2 SAMUEL 16:21 - KITTA' MATANGKASA'

²¹ Appialimi Ahitofel angkana, “A'lampa maki' mange ri sikamma baine piarana manggeta niaka anjagai balla' kakaraenganga, siagang sikatinroang maki' siagang ke'nanga. Lanaassengi sikontu tu Israel angkana lanri sikamma anjo apa kigaukanga, nakinipa'jari musumo ri manggeta. Jari sikontu tumminawanga mae ri katte pila' katambangi baranina.”

2 SAMUEL 16:21 ပူးပေါင်းရင်းမြစ်များ

PA'JARIANG 34:30

Nakanamo Yakub ri Simeon siagang Lewi, “Nususai ngasemma' antu. Kamma-kamma anne inakke nakabirisima' tu Kanaan, tu Feris kammayatompa sikontu tau niaka anrinni ri pa'rasanganga. Ikatte taunta tena najai. Punna asse're ngaseng anjo taua angngewa' siagang ambundukia', sikontu bija pammanakanta akkulle ngasengi naancuru'.”

PA'JARIANG 35:22

Lalang nia'na ke'nanga ri anjo tampaka, assikatinroammi Bilha siagang Ruben, anjo baine piarana manggena. Anne passalaka nalangngereki Yakub, siagang sanna'mi larrona napakamma. Nia' sampulo anrua ana' bura'nena Yakub.

PA'JARIANG 38:16

Nampa a'reppese'mo mange ri anjo biring aganga, nampa nakana ri anjo bainea, “Siapa nupala'?” Tanaassengai angkana anjo bainea mintunna tonji. Appialimi Tamar angkana, “Battu ri katte tommo, Karaeng.”

PA'JARIANG 6:4

Ri anjo jammanga siagang ri le'ba'na anjo, nia' tau sannaka lompona ngaseng kalenna ri lino. Anjo ke'nanga ana'-ana' battu ri sikamma anjo tulolo a'buntinga siagang rewata-rewataya. Anjo tau lompoa ngaseng kalenna masahoroki niasseng siagang iami pahlawang-pahlawang lompo ri jammang riolo.

2 SAMUEL 10:6

Nampa naassemmo kalenna tu Amon angkanaya anjo panggaukanna ke'nanga a'jari passabakkang nanimusumo ke'nanga ri Daud. Lanri kammana anjo assewami ke'nanga 20.000 jaina tantara tu Siria niaka ammantang ri Bet-Rehob siagang Zoba, siagang 12.000 jaina tantara battu ri Tob, kammayatompa karaenna pa'rasangang Maakha siagang 1.000 tau ana' buana.

2 SAMUEL 12:11

Assumpa' angkanaya laKupitujuiko bala, iamintu battua ri kaluarga kalennu. LaKuallei sikamma bainennu ri dallekang matannu siagang Kupassareangi mae ri tau maraenga assikatinroanga siagang ke'nanga ri tangngana alloa.

2 SAMUEL 13:5

Nakanamo Yonadab ri ia, “Anu gampang sikali antu! Attinro mako ri katinroanga, siagang assara-sarai mako garring. Punna battu manggenu antoakko, angkanako ri ia, ‘Bapa', kisurosai Tamar battu sollanna nasarea' kanre. Punna akkullei kucini' ampallui anjo kanrea anrinni, akkullea' angnganre.’ ”

2 SAMUEL 15:16

Nampa a'lampamo karaenga nirurungang ri sikontu kaluargana siagang pagawena, pantaranganna sampuloa baine piarana naboliki untu' anjagai balla' kakaraenganga.

2 SAMUEL 16:20

Nampa nakanamo Absalom mae ri Ahitofel, “Paumi apa musti nigaukang.”

2 SAMUEL 17:7

Appialimi Husai angkana, “Ri kamma-kammaya anne tena nabaji' anjo kana pangngunju'na Ahitofel.

2 SAMUEL 2:7

Pakasa'baraki pa'mai'nu siagang gaukangi gau' kabaranianga! Saul, karaennu matemi, mingka le'ba'ma' nalanti' tu Yehuda a'jari karaenna ke'nanga.”

2 SAMUEL 20:3

Battuna Daud mange ri balla' kakaraenganna ri Yerusalem, anjo sampuloa baine piara nabolika anjagai balla' kakaraenganga, naerangi antama' ri balla' nijagai bajika ri pangawala'. Sikamma apa naparalluanga ke'nanga nipasadiai siganna'-ganna'na, mingka tale'bakami Daud assikatinroang siagang ke'nanga. Jari nijagaimi ke'nanga siagang sangkammami janda tallasa'na ke'nanga sa'genna mate.

1 KARAENG-KARAENG 11:25

Sangkamma Hadad, Karaeng Rezon namusu tongi Israel ri jammang attallasa'na Salomo, siagang nakacoi anjo pa'rasanganga.

1 KARAENG-KARAENG 2:17

Akkuta'nammi Batsyeba angkana, “Apa pappala'nu?” Appialimi Adonia angkana, “Kupalaki ri ibu' nakiero' ampalakkanga' pangngellai ri Karaeng Salomo untu' ambuntingi Abisag, anjo tulolo battua ri Sunem. Tappaka' angkanaya tena nalanatea anturuki pappalatta.”

1 KARAENG-KARAENG 2:22

Akkuta'nammi Salomo angkana, “Angngapa nakipala' anjo ri nakke amma'? Anjo sangkamma le'ba'ji angkanaya kipalaki sollanna kupassareang anne empoang kakaraenganga ri ia. Sai ia daengku? Nampa pole Imang Abyatar siagang Yoab ammenteng maei ke'nanga ri ia!”

KAIMANGNGANG 18:8

Teako hinai manggenu lanri assikatinroannu siagang kalase'renna bainenna maraenga.

KAIMANGNGANG 20:11

Punna nia' tu bura'ne assikatinroang siagang kalase'renna bainenna manggena, naparkosai ha'na manggena. Anjo bura'nea siagang anjo bainea musti nihukkung matei. Matei ke'nanga lanri salana tonji ke'nanga.

ZAKHARIA 8:13

He pandudu' Yehuda siagang Israel! Ri jammang allaloa, punna situnra-tunrai bansa maraenga, nakana ke'nanga, ‘Poro battu lalo bala sangkammaya antujui Yehuda siagang Israel antuju tongko!’ Mingka laKupasalama' ngasengko, sa'genna anjo bansa-bansa maraenga lanakana massing ri para ia ke'nanga, ‘Poro anjo barakka' turunga ri Yehuda siagang Israel, turung tongi mae ri kalennu!’ Lanri kammana pakajarreki pa'mai'nu siagang teako mallakki!”

1 KORINTUS 5:1

Sikontutojenna battumi mae ri nakke kabara'na angkanaya nia' tau ta'liwa'-liwa' batena a'gau' bawang ri tangnga-tangnganu; nia' tau assalimara' siagang amma' aona. Manna tau kapereka ta'gau' kammayai!

1 SAMUEL 13:4

Mae ri sikontu bansa Israel napaumi Saul angkanaya le'baki nabuno panglimana tu Filistin, siagang angkanaya sanna'mi birisi'na tu Filistin mae ri tu Israel. Lanri kammana, amminawang turu'mi ra'yaka ri pakkio'na Saul untu' a'rappungang siagang ia ri Gilgal.

1 SAMUEL 27:12

Mingka Akhis napatappaki Daud na napikkiri' lalang ri atinna angkanaya, “Sannaki nikabirisinna ri bansana kalenna, sa'genna tarpassa a'jari atangku lalang sikontu tallasa'na.”