2 SAMUEL 14:19 - KITTA' MATANGKASA'

¹⁹ Nakanamo karaenga, “Maka Yoab anne assuroko?” Appialimi anjo bainea angkana, “Lanri nyawata karaeng, tena olona atanta lakkulle alliliangi kalenna battu ri pakkuta'nanta karaeng. Kammatojengi karaeng, Yoab ampauangi atanta apa musti nagaukang siagang napau atanta.

2 SAMUEL 14:19 ပူးပေါင်းရင်းမြစ်များ

2 SAMUEL 11:11

Appialimi Uria angkana, “Tantara Israel siagang Yehuda sitabangi a'bundu' tojeng-tojeng siagang nirurungangi ke'nanga ri Patti ParjanjianNa Batara; Yoab panglimana ikambe siagang sikamma perwiraya niaki akkema ri paranga. Angngapa naanne atanta ammotereki mae ri balla', angnganre angnginung siagang attinro siagang bainenna? Lanri nyawana karaengku siagang lanri nyawana atanta, tena nalanagaukang atanta anjo kammaya!”

2 SAMUEL 14:18

Appialimi karaenga angkana, “Nia' ero' kupakkuta'nangngang mae ri kau, pialimi siagang lambusu'na pa'mai'nu.” Appialimi anjo bainea angkana, “A'bicaramaki' karaeng.”

2 SAMUEL 14:3

Nampa a'lampaki' mange ri karaenga siagang akkana maki'ri ia kamma anne.” Nampa napauammo Yoab apa mustia napau.

2 SAMUEL 18:13

Siagang ebara' angkana kubunoi Absalom sumpaeng, mattantu lanaassengi karaenga, nasaba' tantu nalangngereki karaenga sikontu-kontua, kammayatompa tantu tena nalakialleia'.”

2 SAMUEL 3:27

Tena nasallo battuna Abner mange ri Hebron, nikio'mi ri Yoab mae ri sa'ri, mae ri ampi'na pakke'bu' lompoa, sangkamma angkanaya nia' rahasia lanabicara. Ti'ring natobo'mi Yoab parru'na Abner sa'genna mate. Kammaminjo namatemo Abner nibuno ri Yoab untu' ambalasaki pammunoanna Abner ri andi'na Yoab iamintu Asael.

2 SAMUEL 3:29

Lappassammi Yoab siagang sikontu kaluargana nihukkung lanri anjo panggaukanna. Dasi-dasi na lalang ri kaluargana Yoab siagang jari-jarina tuli nia'na tau garring sala, yareka bura'ne tenaya kagassinganna, yareka kakurangangi ri kanre-kanreang!”

2 SAMUEL 3:34

“Maka musti matei Abner a'jari tau tolo: tena natassikko' limanna, na bangkenna tena narimpungi? Mate nitoboki ri tau ja'dalaka siagang tau pallaka.” Nampa angngarru' sikontu ra'yaka pila' lompo sa'ranna angkarruki Abner.

2 KARAENG-KARAENG 2:2

nampa ri tangngana aganga nakanamo Elia mae ri Elisa, “Ammantangko anrinni. Nasuroa' Batara a'lampa mange ri Betel.” Mingka appialimi Elisa angkana, “Lanri Batara mattallasaka siagang lanri nyawata bapa', tena nakuero' ambokoiki'.” Jari siagammi ke'nanga ampatulusuki lampana sa'genna mange ri Betel.

KALAPPASSANG 4:15

A'bicara mako siagang ia, siagang pauammi apa musti lanapau. INakke lantulungko sipa'rua siagang langngajarakko apa musti nupau siagang musti nugaukang.

PANGNGEBARANG 25:2

Nipakala'biriki Allata'ala lanri apa-apa Narahasiakanga; karaenga nipakalompoi lanri apa akkullea napakasingara'.

PANGNGEBARANG 4:27

Pakabellai kalennu battu ri kaja'dallanga, siagang lambusukko lalang tallasa'nu. Tea' laloko ammengkai battu ri oloang annabaya.

PAMMILANGNGANG 20:17

Napalaki ikambe mae ri karaengku, nakipa'biang ikambe ammalo ri anne pa'rasanganga. Ikambe siagang olo'-olo'na ikambe tenaja nalammengka battu ri oloanga siagang tenaja nilantama' ri koko-kokoa yareka koko-koko anggoroka. Tenaja nalanainung ikambe je'ne' battua ri sikamma bungunna karaengku. Poro lanjorenji ri agang lompoa a'jappa ikambe sa'genna assulu' battu ri daerana karaengku.”

LUKAS 21:15

INakke lassareko kacara'dekang siagang kana-kana lanupaua. Sa'genna manna sitau ri musu-musunnu takkulle ambeta kanako yareka ampassalai apa-apa nupaua.

PAOLE 28:14

Mingka tea sikaliko kaluppai anjo parenta-parentaya, manna pole antekamma. Tea tongko anynyombai siagang teako pare' atai kalennu mae ri rewata-rewata maraenga.”

PAOLE 5:32

Sikamma sari'battangku, turuki siagang pa'mai' tamamminra sikontu apa Naparentakanga Karaeng Allata'alanu mae ri kau ngaseng. Teako dakkai manna se're sikamma anjo parentaya.

YOSUA 1:7

Iaji bawang, paralluko tappa' tojeng-tojeng siagang barani. Musti nujagai sollanna tuli nuturuki sikontu hukkung napassareanga anjo atangKu Musa mae ri kau; teako kaluppai manna sike'de', sollanna a'jari usahanu.

1 SAMUEL 1:26

Nakana Hana mae ri Eli, “Pammopporanga' bapa'. Kiu'rangi ija' bapa'? Inakke minne baine le'baka kicini' ammenteng anrinni, appala' doang mae ri Batara.

1 SAMUEL 17:55

Nacini'na Saul a'lampa Daud mange angngewai Goliat, akkuta'nammi ri Abner panglima tantarana angkana, “Abner, inai ana' anjo?” Appialimi Abner angkana, “Tanaassengai atanta karaeng.”

1 SAMUEL 20:3

Appialimi Daud angkana, “Baji' naassenna manggenu angkanaya nungaia'. Jari tantu tena naero' ampauangko anjo passalaka sollanna tena nusi'na. Manna pole antekamma, lanri Batara attallasaka, sikontutojenna tallasakku sanrapangi bayao ta'dongkoka ri cappa' tanru'!”

1 SAMUEL 25:26

Napisangkaiki' Allata'ala untu' annuntu' pambalasang siagang ambunoi musu-musunta. Nampa kamma-kamma anne karaeng, lanri Batara mattallasaka, assumpai atanta, tapporo sarenna sikontu musunta siagang sikamma tau eroka ancilakaiki' sangkammai sarenna Nabal.