2 SAMUEL 3:27 - KITTA' MATANGKASA'

²⁷ Tena nasallo battuna Abner mange ri Hebron, nikio'mi ri Yoab mae ri sa'ri, mae ri ampi'na pakke'bu' lompoa, sangkamma angkanaya nia' rahasia lanabicara. Ti'ring natobo'mi Yoab parru'na Abner sa'genna mate. Kammaminjo namatemo Abner nibuno ri Yoab untu' ambalasaki pammunoanna Abner ri andi'na Yoab iamintu Asael.

2 SAMUEL 3:27 ပူးပေါင်းရင်းမြစ်များ

2 SAMUEL 13:26

Nampa nakanamo Absalom, “Punna padeng kamma, kilappassammi sari'battangku Amnon angngagangi ikambe.” Nakanamo karaenga, “Teami amminawangngi battu.”

2 SAMUEL 19:13

Nasuro tommi Daud ke'nanga ampaui mae ri Amasa kammaya anne, “Sai ikau sibijaki'? Appakkaramula kamma-kamma anne kuangkakko a'jari panglima tantaraku ansambeangi Yoab. Poro Nabuno laloa' Allata'ala punna tena nakurupai anjo kanangku!”

2 SAMUEL 3:26

Nabokoina Daud, akkirimmi Yoab siapa are tunisuro mange angkioki Abner. Napinawammi ke'nanga Abner sa'genna anrapi' mange ri ampi'na bungung Sira, nampa naerang ke'nanga ammotere' Abner. Yangasenna anjo apa kajarianga tanaassengai Daud.

2 SAMUEL 3:28

Nalangngere'na Daud anjo passalaka, nakanamo, “Naassengi Batara angkanaya inakke siagang ra'yakku tena sikali nasala lalang ri anjo pammunoanga mae ri Abner.

2 SAMUEL 4:1

Jari-jarina Saul maraenga iamintu Mefiboset, ana'na Yonatan. Anjo taua tempangi battu ri umuru' liman taung, iamintu ri wattunna mate Saul siagang Yonatan. Nasaba' ri wattunna battu kabara' kamateanna ke'nanga battu ri kota Yizreel, lari patarintina Mefiboset angkalawingi; mingka lanri ta'lalo akkaro-karona anjo bainea, tu'guruki anjo anaka sa'genna tempang. Nalangngere'na Isyboset iamintu ana' bura'nena Saul angkanaya le'ba'mi nibuno Abner ri Hebron, lanynya'mi sumanga'na, siagang annekkere' ngasemmi sikontu bansa Israel. Nia' rua perwira tantarana Isyboset, a'jaria kapala pasukang untu' maju a'bundu'; se'rea niarengi Baana, nampa se'reanga pole niarengi Rekhab. Anjo ke'nanga ana'na Rimon, battu ri Beerot battu ri suku Benyamin. (Anjo Beerot antamaki daerana Benyamin. Pandudu' riolona larimi mange ri Gitaim nampa ammantang anjoreng appakkaramula anjo wattua.)

1 KARAENG-KARAENG 2:32

Lanihukkungi ri Batara lanri pammunoang le'baka nagaukang nampa tanaassenga manggeku. Abner, perwira tantarana Israel, siagang Amasa perwira tantarana Yehuda, rua-rua tena salana. Bajikangngangi ke'nanga na kalenna Yoab, mingka nabunoi ke'nanga.

1 KARAENG-KARAENG 2:5

Nia' pole se're passala'! Tantu nuu'rangi apa le'baka nagaukang Yoab mae ri nakke nabunona rua perwira tantarana Israel, iamintu Abner ana'na Ner siagang Amasa ana'na Yeter. Nabunoi ke'nanga ri wattu amanna taua untu' ambalasaki pammunoang le'baka nagaukang ke'nanga ri wattu a'bundu'na taua. Nabunoi tau tenaya salanna, mingka kamma-kamma anne inakkemi antanggongi panggaukanna siagang inakkemi sessa.

PANGNGEBARANG 26:26

Manna nacokkoi kabirisanna, sikontu taua naciniki kaja'dallanna.

YEREMIA 41:2

Ismael siagang anjo sampuloa tau nabi'bu'mi pa'danna ke'nanga nampa nabuno Gedalya, anjo guburnur niangkaka ri tu Babel.

PAMMILANGNGANG 35:19

Bija ma'reppese'na anjo tau mate nabunoa akkullei nagaukang anjo hukkungang matea. Punna nagappai anjo tau ammunoa, akkullei nabuno.

PAMMILANGNGANG 35:20

Punna nia' tau angkabirisi paranna tau, nampa napatappasaki na nabuno yareka nasambilai apa-apa namate,

PAOLE 27:24

‘Nitunrai tau ammuno cokko-cokkoa.’ ‘Aming!’