalannasaka siagang apa-apa tenaya nantama ri akkala'na rupataua ri Mesir, siagang sa'genna pole kamma-kamma anne tuli Kigaukanna, baji' naritangnga-tangngana tu Israel kammayatompa ri tangnga-tangngana sikontu bansa maraenga. Lanri kammanami anjo NaKimasahoro' ri kere-keremae.

YEREMIA 32:21

Lanri koasa siagang kagassingang lompoTa Kierangi umma' Israel assulu' battu ri Mesir. Kigaukangi gau'-gau' appakalannasaka siagang gau'-gau' malompoa appakagegereka ri musu-musua.

YEHEZKIEL 20:9

Mingka tena naKugaukangi, sollanna tena nihinai arengKu ri bansa-bansa napammantangia ke'nanga. Nasaba' ri dallekanna anjo bansa-bansaya le'ba'mi Kupa'la'bang Kupau angkanaya laKuerangi bansa Israel assulu' battu ri Mesir.

PAMMILANGNGANG 6:27

Siagang Nakana Batara, “Punna nasa'bu' ke'nanga arengKu salaku barakka' mae ri bansa Israel, iNakke lambarakkaki ke'nanga.”

EFESUS 1:6

Nipujimi Allata'ala lanri la'biri'na kabajikang pa'mai'Na, le'baka allumpa Napa'nyata mae ri katte ri tete Ana'Na Nakarimangngia.

PAOLE 10:21

Mammujiko mae ri Ia, nasaba' Iami Allata'alanu. Mata kalennumi le'ba' anciniki sikamma gau' malompo siagang gau' heba' Nagaukanga untu' ikau ngaseng.

PAOLE 15:15

U'rangi angkanaya ikau ata tonjako riolo ri Mesir nampa nipakabebasakko ri Karaeng Allata'alanu; iaminjo saba'na nakupassareang anne parentaya mae ri kau.

PAOLE 33:29

E, Israel, tamaka lompona upa'nu, tena bansa maraeng nipasalama' sangkamma ikau. Batara rapang sele'nu siagang pa'dannu, Naalleangangko siagang Nasareko pammetang. Labattui musunnu appala' a'mase-mase, nalanuonjo'-onjokang ke'nanga.”

PAOLE 9:26

siagang appala' doamma' angkana, O, Batara Kaminang Tinggia, tea' laloKi' ancuruki anne umma' KalenTa, bansa le'baka Kilappassang siagang Kiantaraka assulu' battu ri butta Mesir lalang kagassingang siagang kakoasang malompoTa.

TITUS 2:14

Le'ba'mi Nakoro'bangkang KalenNa untu' kasalamakkanta battu ri sikontu kaja'dallanga, na Napa'jariki' umma'Na matangkasaka, siagang rajenga a'gau' baji'.

YOSUA 7:9

Lanalangngere'mi tu Kanaan siagang sikontu tau niaka ri anne daeraya anne passalaka. Lanalipungi siagang lanabuno ngasemmi ikambe! Nampa apa laKigaukang untu' angkatutui kalompoanTa?”

1 PETRUS 2:9

Mingka ikaumi bansa le'baka nipile, imang-imang allayania karaeng, bansa matangkasaka, untu' KalenNa Allata'ala, siagang umma' KalenNa Allata'ala. Napileko siagang Nakiokko Allata'ala assulu' battu lalang ri sassanga untu' antama' ri singara' kalompoanNa, sollanna nupa'la'bang biritta ri sesena sikontu panggaukang malompoNa.

PAPPICINI' 5:9

Akkelommi ke'nanga se're kelongang beru nakana: “IKattemi siratang angngallei anjo kittaka, siagang anreppeki sege'-segele'na. Nasaba' Ikattemi le'ba' nibuno, na lanri kamateanTa, na le'ba'mo Kiballi sikontu rupataua battu ri a'rupa-rupa suku, bahasa, pa'rasangang, siagang bansa, untu' Kierang ri Allata'ala.